#Title

அன்றும், இன்றும், என்றென்றும் அவரே ஆள்கிறார்!

த மிழ்நாட்டில் தேர்தல் முடிந்து, அறுதிப் பெரும்பான்மை கிடைக்காத நிலையிலும், ஆயாராம், காயாராம் கட்சிகளின் அந்தர்பல்டி நிலைகளால் எப்படியோ தப்பித்தோம் பிழைத்தோம் என்று ஆட்சியமைத்து நாற்பத்தைந்து நாட்களை நகர்ந்திவிட்டது ஆளுங்கட்சி.

தேர்தல் அறிக்கையில் அவிழ்த்து விட்ட வாக்குறுதிகளை நிறைவேற்ற வக்கற்ற, செயல்திறனற்ற நிலையில் மூச்சு முட்டித்திணருகிறது இந்த மைனாரிட்டி அரசு.

நமது திராவிடப் பேரரசர் தளபதியவர்களின் ஆட்சியில் மக்களுக்குப் பயனளித்து வந்த நலத்திட்டங்களுக்கு புதிய நாமகரணம் சூட்டி, தங்களின் சிந்தனையில் உதித்த சீர்மிகு மக்கள் நலத்திட்டங்கள் இவையென தம்பட்டம் அடித்துக் கொள்கின்றனர்.

நாட்டில் எங்கும் கொலை, கொள்ளை, பாலியல் வன்முறைகள், தொடர்மின்வெட்டு என நாளும் மக்கள் நடுக்கமுடன் இருட்டில் தவிக்கின்றனர்.

இதை கண்காணித்து மக்கள் கவலையை போக்க வேண்டிய அரசும், அரசுப் பிரதிநிதிகளும் ரீல்ஸ் அரசியல் செய்து, முன்னுக்குப் பின் முரணாகப் பேசி, பொதுமக்களின் எரிச்சலுக்கு ஆளாகி வருகின்றனர்.

மந்திரிக்கழகு வரும்பொருள் உரைத்தல் என்பதுபோல் அல்லாமல், யாருக்கும் அரசுக்கு அறிவுரையோ, ஆலோசனையோ சொல்லும் திறமையில்லை.

சுற்றுச்சூழல் துறையை சுற்றுலா துறை எனும் ஆஷாடபூதிகள் தான் அங்கு அமைச்சர்கள்.

தேர்தல் முடிவுகளுக்கு பிறகு ஆட்சி அமைக்க மெஜாரிட்டி இல்லாத நிலையில் எதிரணியில் வெற்றி பெற்ற, தனது சொந்த கட்சி வேட்பாளர்களையே தோற்கடித்த கட்சிகளோடு திடீர் உறவு.

அதுபோல தி.மு.க. தலைவரின், கழக இளைஞரணிச் செயலாளர் உதயநிதி அவர்களின் கடின உழைப்பால், மண்டலச் செயலாளர்கள், மாவட்டச் செயலாளர்கள், ஒன்றிய, நகர, பகுதி, பேரூர், கிளைச் செயலாளர்கள், கழக சார்பு அணிகளின் நிர்வாகிகள், கழகத்தின் மூத்த முன்னோடிகள், மகளிரணித் தொண்டர்க ளின் பெரும் ஒத்துழைப்பால் கூட்டணி தர்மம் என்ற சொல்லிற்கு குந்தகம் விளைவிக்காமல் பணியாற்றியதால் பெற்ற வெற்றியை விரலில் இட்ட மை கூட காய்வதற்கு முன்பே காய் நகர்த்தி கள்ள உறவு கொண்ட காங்கிரஸ்!

நாங்கள் தி.மு.க. கூட்டணியில் தான் இருக்கிறோம். ஆனால் தற்காலிக ஆதரவு மட்டுமே தருகிறோம் என்ற கம்யூனிஸ்ட் கட்சியினர். மாப்பிள்ளை அவர்தான். ஆனால் அவர் போட்டிருக்கும் சட்டை எங்களுடையது என்பது போல.

ஜனாதிபதி ஆட்சி வந்துவிடக் கூடாது. அது ஜனநாயகத்திற்கு கேடு , ஆட்சிக்கலைப்பை அனுமதிக்க முடியாது என்று ஜனநாயக தூதுவர்களாக தங்களைக் காட்டிக் கொண்டு, தங்களுக்கு வெற்றியை தேடித்தந்த தலைவரை மறந்து, அல்லும், பகலும் அயராது உழைத்த தி.மு.க. தொண்டர்களின் முகங்களை மறந்து விட்டு, முழுவதுமாகப் புதைந்து போனார்கள் பணம், பதவி எனும் போதை தலைக்கேறி.

