‘200ரூபாய்உ.பி.க்கள்’ என்று எகத்தாளம் பேசிய விஜய்யின் விசில் ரசிகக் கூட்டத்திற்கும், த.வெ.க அரசுக்கும் சரியான பதிலடியைத் தந்துள்ளது தி.முக. மாணவரணி. “நாங்கள் இரண்டாயிரம் ஆண்டு கால ஆரிய ஒடுக்குமுறைக்கு எதிரான திராவிடத் தீப்பிழம்புகள். உங்களைப் போல ஓடி ஒளிகிற தலைவனைக் கொண்ட கூட்டமல்ல” என்பதை தி.மு.க. உடன்பிறப்புகள், ‘பவுடர்’ அமைச்சர் மீதான நடவடிக்கையை வலியுறுத்திய வலிமைமிகுந்த போராட்டத்தின் மூலமாகத் தமிழ்நாடு
முழுவதும் மெய்ப்பித்துள்ளனர்.
பேரறிஞர் அண்ணா காலத்தில் 1953ஆம்
ஆண்டில் மும்முனைப் போராட்டம் அறிவிக்கப்
பட்டது. களம் கண்டனர் கழகத்தினர். அண்ணா உள்ளிட்ட கழகத்தின் நிர்வாகிகள், போராட்டத்திற்கு
முன்னதாகவே கைது செய்யப்பட்டு சிறையில் அடைக்கப்பட்டார்கள். மூன்றாவது முனையான கல்லக்குடிப் போராட்டக் களத்தில் தண்டவாளத்தில் தலைவைத்துப் படுத்து தமிழைக் காத்தவர் முத்தமிழறிஞர் கலைஞர். அவரைத் தொடர்ந்து கழகத்தின் மேலும் இரண்டு அணிகள் அங்கே களம் கண்டன. தடியடி, துப்பாக்கிச்சூடு, உயிர்ப்பலிகள் என அன்றைய காங்கிரஸ் ஆட்சியின் காவல்துறையினரின் அடக்குமுறைகளுக்கு அஞ்சாமல் மாதக்கணக்கில் சிறை கண்டனர் தி.மு.க.வினர்.
இந்தி ஆதிக்கத்தை எதிர்த்து நடந்த மொழிப் போராட்டத்தில், தமிழுக்காக உயிரைக் கொடையாக வழங்கிய தொண்டர்களைக் கொண்ட வரலாற்றுப் பெருமை தி.மு.கவுக்கு உண்டு. பாளையங்கோட்டையில் தனிமைச் சிறையை எதிர்கொண்டவர் கலைஞர். எமர்ஜென்சி எனும் ஜனநாயகத்தின் மீதான தாக்குதலை எதிர்த்து, கலைஞர் முன்னெடுத்த இந்தியாவின் இரண்டாவது சுதந்திரப் போராட்டத்தில் மிசா சட்டத்தின் கீழ் சிறையையும் சித்திரவதையையும் எதிர்க்கொண்ட நெஞ்சுறுதி மிக்க தலைவரின் தலைமையில் இயங்குகிற இயக்கம் இது. ஈழத்தமிழர் உரிமை காக்கும் போராட்டங்களிலும், இந்தித் திணிப்பை எதிர்த்து கழகம் நடத்திய சட்ட நகல் எரிப்புப் போராட்டத்திலும் கலைஞர், பேராசிரியர் உள்ளிட்ட தலைவர்களுடன் சிறை சென்றவர்தான் இன்றைய நம் கழகத் தலைவர்.
போராட்டக் களமும் சிறைவாசமும் தி.மு.க. வினருக்கு வாழ்வின் ஒரு பகுதி. பொதுவாழ்வின் விழுப்புண்கள்- வீரத்தழும்புகள். “நாங்க வீட்டைவிட்டு வெளியே வரும்போதே வாய்க்கரிசி போட்டுத்தான் வரோம்” என்று தென்சென்னை மாவட்டக் கழக முன்னாள் செயலாளர் மாவீரன் ஜெ.அன்பழகன் சொன்னது ஒவ்வொரு உடன்பிறப்பின் உள்ளத்து உணர்வாகும்.
76 ஆண்டுகால வரலாறு கொண்ட திராவிட முன்னேற்றக் கழகத்தின் அறப்போர்க் களத்தில் இரண்டு நிகழ்வுகளை இங்கே குறிப்பிட்டுச் சொல்வது
பொருத்தமாக இருக்கும். முதல் நிகழ்வு, ஈழத்தமிழர் விவகாரத்தில் கழகம் நடத்திய கண்டன ஆர்ப்பாட்டப் பேரணி.
