சென்னை, ஜூலை1 –
கழக மாணவரணி சார்பில் தமிழக வெற்றி கழக அமைச்சர் சரத்குமார் பொதுவெளியில் போதைப் பொருள் உபயோகப்படுத்தியதை கண்டித்து ஒருங்கிணைந்த சென்னை. மாவட்ட மாணவர் அணி சார்பில் சென்னை , எழும்பூர், ராஜரத்தினம் விளையாட்டு மைதானம் அருகில் 29.6.2026 திங்கட்கிழமை காலை 9.30 மணி அளவில் நடைபெறவிருந்த ஆர்பாட்டம் முறையாக அனுமதி கேட்ட போதும் அனுமதி மறுக்கப்பட்ட நிலையில்100க்கும் மேற்பட்ட கழகத் தோழர்களை அதிகாலையில் வலுக்கட்டாயமாக கைது செய்ததால் காலை 10.00 மணியளவில் சென்னை கிழக்கு மாவட்ட கழகச் செயலாளர் பி.கே.சேகர்பாபு எம்.எல்.ஏ அவர்கள் தலைமையில் மேயர் பிரியா ராஜன்,கழக மாணவர் அணி செயலாளர் ஈரோடு வீரமணி, கழக மருத்துவ அணிச் செயலாளர் டாக்டர் நா. எழிலன், தமிழன் பிரசன்னா மற்றும் 2500க்கும் மேற்பட்டோர் புரசைவாக்கம் டவுட்டன் பகுதியில் ஊர்வலமாக சென்று சாலையை மறித்து ஆர்ப்பாட்டத்தில் ஈடுபட்டனர்.
234 பெண்கள் உள்பட 690 பேர் கைது!
இதில் 690 பேரை போலீசார் கைது செய்தனர். அதில் 234 பெண்கள் கைதாயினர்.
இந்த ஆர்ப்பாட்டத்தில் தலைமை செயற்குழு உறுப்பினர்கள் பி.கே.மூர்த்தி, கே.எஸ்.எம்.நாதன், கே. சந்துரு, சி.மகேஷ் குமார், பகுதி செயலாளர்கள் ஐசிஎப் வ.முரளிதரன், எ.நாகராஜன், செ.தமிழ்வேந்தன், எம்.சாமிகண்ணு, வே.வாசு, கோபி கூ.பீ.ஜெயின், ஜோசப் சாமுவேல், டி.எஸ்.பி. ராஜகோபால், எம்.டி.ஆர்.நாகராஜ், எஸ்.ராஜசேகர், எஸ்.முரளி மற்றும் மாமன்ற உறுப்பினர்கள், வட்டக் கழகச் செயலாளர்கள், மாவட்ட / பகுதி / வட்ட அமைப்பாளர்கள், துணை அமைப்பாளர்கள்
கலந்துகொண்டு ஆர்ப்பரித்தனர்.
இதில்சென்னை கிழக்கு மாவட்ட கழக செயலாளர் பி.கே.சேகர்பாபு எம்.எல்.ஏ. அவர்கள் பத்திரிகையாளர்களுக்கு அளித்த பேட்டி வருமாறு:–
ஸ்டேடியத்தில் அமர்ந்து கிரிக்கெட்போட்டியைப் பார்த்துக் கொண்டிருந்தபோது, போதை மாத்திரையைப் பொடியாக்கி அதனை நுகரும் பணிகளில் அமைச்சர் ஈடுபட்டிருந்ததை, தமிழ்நாட்டின் உள்ள அனைத்து ஊடகங்களும், அதேபோன்று யூடியூப் போன்ற தனியார் இணையச் சேனல்களும் என்று ஒட்டுமொத்தத் தமிழ்நாடும் வெளியிட்டிருந்த வேளையில், அதுகுறித்து அரசின் கவனத்தை ஈர்க்கவும், சம்பந்தப்பட்ட அமைச்சர் மீது தகுந்த நடவடிக்கை எடுக்கவும், திராவிட முன்னேற்றக் கழக மாணவரணி சார்பில் போராட்டம் அறிவிக்கப்பட்டிருந்தது.
போராட்டத்திற்கு முறையாக
அனுமதி கேட்டோம்!
