திருப்பூர், ஜூன் 26 –
திருப்பூர் மாநகர் மற்றும் மாவட்டத்தில் ஆடை உற்பத்தித் தொழில் நிமித்த மாக வெளி மாவட்டங்கள் மற்றும் வெளி மாநில தொழிலாளர்களின் வருகை ஆண்டு தோறும் அதிகரித்து வருகிறது. இவர்களின் குழந்தைகள் மற்றும் ஏழை, எளிய மக்களின், குழந்தைகளின் கல்வி தேவைக்கு அரசு பள்ளிகளே முதன்மை தேர்வாக உள்ளது.
கழகத் தலைவர், முத்துவேல் கருணாநிதி ஸ்டாலின் அவர்களின் தலைமையிலான திராவிட மாடல் ஆட்சி காலத்தில் கொண்டு வரப்பட்ட காலை உணவுத்திட்டம், உள்ளிட்ட பல்வேறு ஆக்கப்பூர்வமான திட்டங்க ளால், நடப்பு கல்வி ஆண்டிலும் திருப்பூர் மாநகராட்சி மற்றும் மாவட்டத்தின் பிற பகுதிகளில் உள்ள அரசு பள்ளிகளில் மாணவர் சேர்க்கை கணிசமாக உயர்ந்துள்ளது. ஆனால், மாணவர்களின் எண்ணிக்கைக்கு ஏற்ப வகுப்பறைகள், கழிவறைகள் உள்ளிட்ட கூடுதல் உள்கட்ட மைப்பு வசதிகளை மேம்படுத்துவதில் தற்போது தொய்வு ஏற்பட்டுள்ளதாக கல்வி ஆர்வலர்கள் கவலை தெரிவிக்கின்றனர்.
கடந்த திராவிட முன்னேற்ற கழக ஆட்சியில், அரசு பள்ளிகள் குடியிருப்பு பகுதிகள் மற்றும் அரசு மருத்துவமனைகளின் உள் கட்டமைப்பை மேம்படுத்த “நமக்கு நாமே திட்டம்” தீவிரமாக செயல்படுத்தப்பட்டது.
இத்திட்டத்தின் கீழ், பொதுமக்கள் அல்லது தன்னார்வலர்கள் தாங்களாகமுன்வந்து வழங்கிய நிதி பெறப்பட்டு. மீதித் தொகையை அரசே ஏற்று பணிகள் செய்யப்பட்டன. இதன் மூலம் திருப்பூரில் உள்ள பல அரசு பள்ளிகளில் நவீன கழிவறைகள், ஸ்மார்ட் கிளாஸ் வகுப்பறைகள், விளையாட்டு உபகரணங்கள் மற்றும் சில பள்ளிகளில் கூடுதல் வகுப்பறை கட்டி டங்கள் கட்டப்பட்டன.
திருப்பூரின் பின்னலா டைத் தொழில் அதிபர்கள் மற்றும் தொண்டு நிறுவனங்கள் போட்டி போட்டுக்கொண்டு அரசு பள்ளிகளுக்கு நிதி வழங்கி, உள்கட்டமைப்பை அடுத்த கட்டத்திற்கு எடுத்து சென்றனர். நடைமுறைப்படி, இத்திட்டத்திற்கான நிதியின் ஒரு பகுதியை தன்னார்வலர்கள் மாவட்ட ஆட்சியர் அல்லது உள்ளாட்சி அமைப்புகளின் ஆணையர்களிடம் வழங்கி அதற்கான ரசீது பெற்றுக்கொள்வார்கள். அல்லது அதன் பின்னரே அரசாங்கத்தின்பங்களிப்பு நிதியும் சேர்க்கப்பட்டு, முறைப்படி உள்கட்டமைப்பு பணிகள் பொதுப்பணித்துறை அல்லது உள்ளாட்சி அமைப்புகள் மூலம் தொடங்கி நடைபெறும். தற்போது பள்ளிகள் திறந்து முழு வீச்சில் வகுப்புகள் நடந்து வரும் தற்போதைய சூழலில், இடநெருக்கடி மற்றும் கூடுதல் கழிவறைகளின் தேவை உருவாகியுள்ளது.
கடந்த திராவிட மாடல் ஆட்சி காலங்களில் கைகொடுத்த “நமக்கு நாமே” திட்டத்தின் தற்போதைய நிலை என்ன?, புதிய அரசு இத்திட்டத்தை இதே முறையில் முன்னெடுக்கிறதா? என்பது குறித்து அரசு பள்ளி நிர்வாகங்களுக்கு தெளிவான வழிகாட்டுதல்கள் இன்னும் கிடைக்கவில்லை எனக்கூறப் படுகிறது. திருப்பூர் போன்ற தொழிலாளர்கள் அதிகம் வாழும் மாவட்டங்களில், அரசு பள்ளிகளின் உள்கட்ட மைப்பை வெறும் அரசு நிதியை மட்டுமே நம்பி உடனடியாக மேம்படுத்துவது கடினம் என்பதால், இந்த மக்கள் பங்களிப்பு திட்டங்களை தற்போதைய புதிய அரசும் தொடர்ந்து முன்னெடுக்க வேண்டும் அல்லது அதற்கு இணையான மாற்று வழிகாட்டுதல்களை துரிதமாக அறிவிக்க வேண்டும் என வலியுறுத்துகின்றனர்.
இது குறித்து அரசு பள்ளி தலைமை ஆசிரியர் ஒருவர் கூறுகையில், “எங்கள் பள்ளியில் இந்த ஆண்டு மாணவர் சேர்க்கை நன்றாக உள்ளது. கூடுதல் வகுப்பறைகளும், கழிவறை வசதிகளும் அவசரமாக தேவைப்படுகின்றன. கடந்த கல்வி ஆண்டில் “நமக்கு நாமே” திட்டத்தின் கீழ் ஸ்மார்ட் கிளாஸ் ரூம் உருவாக்கப்பட்டது. தற்போதும் தேவைகள் உள்ளது. கல்வி சேவைக்கு உதவிட பலரும் தயாராக உள்ளனர்.
ஆனால், இந்த திட்டம் புதிய அரசின் கீழ் தற்போதும் நடைமுறையில் உள்ளதா? மாவட்ட ஆட்சியரிடமோ அல்லது மாநகராட்சி ஆணையரிடமோ நிதியைச் செலுத்தி ரசீது பெறும் பழைய நடைமுறையை தொடரலாமா? என்பது குறித்து சுற்றறிக்கை இன்னும் வரவில்லை. இதனால், தன்னார்வலர்களிடம் இருந்து நிதியை பெற்று முறைப்படி பணிகளை தொடங்க முடியாமல் குழப்பத்தில் உள்ளோம். தற்போதைய தேவைகளை உணர்ந்து அரசு விரைவில் தங்கள் கொள்கை முடிவை அறிவிக்க வேண்டும்” என்றார்.