சென்னை, ஜூன் 30–
“ஆட்சி மாற்றம் நிகழ்ந்த ஒரே மாதத்திற்குள்ளேயே, தமிழ்நாடு அதலபாதாளத்திற்குப் போகும் சூழ்நிலை ஏற்பட்டிருக்கிறது” என்றும், “தமிழ்நாட்டைக் காக்கும் பொறுப்பும் கடமையும் தி.மு.கழகத்திற்குத்தான் அதிகமாக இருக்கிறது” என்றும் கழகத் தலைவர் மு.க.ஸ்டாலின் அவர்கள், சென்னை, வானகரத்தில் நேற்று முன்தினம் முன்னாள் அமைச்சர் பெஞ்சமின் தலைமையில் 5 ஆயிரத்துக்கும் மேற்பட்டோர் தி.மு.கழகத்தில் இணைந்த நிகழ்வில் உரையாற்றுகையில் குறிப்பிட்டார்.
இந்நிகழ்வில் கழகத்தில் இணைந்தவர்களை வரவேற்று கழகத் தலைவர் அவர்கள் ஆற்றிய உரை வருமாறு:–
தாய்க் கழகமாம் நம்முடைய திராவிட முன்னேற்றக் கழகத்தில் மகிழ்ச்சியோடு, உறுதியோடு, உற்சாகத்தோடு வந்து இணைந்திருக்கும் உங்கள் அனைவரையும் முதலில் வருக! வருக! என நான் வரவேற்கக் கடமைப்பட்டிருக்கிறேன். தலைமைக் கழகத்தின் சார்பில் தலைமைத் தொண்டனாக உங்கள் அனைவரையும் நான் வரவேற்கக் கடமைப்பட்டிருக்கிறேன்.
கலைஞர் அரை நூற்றாண்டு காலம்
தாங்கிப் பிடித்த இயக்கம்!
எழுபத்தைந்து ஆண்டுகளைக் கடந்து, பவள விழா கண்ட திராவிட முன்னேற்றக் கழகத்திற்கு நீங்கள் எல்லாம் வந்திருக்கிறீர்கள். ஒரு முறை, இரண்டு முறை அல்ல; ஆறு முறை தமிழ்நாட்டை ஆட்சி செய்து, அனைத்து வகைகளிலும் இந்த மாநிலத்தை வளர்த்தெடுத்த திராவிட முன்னேற்றக் கழகத்திற்கு நீங்கள் எல்லாம் வந்திருக்கிறீர்கள். நவீனத் தமிழ்நாட்டைக் கட்டமைத்த சிற்பியான முத்தமிழறிஞர் தலைவர் கலைஞர் அவர்கள், அரை நூற்றாண்டு காலம் தாங்கிப் பிடித்த தனிப்பெரும்இயக்கத்திற்கு நீங்கள் எல்லாம் வந்திருக்கிறீர்கள்.
எம்.ஜி.ஆர். பொருளாளராக
இருந்த இயக்கம் இது!
அதுமட்டுமல்ல, மக்கள் திலகம்
எம்.ஜி.ஆர். அவர்கள் இருந்த கழகத்திற்கு வந்திருக்கிறீர்கள். அதுமட்டுமா, அவர் பொருளாளராக இருந்து செயல்பட்ட இயக்கத்திற்கு நீங்கள் வந்திருக்கிறீர்கள். உதயசூரியன் சின்னத்தில் போட்டியிட்டுத்தான் அவர் முதன்முதலில் சட்டமன்ற உறுப்பினராக வெற்றி பெற்றார்.
தனிக்கட்சி கண்ட பிறகும், தலைவர் கலைஞர் அவர்களைச் சட்டமன்றத்தில்ஒருவர் பேரைக் குறிப்பிட்டுப் பேசியபோது, அன்றைக்கு சட்டமன்றத்தில் முதலமைச்சராக இருந்த எம்.ஜி.ஆர். அவர்கள், அதைக் கண்டித்தார். என்ன சொல்லிக் கண்டித்தார் தெரியுமா? “உங்களுக்கு நான் தலைவராக இருக்கலாம்; ஆனால் எனக்குத் தலைவர் கலைஞர்தான்” என்று சொல்லி, அந்த வார்த்தையை வாபஸ் வாங்கச் சொன்னார். இது வரலாறு! (கைதட்டல்)
‘நான் நடித்த நாடகத்திற்குத்
தலைமையேற்றார் எம்.ஜி.ஆர்’!
எனக்கு என்ன பெருமை என்றால், நான் பள்ளிக்கூடத்தில் மாணவனாக படித்துக் கொண்டிருந்தபோது, சென்னை – சைதாப்பேட்டைப் பகுதியில், ஒரு பிரச்சார நாடகம் நடத்தினேன். அந்த நாடகத்திற்கு யார் தலைமை என்றால், மக்கள் திலகம் எம்.ஜி.ஆர். அவர்கள். அவரே நேரடியாக அந்த நாடகத்தைப் பார்க்க வந்தார்.