தஞ்சை, ஜூலை 1 –
தஞ்சை மாவட்ட இளைஞர் அணி முன்னாள் துணை அமைப்பாளர் டி.இராஜேந்திரன் அவர்களின் மகன் டி.ஆர்.முத்து – பிரியதர்சினி இணையரின் திருமணத்தை, திருவோணம் அருகே சுக்கிரன்விடுதியில் கழக இளைஞர் அணிச் செயலாளரும் சட்டமன்ற எதிர்க்கட்சித் தலைவருமான உதயநிதி ஸ்டாலின் நடத்தி வைத்து வாழ்த்துரை வழங்கினார்.
கழக இளைஞர் அணிச் செயலாளரும் எதிர்க்கட்சித் தலைவருமான உதயநிதி ஸ்டாலின் ஆற்றிய உரையின் விவரம் வருமாறு:
தஞ்சை மாவட்டத்தின் இளைஞர் அணி துணை அமைப்பாளராகச் சிறப்பாகப் பணியாற்றிய அண்ணன் ராஜேந்திரன் அவர்களின் அன்பு மகன் தம்பி முத்து, சகோதரி பிரியதர்ஷினி இணையருடைய திருமணத்தை உங்களின் முன்னிலையில் நடத்தி வைப்பதில் மிகுந்த மகிழ்ச்சியடைகிறேன்.
திருவோணம் வடக்கு ஒன்றியக் கழகம் சார்பாக வருகை தந்திருக்கக்கூடிய நிர்வாகிகள் எனக்குக் காலையிலிருந்து மிகச் சிறப்பான ஏற்பாடுகளை, வரவேற்பை நீங்கள் கொடுத்திருக்கிறீர்கள். அதற்கு முதலில் என்னுடைய நன்றியை தெரிவித்துக்கொள்கிறேன்.
இன்றைக்கு திராவிட முன்னேற்றக் கழகம் எதிர்க்கட்சி வரிசையில் அமர்ந்திருக்கிறது. ஆனால், இங்கு இருக்கக்கூடிய உடன்பிறப்புகள் உங்களின் எழுச்சியை, உற்சாகத்தைப் பார்க்கும்பொழுது, ஆளுங்கட்சியாக இருக்கும்போது எவ்வளவு எழுச்சியாக இருந்தோமோ, எதிர்க்கட்சியாக இருக்கும்போது அதைவிட இன்னும் வேகமாக நீங்கள் எல்லாம் இருக்கிறீர்கள்.
அண்ணன் ராஜேந்திரன் அவர்களைப் பற்றி உங்களிடத்தில் நான் எடுத்துச் சொல்ல வேண்டியதில்லை. உங்கள் அத்தனை பேருக்கும் தெரிந்தவர்தான். அவரைப் பற்றி ஒன்றிரண்டு விஷயங்களை மட்டும் உங்களோடு பகிர்ந்து கொள்ள விரும்புகிறேன்.
1979–ஆம் ஆண்டே தன்னைக் கழகத்தோடு இணைத்துக்கொண்டவர்தான் அண்ணன் ராஜேந்திரன் அவர்கள். இந்த திருமண நிகழ்ச்சியில் கலந்துகொள்வதில் எனக்கென்ன கூடுதல் பெருமை என்றால், அண்ணன் ராஜேந்திரன் அவர்கள் இளைஞர் அணியிலிருந்து வளர்த்தெடுக்கப்பட்டவர், ஆளாக்கப்பட்டவர். எனவே, எதிர்க்கட்சித் தலைவராக மட்டுமல்ல கழகத்தின் இளைஞர் அணிச் செயலாளராக இந்த திருமணத்தை நடத்தி வைப்பதில் நான் மிகுந்த பெருமையடைகிறேன்.
அண்ணன் ராஜேந்திரன் அவர்கள் ஒன்றிய இளைஞர் அணி பொறுப்பாளராக, பிறகு மாவட்ட இளைஞர் அணியின் துணை அமைப்பாளர் என்று பல்வேறு பொறுப்புகளில் சிறப்பாகப் பணியாற்றியவர். கழகம் அறிவித்த அனைத்துப் போராட்டத்திலும் பங்கேற்றுச் சிறை சென்றிருக்கக் கூடியவர்தான் அண்ணன் ராஜேந்திரன் அவர்கள்.
1990–ஆம் ஆண்டு நம் கழகத் தலைவர் அவர்கள் தலைமையில்தான் அண்ணன் ராஜேந்திரன் அவர்களின் திருமணம் நடந்தது. இன்றைக்கு அண்ணனுடைய மகன் திருமணத்தை நான் நடத்தி வைக்கின்ற வாய்ப்பை பெற்றிருக்கிறேன்.