இன்றைக்கு அந்தப் போராட்டம், சென்னை மாவட்டத்தில் ஒரே இடத்தில் ராஜரத்தினம் ஸ்டேடியம் அருகில் போராடுவதற்கு – ஆர்ப்பாட்டம் நடத்துவதற்கு ஏற்பாடு செய்திருந்தோம். அது அனுமதிக்கப்பட்ட இடம். அது குறித்து முறையாக நேற்றைக்கே மனு அளித்திருந்தோம்.
நாங்கள் முதலில் மாவட்ட ஆட்சியர் அலுவலகம் அருகில் அனுமதி கேட்டிருந்தோம். ஆனால், அங்கு கம்யூனிஸ்ட் பேரியக்கத்தின் ஆர்ப்பாட்டம் இருப்பதால், “நீங்கள் ராஜரத்தினம் ஸ்டேடியத்தில் நடத்திக் கொள்கிறீர்களா?” என்று கேட்டார்கள். நாங்களும், ராஜரத்தினம் ஸ்டேடியத்தில் நடத்திக் கொள்கிறோம் என்று ஒப்புதல் அளித்தோம்.
இன்று காலையில் அது சம்பந்தமான மேடை அமைக்கும் பணிகள் தொடங்குகிறபோது, இருபத்தைந்திற்கும் மேற்பட்ட காவல்துறையினர், குறிப்பாக, எழும்பூர் காவல்துறை ஆணையாளர் ராஜேந்திரன், அந்தப் பகுதியின் காவல்துறை உதவி ஆணையாளர் ஜெகதீஷ், ஒரு முன்னாள் சட்டமன்ற உறுப்பினர், வழக்கறிஞர் என்று கூடப் பாராமல் கழுத்தில் கையை வைத்து வாகனத்தில் ஏற்றுகின்றார்கள்.
திராவிட மாடல் நாயகன் வழியில்
எங்கள் போராட்டம் தொடரும்!
அந்த மேடை அமைப்பதற்கும், ஒலி–ஒளி அமைப்பதற்கும் கொண்டு வரப்பட்டிருந்த வாகனங்களைப் பறிமுதல் செய்து கொண்டு சென்றதுடன், மேடை அமைக்கும் பணியில் ஈடுபட்டிருந்த தொழிலாளர்களையும் கைது செய்திருக்கின்றார்கள்.
திராவிட முன்னேற்றக் கழகம் என்ன தீவிரவாத இயக்கத்திற்கு ஆதரவாகவா போராட்டக் களத்தில் இருக்கிறது? நியாயமான கோரிக்கைகளை வற்புறுத்தவும், கேட்காத காதினராக இருக்கும் இந்த அரசாங்கத்தின் செவிகளுக்கு சென்று சேர்வதற்கும், கவனத்தை ஈர்ப்பதற்காகவும்தான் இந்த ஆர்ப்பாட்டம்! இது வெறும் ‘டிரெய்லர்’தான்.
தமிழ்நாடு முன்னாள் முதலமைச்சர் அவர்களின் கட்டளையை ஏற்று, ஒரு இடத்தில் நடத்த இருந்த ஆர்ப்பாட்டத்தை, சென்னையில் மூன்று இடங்களில் மாற்றி, கைது நடவடிக்கைகளில் ஈடுபட்டிருப்பது எங்களது இயக்கத்திற்கு மேலும் உத்வேகத்தை அளிக்கும். அடிக்க அடிக்க எழுகின்ற பந்தாகவும், அரைக்க அரைக்க மணக்கின்ற சந்தனமாகவும், தீட்டத் தீட்ட ஜொலிக்கின்ற வைரமாகவும் திகழ்பவர் திராவிட மாடல் ஆட்சியின் நாயகன். நெருக்கடியையே சிரித்து முகத்துடன் 24 வயதில் சந்தித்தவர். அவருடைய படை, சிறைக்கு அஞ்சாது. கொடுஞ்சிறைச்சாலை என்றாலும் சரி, அல்லது காவல்துறையின் தடியடிப் பிரயோகம் என்றாலும் சரி, சிரித்த முகத்தோடு சிறைச்செல்ல தயார், தயார், தயார்!
இந்த அரசுதான் எங்களை
போராட்டத்திற்கு தள்ளியுள்ளது!
