திருச்சி, ஜூன். 27–
திருச்சியில் முத்தமிழ் அறிஞர் கலைஞர் அவர்களின் பிறந்த நாள் விழா பொதுக்கூட்டம் திருச்சி எடமலைப்பட்டி புத்தூர் பகுதியில் மாவட்ட கழக துணை செயலாளர், மாமன்ற உறுப்பினர்
முத்துச்செல்வம் ஏற்பாட்டில் நடைபெற்றது. இக்கூட்டத்தில் கழக முதன்மைச் செயலாளரும், தமிழ்நாடு சட்டமன்ற எதிர்க்கட்சித் துணைத் தலைவருமான, முன்னாள் அமைச்சர் கே என் நேரு, மற்றும் திராவிடர் கழக துணை பொதுச்செயலாளர் வழக்கறிஞர் மதிவதனி ஆகியோர் கலந்து கொண்டு கலைஞர் அவர்களின் புகழையும் சாதனைகளையும் போற்றி சிறப்புரையாற்றினர்.
இந்த பொதுக் கூட்டத்தில் முன்னாள் அமைச்சர் கே.என்.நேரு பேசுகையில்..
கடந்த ஐந்தாண்டு கால மு.க.ஸ்டாலின் ஆட்சியில் மட்டும் திருச்சி மாவட்டத்தின் பல்வேறு வளர்ச்சிப் பணிகளுக்காக 34,000 கோடி ரூபாய் நிதி ஒதுக்கீடு செய்யப்பட்டு, எண்ணற்ற பணிகள் செய்து தரப்பட்டுள்ளன. திருச்சியின் 9 தொகுதிகளுக்கும் பாதுகாக்கப்பட்ட குடிநீர் தங்குதடையின்றி கிடைக்கச் செய்தது திமுக ஆட்சிக் காலத்தில் தான், மாநகராட்சிப் பகுதிகளில் பட்டா வழங்குவதில் இருந்த சிக்கல்களைத் தீர்த்து, சுமார் 40 முதல் 50 ஆண்டுகளாக வசித்து வந்த 15,000-க்கும் மேற்பட்ட மக்களுக்கு அமைச்சரவையில் தீர்மானம் நிறைவேற்றப்பட்டு பட்டாக்கள் வழங்கப்பட்டுள்ளன. மேலும், கடந்த தேர்தலில் மக்கள் அளித்த ஆதரவையும், சில தொகுதிகளில் ஏற்பட்ட மிகக் குறைந்த வாக்குகள் வித்தியாசத்திலான பின்னடைவு களையும் குறிப்பிட்ட அமைச்சர், நீதிமன்றத்தில் வழக்குகள் நிலுவையில் உள்ளதால் அது குறித்துப் பேச இயலாது என்றார். இருப்பினும், மக்கள் நலனுக்காகத் தொடர்ந்து உழைக்கப் போவதாகக் கூறினார். மேலும் வரவிருக்கும் உள்ளாட்சித் தேர்தல் மற்றும் நாடாளுமன்றத் தேர்தல்களில் தாய்மார்களும் பொதுமக்களும் தங்களது பேராதரவை வழங்க வேண்டும் எனக் கேட்டுக்கொண்டார்.
இதனைத் தொடர்ந்து பொதுக்கூட்டத்தில் திராவிட கழகத் துணை பொதுச்செயலாளர் வழக்கறிஞர் மதிவதனி கலந்துகொண்டு கலைஞர் அவர்களின் புகழையும் சாதனைகளையும் எடுத்துரைத்து பேசினார். நாம் மீண்டும் எழுவோம் என்பதற்கான முதல் நிகழ்ச்சிதான் திருச்சியில் தற்போது நடந்து கொண்டிருக்கிறது. தேர்தல் வெற்றி, தோல்விகளால் பின்னடைவைச் சந்திக்கக்கூடிய இயக்கம் திராவிட இயக்கம் அல்ல. அரசியல் தேர்தல் முடிவுகளைக் கொண்டு நம்முடைய வெற்றியை கணக்கிட முடியாது. திராவிட முன்னேற்றக் கழகத்திற்கும் முன்னாள் முதலமைச்சர் ஸ்டாலினுக்கும் எதிராகப் பெண்கள் இருப்பதாக ஒரு பிம்பத்தை உருவாக்கப் பார்க்கிறார்கள். ஆனால், பகுத்தறிவுள்ள பெண்கள் எப்போதும் திராவிட இயக்கத்தின் பக்கமே நிற்கிறார்கள் என்பதைக் காட்டவே இப்பெரும் கூட்டம் கூடியுள்ளது. பெரியார் போன்ற தலைவர்கள் உழைத்ததால்தான், இன்று பெண்களுக்குப் படிப்பும், வேலை வாய்ப்பும், மேடைகளில் பேசும் உரிமையும் கிடைத்
துள்ளன.
பெண்களின் உழைப்பை அங்கீகரித்து கலைஞர் மகளிர் உரிமைத் தொகையாக ரூபாய் 1000 வழங்கியவர் முன்னாள் முதலமைச்சர் மு.க. ஸ்டாலின் திமுக ஆட்சியில் கொண்டுவரப்பட்ட விடியல் பயணம், காலை உணவுத் திட்டம், மக்களைத் தேடி மருத்துவம், புதுமைப் பெண் திட்டம் மற்றும் நான் முதல்வன் போன்ற திட்டங்கள் மக்களின் வாழ்வாதாரத்தை உயர்த்தியுள்ளன. தற்போதைய புதிய அரசு, இத்திட்டங்களின் பெயர்களை மாற்றினாலும், இவற்றால் ஏற்பட்ட நன்மைகளையும் வளர்ச்சியையும் வரலாற்றிலிருந்து யாராலும் நீக்க முடியாது. கொரோனா பேரிடர் காலத்தில், தனது உயிரையும் பொருட்படுத்தாமல் பிபிஇ கிட் அணிந்து கொண்டு மருத்துவமனைகளுக்குச் சென்று ஆய்வு நடத்தியவர் முன்னாள் முதலமைச்சர் மு.க. ஸ்டாலின். அரசியல் களத்தில் பல்வேறு பொய்களைப் பரப்பி வாக்கு கேட்டு வந்தவர்களுக்கு, மக்கள் தற்போது தகுந்த பதிலடி கொடுத்து வருகிறார்கள். திராவிட இயக்கங்களின் கொள்கைகளும் சாதனைகளும் மக்கள் மனதில் எப்போதும் நிலைத்தி ருக்கும் என்று அவர் பேசினார்.
இந்த பொதுக் கூட்டத்தில் மத்திய மாவட்ட செயலாளர் வைரமணி, மாநகரச் செயலாளர் மேயர் அன்பழகன், மாவட்ட பொருளாளர் துரைராஜ், கோட்டத் தலைவர் துர்கா தேவி, மாமன்ற உறுப்பினர் கிராப்பட்டி செல்வம், பகுதிச் செயலாளர் மோகன்தாஸ் உள்ளிட்ட ஏராளமான கழக நிர்வாகிகள் மற்றும் பொதுமக்கள் கலந்து கொண்டனர்.