நாமக்கல், ஜூன் 29–
தமிழ்நாடு அரசின் டெல்லி பிரதிநிதியாக நியமிக்கப்பட்ட கே.வெங்கட நாராயணா நியமனத்தை ரத்து செய்து தமிழ்நாட்டை சார்ந்தவரை நியமிக்க வேண்டும் என கொங்குநாடு மக்கள் தேசிய கட்சி பொதுச் செயலாளர் ஈ.ஆர்.ஈஸ்வரன் வலியுறுத்தி உள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது:–
தமிழ்நாடு அரசின் டெல்லி பிரதிநிதியாக கர்நாடகாவை சார்ந்த ஜனநாயகன் படத்தின் தயாரிப்பாளர் கே.வெங்கட நாராயணாவை த.வெ.க. அரசு நியமித்திருப்பது வேடிக்கையாகவும், புதுமையாகவும்இருக்கிறது. அமைச்சருக்கு இணையான அதிகாரமிக்க ஒருமுக்கிய பொறுப்பிற்கு முன் அனுபவம் இல்லாமலும், தமிழகத்தை சாராதவரையும் நியமித்திருப்பது அதிர்ச்சி அளிக்கிறது.
தமிழ்நாடு அரசு டெல்லி பிரதிநிதி பொறுப்பில் இருப்பவர்தான் மாநில அரசுக்கும், ஒன்றிய அரசுக்கும்இடையில் தொடர்பாளராக இருக்கக்கூடியவர். தமிழ்நாட்டின் தேவைகளை ஒன்றிய அரசிடம் எடுத்துச் சொல்லி கேட்டு பெறக் கூடியவர். தமிழன் என்ற உணர்வோடு இருப்பவர்களால் தான் அந்தப் பணிகளை மனமார, ஆத்மார்த்தமாக செய்ய முடியும். கிராமத்தில் ஒரு பழமொழி சொல்வார்கள் “சிறுபிள்ளை வைத்த வெள்ளாமை வீடு வந்து சேராது” என்பார்கள். த.வெ.க. அரசின் ஒவ்வொரு செயலும் இது போலத்தான் உள்ளது.
குறிப்பாக கர்நாடக அரசுக்கும் நமக்கும் காவிரியின் குறுக்கே மேகதாது அணைக்கட்டும் விவகாரம் ஒவ்வொரு தமிழருக்கும் உணர்ச்சிபூர்வமான நிலையில் இருக்கும் பொழுது கர்நாடக மாநிலத்தை சேர்ந்த ஒருவரை இந்த உயரிய பொறுப்பில் நியமித்திருப்பது தமிழக மக்களின் உணர்வை புண்படுத்தும் செயலாக உள்ளது. திரைப்படத் துறையை விட்டு தமிழகத்தின் வளர்ச்சியில் என்ன செய்யலாம் என்ற சிந்தனையோடுசெயலாற்றினால் தான் தமிழகம் வளம் பெறும்.
எனவே டெல்லி சிறப்பு பிரதிநிதியை உடனடியாக திரும்பப் பெற்று தகுதி உள்ள தமிழரை தமிழ்நாட்டின் நலன் கருதி
நியமிக்க கொங்குநாடு மக்கள் தேசிய கட்சி சார்பில் வலியுறுத்தி கேட்டுக் கொள்கிறேன்.
இவ்வாறு அவர் தமது அறிக்கையில் கூறியுள்ளார்.