கிருஸ்தவ வேத நூலான பைபிளில் இயேசு கிறிஸ்துவின் 12 சீஷர்களில் யூதாஸ் காரியேத்து அவரை முத்தமிட்டு அடையாளமிட்டு காட்டிக் கொடுத்தான். பேதுரு என்பவன் அவருக்கும் எனக்கும் சம்மந்தமில்லை. நான் அவரை அறியேன் என்று மறுத்து இயேசு கிறிஸ்து சிலுவையில் அறையப்பட காரணமானான். என்று வருகிறது.

ஆனால் இந்த இந்தியா கூட்டணியில் இருக்கும் ஒரு சிலரைத்தவிர எல்லோருமே காட்டிக்கொடுத்ததை போன்ற குற்றத்தை, கொடுஞ்செயலை புரிந்தனர்.

இருந்து விட்டுப்போகட்டுமே!

தமிழ்நாடு இன்னும் 20 ஆண்டுகள் பின்னோக்கி போகுமே என்ற கவலையை தவிர நமது தலைவர், திராவிடப் பேரரசர் அவர்களின் தியாகம், மதிப்பு, மரியாதை குறைந்திடவா போகிறது? நாம் ஒரு போரைத்தான் இழந்தோம்! களத்தையல்ல!

சட்டமன்றத்தில் முதல்வர் பேரை உச்சரிக்கும் பேரவைத் தலைவரின் உதடுகளில் ஸ்டாலின் என்றே வந்து அதை சாமார்த்தியமாக சமாளித்துக் கொண்டார்.

உயர் கல்வித்துறை அமைச்சர் விஸ்வநாதன் ஒரு நிகழ்ச்சியில் இத்தகைய சாதனைகளை செய்தவர் நமது முதல்வர் ஸ்டாலின் என்றே சொல்கிறார்.

இப்படியெல்லாம் எதிர் நிலையில் உள்ளோரின் உள்ளத்திலும் யதார்த்தமாக இன்னும் முதல்வராக நிலைத்திருக்கிறார் நமது கழகத் தலைவர் அவர்கள்.

போதிய பெரும்பான்மை இன்னும் சந்தேகத்திற் கிடமின்றி அமையவில்லை என்ற அச்சத்தில் எதிரணியில் உள்ளவர்களை பேரம் பேசி , பதவியாசை காட்டி, பணியவைத்து, அவர்கள் பெற்ற வெற்றியை ராஜினாமா செய்யச் செய்து, தனது இயக்கத்தில் சேர்த்துக் கொள்ளும் கேவலங்களை இந்த ஆட்சி அரங்கேற்றி வருகிறது.

அதுகூட பாருங்கள். உலக அரசியல் வரலாற்றில் வெற்றி பெற்ற ஒருமாதத்திற்குள் தனது பதவியை ராஜினாமா செய்பவரும், சிரித்து, சபாநாயகரும் பேரின்ப சிரிப்புடன் பெற்றுக் கொண்டு ஊடகங்களுக்கு அந்தப் பட்டங்களை வழங்கிய கேலிக்கூத்து வேறெங்கும் நடந்ததில்லை.

நாம் கூடத்தான் ராஜினாமா செய்தோம்.

2004 ல் வாஜ்பாய் அவர்களின் ஒன்றிய அமைச்சர வையில் தலைவர் கலைஞர் அவர்களின் கட்டளையை ஏற்று,, ஒன்றிய காபினெட் அமைச்சர் பதவிகளை தூக்கியெறிந்து மாண்புமிகு டி ஆர். பாலு, மாண்புமிகு ஆ. ராசா ஆகிய இருவர் பாராளுமன்ற கட்டிடத்திலிருந்து வெளியே வரும் புகைப்படக் காட்சியை தலைவர் கலைஞர் அவர்கள் முரசொலியில் வெளியிட்டு இருவரையும் உச்சி முகந்து பாராட்டி எழுதினார்.

ஆனால் இங்கோ பதவி போனால் பல்ஸ் போய்விடுமோ என்ற பயத்தில பலர் பல்லிளித்து பனையூர் பக்கம் பறக்கின்றனர்.

அங்கே ஆடுமாடுகளை தொட்டியில் அடைப்பது போல் தள்ளுமுள்ளு.