சோஃபா மாடல் கொடுமைகள்
இன்றைக்கு இந்த புதிய ஆட்சி, சோஃபா மாடல் ஆட்சி அமைந்த பிறகு நாடு என்ன நிலைமையில் இருக்கிறது என்று உங்கள் அத்தனை பேருக்கும் தெரியும். அனைவரும் தொலைக்காட்சியில் பார்த்துக் கொண்டிருக்கிறீர்கள். குறிப்பாக, சட்டமன்ற நிகழ்வுகளை இன்றைக்கு அனைவரும் தொலைக்காட்சியில் பார்த்துக்கொண்டிருக்கிறீர்கள். ஆளுங்கட்சி வரிசையில் இருக்கக்கூடியவர்கள் அடிக்கின்ற கூத்துகளை நீங்கள் தொலைக்காட்சியில் பார்த்துக்கொண்டிருக்கிறீர்கள். நானும் இங்கு இருக்கக்கூடிய சட்டமன்ற உறுப்பினர்களும் நேரலையில், நேரிலேயே பார்த்துக்கொண்டிருக்கிறோம். அந்த கொடுமைகள் எல்லாம் நேரில் பார்க்கின்ற வாய்ப்பு எங்களுக்குக் கிடைத்திருக்கிறது.
`தேசிய கீதம்’ இரண்டு முறை பாடுகிறீர்களே, தமிழ்த்தாய் வாழ்த்தை மட்டும் ஏன் ஒரு முறைதான் பாடுகிறீர்கள் என்று கேட்டால் அதற்கு முதலமைச்சரிடமிருந்து பதில் கிடையாது. இதற்கு முன்பு இருந்த முதலமைச்சர்கள் எல்லாம் அவைக்குள் வந்த உடனே, எதிரில் இருக்கக்கூடிய சட்டமன்ற உறுப்பினர்களை எல்லாம் பார்த்து வணக்கம் வைப்பார்கள். ஆனால், இன்றைக்கு இருக்கக்கூடிய முதலமைச்சர் அவைக்குள் வந்த உடனே, எந்த ஆங்கிளில் எத்தனை கேமரா இருக்கிறது என்பதைப் பார்ப்பதுதான் முதல் வேலையாக வைத்திருக்கிறார். அதனால், எங்களுக்கெல்லாம் சந்தேகம் வந்துவிடுகிறது. அந்த அவைக்குள் நாங்கள் நுழைந்த உடனே, இது என்ன சட்டமன்றமா, இல்லை சினிமா திரையரங்கமா, இல்லை ஷூட்டிங் ஸ்பாட்டா என்று கேட்கும் அளவுக்கு இன்றைக்கு சட்டமன்றத்தை ஆளுங்கட்சியினர் மாற்றி வைத்திருக்கிறார்கள். அந்த அளவுக்கு முதலமைச்சர் அவர்களும் தொடர்ந்து தன்னுடைய நடிப்புத் திறனை ஒவ்வொரு நாளும் காட்டிக்கொண்டு இருக்கிறார்.
முத்துவேல் கருணாநிதி
ஸ்டாலின்தான் ஆள்கிறார்!
அதுமட்டுமல்ல, அவைக்குள் கதை சொல்கிறேன்என்று எதை எதையோ உளறிக்கொண்டு இருக்கிறார். நம் தலைவரை அவர் தேடிக்கொண்டு இருக்கிறாராம். நம் தலைவர் என்றைக்குமே தேடிக் கண்டுபிடிக்கிற இடத்தில் இருந்தவர் இல்லை. எப்பொழுதுமே மக்களோடு மக்களாக இருந்தவர்தான், இன்றைக்கும் இருப்பவர்தான் நம் தலைவர். மக்களின் இதயத்தில் பல்வேறு திட்டங்கள் மூலம் இருக்கிறார். தேர்தலில் வெற்றி வாய்ப்பை இழந்தாலும் தில்லாக, தெம்பாகப் போய் தொகுதி மக்களைச் சந்தித்து நன்றி சொன்னவர் நம் தலைவர் அவர்கள் என்பதை இப்போது இருக்கக்கூடிய முதலமைச்சர் அவர்கள் மறந்துவிட்டார். ஆனால், பெரம்பூர் தொகுதியில் இவர் வெற்றி பெற்றாரே, இதுவரைக்கும் ஒரு முறையாவது சென்று மக்களுக்கு நன்றி சொன்னாரா என்று பார்த்தீர்கள் என்றால், நிச்சயம் கிடையாது.
