கள்ளக்குறிச்சி, ஜூன் 26–
கள்ளக்குறிச்சி மாவட்டம் கல்வராயன் மலை அரசு பள்ளியில் மாணவிகளுக்கு பாலியல் தொல்லை கொடுத்த கணினி ஆசிரியர் போக்சோ வழக்கின் கீழ் கைது செய்யப்பட்டுள்ளார்.
கள்ளக்குறிச்சி மாவட்டம் வெள்ளிமலை கிராமத்தில் அமைந்துள்ள அரசு பழங்குடியினர் நல உண்டி உறைவிட மேல்நிலைப் பள்ளியில் பயிலும் 9-ஆம் வகுப்பு மாணவிகளுக்கு, கணினி ஆசிரியர் பாலியல் தொல்லை அளித்ததாக புகார் எழுந்துள்ளது.
கடந்த ஜூன் 18-ஆம் தேதியன்று வகுப்பறையில் வைத்து, மாணவிகளுக்கு அந்த ஆசிரியர் பாலியல் சீண்டல்களுடன் தொல்லை கொடுத்துள்ளதாகக் கூறப்படுகிறது. இச்சம்பவம் குறித்துத் தகவல் அறிந்த வருவாய்த்துறை மற்றும் காவல்துறை அதிகாரிகள் பள்ளிக்கு நேரில் சென்று விசாரணை நடத்தினர்.
பின்னர் பாதிக்கப்பட்ட மாணவிகளை கள்ளக்குறிச்சி குற்றவியல் நீதிமன்ற நடுவர் முன்னிலை யில் ஆஜர்படுத்தி வாக்குமூலம் பெறுவதற்காக மகளிர் போலீஸார் அழைத்துச் சென்றனர்.
இச்சம்பவத்தால் வெள்ளிமலை கிராமத்தில் பதற்றமான சூழல் நிலவிய போதிலும், சட்ட ஒழுங்குப் பிரச்சினை ஏதும் ஏற்படாத வண்ணம் போலீஸார் தீவிர கண்காணிப்பில் ஈடுபட்டனர்.பின்னர், பள்ளி மாணவிகளுக்குப் பாலியல் தொல்லை கொடுத்த ஆசிரியர் மீது போக்சோ சட்டத்தின் கீழ் வழக்குப் பதிவு செய்து கைது செய்துள்ளனர்.