திருவள்ளூர், ஜூன் 26:
தேர்தல் காலத்தில் விவசாயிகளின் தோளில் கைபோட்டு வாக்குறுதிகளை அள்ளி வழங்கிய த.வெ.க. அரசு, ஆட்சிக்கு வந்த பிறகு அந்த வாக்குறுதிகளை மறந்துவிட்டதா என்ற கேள்வியை எழுப்பும் வகையில், திருவள்ளூர் ஆட்சியர் அலுவலகத்தில் நடைபெற்ற விவசாயிகள் நலன் காக்கும் கூட்டம் போராட்ட அரங்கமாக மாறியது.
திருவள்ளூர் மாவட்ட ஆட்சியர் கவிதா தலைமையில் நடைபெற்ற விவசாயிகள் குறைதீர்க்கும் கூட்டத்தில் பங்கேற்ற விவசாயிகள், திடீரென கருப்பு பேட்ஜ் அணிந்து தரையில் அமர்ந்து தர்ணா போராட்டத்தில் ஈடுபட்டனர். விவசாயக் கடன்களை முழுமையாக தள்ளுபடி செய்வதாக அறிவித்த அரசின் வாக்குறுதி இதுவரை நிறைவேற்றப்படாத தால், கடும் அதிருப்தியடைந்த விவசாயிகள் தங்கள் எதிர்ப்பை வெளிப்படுத்தினர்.
“விவசாயிகள் நலன்” என்று விளம்பரங்களில் பெருமை பேசும் அரசு, நிஜத்தில் விவசாயிகளின் வேதனையை கேட்கத் தயாராக இல்லை என்றும், கடன் சுமையால் விவசாயிகள் நாளுக்கு நாள் நெருக்கடிக்குள் தள்ளப்பட்டு வருவதாகவும் போராட்டத்தில் ஈடுபட்டவர்கள் குற்றம்சாட்டினர்.
போராட்டத்தில் ஈடுபட்ட விவசாயிகளிடம் ஆட்சியர் பேச்சுவார்த்தை நடத்தி, கோரிக்கைகள் அரசின் கவனத்திற்கு கொண்டு செல்லப்படும் என்று உறுதியளித்ததைத் தொடர்ந்து போராட்டம் கைவிடப்பட்டது. இருப்பினும், “வாக்குறுதி நிறைவேறும் வரை போராட்டம் தொடரும்” என்ற மனநிலையிலேயே விவசாயிகள் இருந்தனர்.
செய்தியாளர்களிடம் பேசிய விவசாயிகள், “எதிர்க்கட்சிகள் தூண்டிவிட்டதால் போராட்டம் நடத்துகிறோம் என்ற அரசுத் தரப்பின் குற்றச்சாட்டு முற்றிலும் பொய்யானது. இது எங்கள் வயிற்றுப் போராட்டம். எந்த அரசியல் கட்சியின் தூண்டு தலும் இல்லை. அரசு சொன்ன வாக்குறுதியை நிறைவேற்ற வேண்டும் என்பதே எங்களின் ஒரே கோரிக்கை” என்று தெரிவித்தனர்.
விவசாயிகளின் கண்ணீரைத் துடைப்போம் என்று கூறி ஆட்சிக்கு வந்த அரசு, இன்று அதே விவசாயி களை கருப்பு பேட்ஜ் அணிந்து ஆட்சியர் அலுவலகத்தில் தரையில் அமர்ந்து போராடும் நிலைக்கு தள்ளியிருப்பது வேதனைக்குரியது”வாக்குறுதி கொடுத்தது அரசு;
வாக்குறுதியை நினைவூட்ட போராடுவது விவசாயிகள்;இதுதானா த.வெ.க. ஆட்சியின் விவசாயி நலன்?”என்ற கேள்வி திருவள்ளூர் மாவட்டம் முழுவதும் எதிரொலிக்கிறது.