தமிழ்நாடு அரசு எங்களை எப்படி அணுகுகிறதோ, அதே போன்று தமிழ்நாடு அரசிடம் எங்களுடைய அணுகுமுறை இருக்கும் என்பதைத் தெரிவித்து, இந்தப் போராட்டம் தொடரும், தொடரும், தொடரும்!
செய்தியாளர்:–காவல்துறை, ஐந்து முழு வேலை நாட்களுக்கு முன்பாக போராட்டத்திற்கு உண்டான அனுமதி கேட்க வேண்டும். அவ்வாறு கேட்காததனால்தான் நாங்கள் அனுமதி கொடுக்கவில்லை என்று சொல்கிறார்கள்?
பி.கே.சேகர்பாபு:–நான் 45 ஆண்டு காலம் அரசியல் இயக்கத்தில் பயணிப்பவன். இதுபோன்ற போராட்டங்களில் ஆளுங்கட்சி, எதிர்க்கட்சி என இரண்டிலும் இருந்தவன். காவல்துறை நினைத்தால், ஒருநாள் அன்றே கூட அனுமதி கேட்டால் கொடுத்து நடைபெற்ற போராட்டங்கள் ஏராளமாக உள்ளன. எனவே மறுக்கிறோம் என்றால்,முறையாக எங்களுக்குத் தகவல் தெரிவித்திருந்தால், நாங்கள் நீதிமன்றத்தை நாடி இருப்போம் அல்லது நீங்கள் சொல்வது போன்று சட்டத்திற்கு உட்பட்டு கூட நாங்கள் வந்திருப்போம்.
எங்கள் அனுமதி மீது எந்தவிதமான தகவலையும் தெரிவிக்காமல், காலையிலே மேடை அமைப்பவர்களைக் நீங்கள் கைது செய்யும் நடவடிக்கையில் ஈடுபட்டதால்தான், தற்போது இங்கு நாங்கள் சாலை மறியல் செய்ய வேண்டிய சூழ்நிலைக்குத் தள்ளப்பட்டுள்ளோம். போராட்டக் களத்திற்கு தி.மு.கவாகச் செல்லவில்லை; இந்த அரசுதான் எங்களைப் போராட்டக் களத்திற்கு தள்ளியிருக்கிறது.
மக்களுக்கான போராட்டம் இது!
செய்தியாளர்:–தி.மு.க. எப்போதும் மக்கள் பிரச்சினைகளுக்காக போராடுகிற இயக்கம். மக்களுக்கு பாதிப்பில்லாமல் இருக்கும். ஆனால் இன்றைக்கு, சாலை மறியலினால் ஒரு மணி நேரத்திற்கு மேலாக இந்தச் சாலையில் போக்குவரத்து நெரிசல் இருக்கிறது என்பது குறித்து?
பி.கே.சேகர்பாபு:–இதுவும் மக்களுக்காகத்தான் நாங்கள் போராடிக் கொண்டிருக்கிறோம். முதலமைச்சர் வரும்போது சாலையில் ஏற்படும் போக்குவரத்து நெரிசலை விடவும், கரூரில் ஏற்பட்ட சம்பவத்தில் 41 உயிர்கள் பலியானதை விடவும், இது ஒன்றும் பெரியதல்ல. தமிழ்நாட்டின் மனித வளத்தைக் காக்கவும், தமிழ்நாட்டின் போதை கலாச்சாரத்தை ஒழிக்கவும் தான் நாங்கள் போராடுகிறோம்.
தமிழ்நாடு அமைச்சரவையில் இருக்கும் ஒரு அமைச்சரே போதை பழக்கத்திற்கு ஆளாகியுள்ளார். கடந்த இரண்டு நாட்களுக்கு முன்பு ‘மாரத்தான்’ ஓடியதில் என்ன பயன்? தன் அமைச்சரவையில் இருக்கும் போதை ஆசாமிகளுக்கே அறிவுரை சொல்ல இயலாத முதலமைச்சர், போதை ஒழிப்பிற்காக ஓட்டப்பந்தயம் நடத்தி என்ன பலன்? அதற்காகத்தான் மக்களிடையே விழிப்புணர்வுக்கு இந்தக் கண்டன ஆர்ப்பாட்டம் நடத்தப்படுகிறது.
அச்சுறுத்தலுக்கு
அஞ்ச மாட்டோம்!