அப்புறம் தான் தெரிகிறதாம், புத்தி வருகிறதாம் சொந்தக் கட்சியிலேயே சுயமரியாதையோடு இருந்திருக்கலாமே என்று.

இந்தக்கேவலங்கள் மற்ற, மற்ற இயக்கங்களில் நடைபெறலாம்.

ஜயா பெரியாரின் வரலாற்றையறிந்து, அண்ணாவின் அன்புமொழி கேட்டு, தலைவர் கலைஞரின் கன்னித்தமிழ் கேட்டு, உயிரனைய தளபதியவர்களின் அயராத உழைப்பில் உள்ளம் கொள்ளை கொண்ட தொண்டன் உண்மைத் தலைவர் தளபதியவர்களின் தலைமையிலே, வாழ்ந்தா லும், வாழ்விழந்து வீழ்ந்தா லும் இறுதிவரை, உறுதியாக இருப்போம் எனக் கண்ணீர் மல்க தலைவரின் கரங்களைப் பிடித்து ஆறுதல் சொல்கின்றனர்.

அறிவாலயம் பக்கம் வந்து பாருங்கள்.

ஆட்சி இல்லை. அதிகாரம் இல்லை அவரிடம்.

ஆனாலும் அவர் உள்ளே நுழையும்போது ஒரு பெருங்கூட்டம் தளபதியவர்கள் வாழ்க! என்றும் எங்கள் முதல்வர் வாழ்க! என எழுப்பும் வாழ்த்தொலி முழக்கங்களால் தலைவர் அவர்கள் உத்வேகம் பெறு கிறார்.

உள்ளே வந்து சந்திக்கும் உடன்பிறப்புகள், மூத்த முன்னோடிகள், கழக முன்னணியினர், மகளிர், மாணவர்கள், இளைஞர்கள் என ஆறுதல் சொல்ல வரும் எல்லோருக்கும் அவரும் தைரியம் சொல்கிறார். நானிருக்கிறேன்! என்று.

சினிமாக்காரனின் சின்ன புத்திக்கு இதுவெல்லாம் தெரியாது.

ஆமாம். அவர் இருக்கிறார். எங்கும் நிறைந்தி ருக்கிறார்!

மகளிர் மாத உரிமைத்தொகையில் அண்ணனாக அவர் இருக்கிறார்!

புதுமைப்பெண் திட்டத்தில் பயன்பெறும் மகளின் இதயத்தில் தகப்பனாக இருக்கிறார்!

தமிழ்ப் புதல்வன் திட்டத்தில் பயனுரும் மாணவனின் மனதில் ரோல் மாடலாக அவர் இருக்கிறார்!

மக்களைத்தேடி மருத்துவத்தில் பலரின் காயங்களுக்கு மருந்தாக அவர் இருகிறார்.

காலை உணவு திட்டத்தில் பிள்ளைகளின் பிடி சோற்றில் அவர் இருக்கிறார்.

விடியல் பயணத்தில் பயணிக்கும் தாய்மார்களின் உற்ற தனையனாக அவர் உடன் பயணிக்கிறார்.

ஏழை எளியோர் பெறும் ரேஷன் பொருட்களைக் கண்டு கசிந்துருகும் ஏழைகளின் கண்களில் ஆனந்தக் கண்ணீராய் அவர் இருக்கிறார்.

இந்த திட்டங்களில் எதையும் அப்புறப்படுத்தும் தைரியம், துடுக்கு எவருக்கும் இங்கு எழப்போவதில்லை!

இவையெல்லாம் ஏழைகள் இதயம் இன்புற, மக்களின் மனம் மகிழ, திராவிடப் பெருவேந்தர் முத்துவேல் கருணாநிதி ஸ்டாலின் எனும் மகத்தான தலைவர் கொண்டு¬¬¬ வந்த திட்டங்கள்!

400 ஆண்டுகள் கடந்தும் தாஜ்மகால் என்றதும் அதைக் கட்டிய ஷாஜகான் நினைவிற்கு வருவதுபோல்!

1000:ஆண்டிற்கும் மேலான தஞ்சை பெருவுடையார் கோயில் என்றதும் அதை உலகமே வியக்கும் வண்ணம் எழுப்பிய மாமன்னன் இராஜராஜ சோழன் பெயர் நிலைத்துநிற்பதுபோல் தமிழ்நாட்டில் இந்த திட்டங்கள் தொடரும் வரை தமிழ்நாட்டை தளபதியவர்கள் தான் ஆள்கிறார்.!

அன்றும், இன்றும், என்றும், அவரே ஆள்கிறார்!