இலங்கையில் வாழும் தமிழர்களுக்காக எவ்வித அரசியல் பலனுமின்றி உண்மையாகப் பாடுபட்ட ஒரே இயக்கம் தி.மு.கழகம் மட்டும்தான். இலங்கையில் அமைதி ஏற்படுவதற்காக, 1985ஆம் ஆண்டில் பூடான் நாட்டின் தலைநகரான திம்பு நகரில் இந்தியா முன்னெடுத்த முத்தரப்பு பேச்சுவார்த்தை பலன் தரவில்லை. பேச்சுவார்த்தையின் ஒருசார்பான முடிவை இலங்கைத் தமிழர் பிரதிநிதிகள் ஏற்கவில்லை.
பேச்சுவார்த்தை முறிந்த நிலையில், சென்னையில் தங்கியிருந்த இலங்கைத் தமிழர் தலைவர்களை இந்தியாவை விட்டு வெளியேற்ற முடிவு செய்து, முதல்கட்டமாக ஆண்டன் பாலசிங்கம், சந்திரஹாசன், சத்தியேந்திரா ஆகிய மூவரையும் நாடு கடத்தும் உத்தரவைப் பிறப்பித்த ஒன்றிய அரசு, அதை மாநிலத்தை ஆட்சி செய்த எம்.ஜி.ஆர். தலைமையிலான அ.தி.மு.க. அரசு மூலம் நிறைவேற்றத் தொடங்கியது. மூவரும் எம்.ஜி.ஆர். அரசால் கைது செய்யப்பட்ட நிலையில், நாடு கடத்தும் முடிவைக் கண்டித்து, தி.மு.க சார்பில் கண்டன ஆர்ப்பாட்டப் பேரணி நடைபெறும் என அறிவித்தார் கலைஞர்.
தலைமைக் கழகத்தின் அறிவிப்புக்கும் ஆர்ப்பாட்டப் பேரணிக்கும் இடையில் 10 மணி நேரம் மட்டுமே அவகாசம் இருந்தது. அந்த குறுகிய நேரத்திற்குள் 1985ஆம் ஆண்டு ஆகஸ்ட் 25ஆம் நாளன்று சென்னையில் 3 இலட்சம் பேர் திரண்ட மாபெரும் கண்டன ஆர்ப்பாட்டப் பேரணியை நடத்தி ஒன்றிய-–மாநில அரசுகளை நடுங்கச் செய்ததுடன், மூவரையும் நாடு கடத்தும் உத்தரவைத் திரும்பப் பெறாவிட்டால், இந்தியப் பிரதமருக்கு கருப்புக் கொடி காட்டும் போராட்டத்தை நடத்துவோம் என்று ஆர்ப்பாட்டத்தின் முடிவில் எச்சரிக்கை அறிவிப்பை கலைஞர் வெளியிட்டார்.
தமிழ்நாடு முழுவதும் ரயில் மறியல் போராட்டம் எனவும் அறிவிக்கப்பட்டது. அனைத்து ரயில்களையும் ரயில்வே நிர்வாகமே நிறுத்திவிட்டது. தி.மு.க வலிமையுடன் முன்னெடுத்த போராட்டத்தால் சந்திரஹாசன், பாலசிங்கம், சத்தியேந்திரா என்று ஒவ்வொருவர் மீதான நாடு கடத்தல் உத்தரவைத் தனித்தனியாகத் திரும்பப் பெற்றது
இந்திய ஒன்றிய அரசு.
மற்றொரு நிகழ்வு, 2012ஆம் ஆண்டு ஜூலை 4ஆம் தேதி தி.மு.க.வால் நடத்தப்பட்ட சிறை நிரப்பும் போராட்டமாகும். அப்போது செல்வி.ஜெயலலிதா தலைமையிலான அ.தி.மு.க.வின் அடாவடி அராஜக அரசு நடந்து கொண்டிருந்தது. தி.மு.க நிர்வாகிகள் மீது பொய்யான வழக்குகள் போடப்பட்டன. நில
அபகரிப்பு வழக்கு போடுவதற்காகவே தனிச் சட்டம் கொண்டு வந்தார் ஜெயலலிதா. அத்துடன் விலைவாசி உயர்வு, மின்கட்டனம்- ‘பேருந்துகட்டணம்-’ பால் கட்டணம் ஆகியவை உயர்த்தப்பட்டு பொதுமக்கள் பெரும் அவதிக்குள்ளாயினர். இவற்றைக் கண்டித்து தி.மு.க. சார்பில் சிறை நிரப்பும் மறியல்
போராட்டத்தை அறிவித்தார் கலைஞர்.
போராட்டத்தை முன்னெடுக்கும் பொறுப்பு அப்போதைய இளைஞரணிச் செயலாளரான இன்றைய கழகத் தலைவர் தளபதி அவர்களிடம் ஒப்படைத்தார் கலைஞர். கழகத்தின் அனைத்துத் தரப்பையும் அவர் ஒருங்கிணைத்தார். போராட்ட நாளன்று தமிழ்நாடே கருப்பு-சிவப்புக் கொடிக் காடாக மாறியது. தலைநகரம் சென்னையில் தளபதி தலைமையில் ஆயிரக்கணக்கான உடன்பிறப்புகள் மறியலில் ஈடுபட்டு கைதாகினர். மகளிரணியினரை மறியல் களத்தில் இறக்கி, அவர்களுடன் கைதானார் கனிமொழி கருணாநிதி எம்.பி. இளைஞரணியினர் பெருமளவில்
கைதாகினர்.