இதுவும் மக்களுக்குத் தொந்தரவு கொடுப்பதற்காக அல்ல. நாங்கள் கேட்ட இடத்தில் முறையாக அனுமதித்திருந்தால், முழக்கங்களை எழுப்பிவிட்டு கலைந்து சென்றிருப்போம்.
திராவிட முன்னேற்றக் கழகம் காட்டாற்று வெள்ளம். பல தடைகளைத் கடந்து வரும் இயக்கம். இது நீரோடை, தொடர்ந்து ஓடிக்கொண்டே இருக்கும்.
அச்சுறுத்தல்களாலோ, மிரட்டல்களாலோ அடி பணிய வைக்க முடியாது என்பதற்கு, இது ஒரு ‘டிரெய்லராகக்’ இன்றைக்கு காட்டியிருக்கிறோம்.
அமைச்சர் பதவி விலக வேண்டும்!
செய்தியாளர்:–அந்த அமைச்சர் மீது என்ன நடவடிக்கை எடுக்க வேண்டும் என்று எதிர்பார்க்கிறீர்கள்?
பி.கே.சேகர்பாபு:–நிச்சயமாக அவரை பதவி நீக்கம் செய்ய வேண்டும். அது ஒரு பாடமாக இருக்க வேண்டும். அவரை மருத்துவப் பரிசோதனைக்கு உட்படுத்த வேண்டும். அவர் ‘கொக்கைன்’ உபயோகப் பயன்படுத்தியிருக்கிறாரா என்று ஆய்வறிக்கை கேட்க வேண்டும். இந்தப் பாடம் தமிழ்நாட்டில் இருக்கும் அரசியல்வாதிகளுக்கும், மக்களுக்கும் ஒரு பாடமாக அமையும் என்பதால் தான் இதை வற்புறுத்துகிறோம்.
நேற்று முன்தினம் மாலை விடுதலை ஆன பின் முன்னாள் அமைச்சர் பி.கே.சேகர்பாபு செய்தி யாளர்களிடம் கூறியதாவது : –
புதிதாக ஏற்பட்டுள்ளதற்குறி அரசாங்கத்தில் தேர்ந்தெடுக்கப்பட்டிருக்கின்ற சட்டமன்ற உறுப்பினர்கள் நிலையும் அறியாமல், தேர்தலில் அவசர கோலத்தில் சட்டமன்ற உறுப்பினராகவும் தேர்ந்தெடுக்கப்பட்டதன் பலனாக இன்றைக்கு ஒரு அமைச்சரின் பின்னணியைப் பார்த்தால் ஒரு குடும்பத்தையே கையில் உருட்டுக்கட்டை வைத்து அடித்து நொறுக்குகின்ற அமைச்சர்,
ஒரு அமைச்சர் பார்த்தால் குழந்தையின் காலை பிடித்து பாலியல் சீண்டல் செய்யக்கூடிய அமைச்சர்,
ஒரு அமைச்சரைப் பார்த்தால் வாயைத் திறந்தாலே அண்டப் புளுகு, ஆகாசப் புளுகு என்பார்கள். ஆனால் தார்ப்பாயில் வடிகட்டி புளுகிக் கொண்டு இருக்கின்ற அமைச்சர் மார்டின் மாஃபியா.
அடிக்கின்ற மழையில் கரைந்து போகின்ற மண்ணாங்கட்டிக் கூட்டம் நாங்கள் அல்ல. அடிக்கின்ற தூசி காற்றால் பறக்கின்ற பேப்பர் அல்ல. கொள்கையால் உயர்ந்து நிற்கின்ற இமயத்தின் உயரத்தைக் கொண்ட உறுதிமிக்க தலைவர் முன்னாள் தமிழ்நாடு முதலமைச்சர் எங்கள் உயிரினும் மேலான அன்பு தலைவர் தளபதி அவர்கள் இயக்குகின்ற இயக்கம் என்பதால் இந்த இயக்கத்தை தொட்டுப் பார்க்கவும் ஆட்டிப் பார்க்கவும்அசைத்துப் பார்க்கவும் முடியாது என்பதை இந்த போராட்டத்தின் வாயிலாக தெரிவித்துக் கொள்கிறோம்.
இவ்வாறு பி.கே. சேகர்பாபு எம்.எல்.ஏ. பேட்டியளித்தார்.