திருவள்ளூர், ஜூன் 26:
மக்களின் அன்றாட பிரச்சினைகளுக்கு தீர்வு காண்பதைவிட, பேனர்களில் பெயர் மற்றும் புகைப்படம் இடம்பெறுவதை உறுதி செய்வதிலேயே த.வெ.க. நிர்வாகிகள் கவனம் செலுத்துகிறார்களோ என்ற கேள்வியை எழுப்பும் சம்பவம் திருவள்ளூர் அருகே அரங்கேறியுள்ளது.
திருவள்ளூர் அடுத்த கல்யாணகுப்பம் காலனி, பஜனை கோயில் தெருவைச்சேர்ந்த தனுஷ்
என்பவர், முதலமைச்சர் பிறந்தநாளைமுன்னிட்டு அப்பகுதியில் வாழ்த்து பேனர் வைத்திருந்தார். அந்த பேனரில் த.வெ.க. மேற்கு ஒன்றிய இணைச் செயலாளர் பிரகாஷின் பெயரும், புகைப்படமும் இடம்பெறவில்லை எனக் கூறப்படுகிறது.
இதனால் ஆத்திரமடைந்த பிரகாஷ், முருகேசன் மற்றும் கார்த்திக் ஆகியோர் தனுஷின் வீட்டிற்குச் சென்று விளக்கம் கேட்டதாகவும், அப்போது வீட்டில் தனியாக இருந்த அவரது மனைவி கயல்விழியுடன் வாக்குவாதத்தில் ஈடுபட்டதாகவும் கூறப்படுகிறது.
மேலும் தகாத வார்த்தைகளால் பேசியதுடன், கொலை மிரட்டல் விடுத்ததாகவும் கயல்விழி அளித்த புகாரில் தெரிவிக்கப்பட்டுள்ளது. இதையடுத்து புல்லரம்பாக்கம் போலீசார் பிரகாஷ், முருகேசன், கார்த்திக் ஆகிய மூவர் மீதும் வழக்குப் பதிவு செய்து விசாரணை நடத்தி வருகின்றனர்.
முதல்வரின் பிறந்த நாளை முன்னிட்டு மக்கள் நலப் பணிகள், நலத்திட்ட உதவிகள் மற்றும் சமூக சேவைகள் நடைபெற வேண்டிய நிலையில், பேனரில் யாருடைய பெயர் இடம்பெற வேண்டும்என்ற விவகாரம் காவல் நிலையம் வரை சென்றிருப்பது அரசியல்வட்டாரங்களில் விமர்சனத்தை ஏற்படுத்தியுள்ளது.
மக்களின் எதிர்பார்ப்புகளை நிறைவேற்றும் பணிகளை விட, பேனர் அரசியலுக்கே முக்கியத்துவம் அளிக்கப்படுகிறதா என்றகேள்வியும் பொதுமக்கள் மத்தியில் எழுந்துள்ளது. பிறந்தநாள் கொண்டாட்டம் என்ற பெயரில் தொடங்கிய நிகழ்வு, வழக்குப் பதிவில் முடிந்திருப்பது த.வெ.க.வின் உள்கட்சி ஒழுங்கு மற்றும் நிர்வாகிகளின் செயல்பாடுகள் குறித்து பல்வேறு கேள்விகளை எழுப்பியுள்ளது.