தலைவர் கலைஞரின் ஆணைக்கிணங்க, இன்றைய நம் கழகத் தலைவர் 2012ல் முன்னெடுத்த சிறை நிரப்பும் போராட்டத்தில் ஆண்களும் பெண்களுமாக ஒன்றரை இலட்சம் உடன்பிறப்புகள் தமிழ்நாடு முழுவதும் கைதாகினர். எத்தனை நாட்கள் வேண்டுமானாலும் சிறைக்குச் செல்லத் தயாராக இருக்கிறோம் என்று சொல்வது போல துணிமணி களை கைப்பெட்டிகளில் எடுத்து வந்திருந்தனர். ஆட்சியில் இல்லாவிட்டாலும், கலைஞரின் கட்டளையே ஏற்று, கழகத்தின் கடைசித் தொண்டன்கூட களம் காண்பான். சிறைக்கு அஞ்சமாட்டான் என்று அணி திரண்டு, ஜெயலலிதாவின் ஆணவத்தை நொறுக்கியது தி.மு.கழகம்.
ஜெயலலிதா அரசாங்கம் இப்படியொரு போராட்டத்தை எதிர்பார்க்கவில்லை. மாலை நெடுநேரம் காத்திருந்தனர் போலீஸ் அதிகாரிகள். எண்ணிக்கையைக் குறைத்துக் காட்ட முயற்சித்தும், 94 ஆயிரம் பேர் கைது என்றுதான் அறிவிக்க முடிந்தது. அத்தனை பேரை எந்த சிறையில் வைப்பது? தமிழ்நாட்டில் உள்ள சிறைச்சாலைகள் போதாது. அனைவரையும் விடுவிக்க உத்தரவிடப்பட்டது.
அந்த ஜெயலலிதாவை விடவும் மோசமான ஆட்சியை நடத்தி வரும் விஜய் தலைமையிலான த.வெ.க.ஆட்சியில் அமைச்சராக உள்ள சரத்குமார் என்பவர் ‘பவுடர்’ பயன்படுத்தும் ரீல்ஸ் வீடியோவை அவரே பதிவிட்டிருந்த நிலையில், தவறான முன்னுதாரணமாக உள்ள அந்த அமைச்சர் மீது நடவடிக்கை கோரி தி.மு.க மாணவரணி சார்பில் ஆர்ப்பாட்ட
அறிவிப்பு வெளியிடப்பட்டது.
ஒருநாள் இடைவெளியில், தமிழ்நாடு முழுவதும் கழக மாணவரணியினரும் கழக நிர்வாகிகளும் ஆயிரமாயிரமாய் அணி திரண்ட நிலையில், ஆர்ப்பாட்டத்திற்கு அனுமதி மறுத்தது விஜய் அரசின் காவல்துறை. எனினும், ரீல்ஸ் ஆட்சியின் அலங்கோலத்தையும் ஆபத்தையும் அதனால் தமிழ்நாடு எதிர்கொள்ளும் அவலத்தையும் முழக்கங்களாக எழுப்பினர் உடன்பிறப்புகள். அமைச்சர் மீது நடவடிக்கை எடுக்க வேண்டிய அரசு, கழகத்தினரைக் கைது செய்தது. எனினும், தமிழ்நாடு முழுவதும்
29.-6.-2026 அன்று எழுச்சியுடன் நடந்த போராட்டத்தில் கைதான உடன்பிறப்புகளின் எண்ணிக்கையைக்கண்டு மிரண்ட விஜய் அரசு, மாலையில் விடுவித்தது.
இடைப்பட்ட நேரத்தில், கழகத்தினர் அடைத்து வைக்கப்பட்டிருந்த மண்டபங்களில் கொள்கை முழக்கங்களை எழுப்பியதுடன், பவுடர் அமைச்சரின் செய்கையை ரீல்ஸ் வடிவில் வெளியிட்டு மக்களிடம் இந்த ஆட்சியின் அவலத்தை கொண்டு சேர்த்தனர். சிறைச்சாலையை பட்டிமன்ற கவியரங்க மேடைகளாக மாற்றிய அன்றைய தி.மு.க.வினரின் மரபு வழி தொடர்ச்சியை இதில் பார்க்க முடிந்தது.
ஆட்சி வரும்.. போகும்.. தி.மு.க.வினரின் கொள்கை உணர்வும் கழகத்தின் வலிமையும் நிலையானது என்பதை மாணவரணி முன்னெடுத்த
கழகத்தினரின் ஆர்ப்பாட்டம் த.வெ.க. அரசுக்கு உணர்த்தியிருக்கிறது.