மிசா காலத்தில் காவல்துறை தேடியபோது, தானாகச் சென்று கைதானவர் நம் தலைவர் அவர்கள். நம் தலைவருடைய பெயரை எங்கும் தேட வேண்டிய அவசியம் இல்லை. இன்றைக்குக் கலைஞர் மகளிர் உரிமைத் தொகைத் திட்டம், தமிழ்ப் புதல்வன் திட்டம், புதுமைப் பெண் திட்டம், இப்படிப் பல்வேறு திட்டங்களில் நம் தலைவர்அவர்கள் இருக்கிறார். இந்தத் திட்டங்களைத் தவிர்க்க முடியாமல், நிறுத்த முடியாமல் இந்த சோஃபா மாடல் அரசு இன்றைக்குத் தவித்துக்கொண்டு, திணறிக்கொண்டு இருக்கிறார்கள். இந்தத் திட்டங்களில் கை வைக்க வேண்டும் என்று நினைத்தபோது இந்த அரசுக்கு நிச்சயம் ஒரு பயம் வந்திருக்கும். அந்தப் பயம் இருக்கிற வரைக்கும் தமிழ்நாட்டை ஆண்டு கொண்டிருப்பது நம் தலைவர்தான், திரு முத்துவேல் கருணாநிதி ஸ்டாலின் அவர்கள்தான். ஆகவே, `குரளி வித்தை’ காட்டுகிற இந்த வேலையை நிறுத்தி வைத்துவிட்டு, முதலமைச்சர் அவர்களும் இந்த அரசும் ஆக்கப்பூர்வமான பணிகளைச் செய்ய வேண்டும் என்று நான் கேட்டுக்கொள்கிறேன்.
இதுதான் ஊழல் லட்சணமா?
இவர்களின் ஆட்சியில் இன்றைக்கு மக்கள் மின்சாரம் எங்கே என்று தேடிக்கொண்டு இருக்கிறார்கள். நன்றாக இருந்த சட்டம் ஒழுங்கு எங்கே போயிற்று என்று மக்கள் இன்றைக்குத் தேடிக்கொண்டு இருக்கிறார்கள். கடந்த ஐந்து வருடங்களாக நம் தலைவர் ஆட்சியில் சரியாக ஜூன் 12 அன்று மேட்டூர் அணையை நம் தலைவர் அவர்கள் திறந்து விட்டார்கள். ஆனால், இந்த ஆட்சியில் அது நடந்திருக்கிறதா என்று பார்த்தீர்கள் என்றால், இல்லை. எனவே, தண்ணீர் எங்கே என்று இன்றைக்கு மக்கள் தேடிக்கொண்டு இருக்கிறார்கள். மொத்தத்தில் தமிழ்நாட்டில் ஆட்சி என்று ஒன்று நடந்தது அல்லவா, அது இப்போது எங்கே என்று இன்றைக்குத் தமிழ்நாட்டு மக்கள் தேட ஆரம்பித்துள்ளார்கள். அருகே உள்ள புதுக்கோட்டை மாவட்டத்திலிருந்து ஒருவர் ஆளுங்கட்சியில் சேரப்போவதாகத் தினமும் செய்திகள் வந்து கொண்டிருக்கின்றன. இவ்வளவு நாள் ஊழல் சக்தியாக இருந்த அவர், இனிமேல் தூய சக்தி ஆகிவிடுவார். இதுதான் இந்த அரசினுடைய ஊழல் ஒழிப்பு லட்சணம் என்பதை நீங்கள் புரிந்துகொள்ள வேண்டும்.
இன்றைக்குப் பார்த்தீர்கள் என்றால், தொடர்ந்து தி.மு.க.வினரைக் குறிவைத்து, அதுவும் ஜென்சி தி.மு.க.வினரைக் குறி வைத்துப் பல சோதனைகள் நடத்துகிறார்கள், கைது நடவடிக்கையில் இறங்கி இருக்கிறார்கள். இதையெல்லாம் முறியடிக்க வேண்டியது நம் கடமை. இந்த ஆட்சியாளருடைய அநியாயங்களை உடன்பிறப்புகளாக நாம் ஒன்றாக இருந்து தோலுரித்துக் காட்ட வேண்டும். இந்த அரசினுடைய மக்கள் விரோத செயல்பாடுகளைத் தொடர்ந்து நாம் அம்பலப்படுத்த வேண்டும். அதை மனதில் வைத்துக்கொண்டு கழக உடன்பிறப்புகள் நீங்கள் அத்தனை பேரும் தீவிரமாகக் களமாட வேண்டும் என்று கேட்டுக்கொள்கிறேன்.
அதேபோல் மணமக்கள் இரண்டு பேருக்கும் என்னுடைய அறிவுரை என்னவென்றால், இரண்டு பேரும் விட்டுக்கொடுத்து, அதே நேரத்தில் சுயமரியாதையோடு சிறந்த நண்பர்களாக இருவரும் உங்களின் திருமண வாழ்க்கையை அமைத்துக்கொள்ள வேண்டும் என்று கேட்டுக்கொண்டு, உங்களுக்குப் பிறக்க இருக்கக்கூடிய குழந்தை அது ஆண் குழந்தையாக இருந்தாலும் சரி, பெண் குழந்தையாக இருந்தாலும் ஒரு அழகான தமிழ்ப் பெயரை நீங்கள் சூட்ட வேண்டும் என்று உங்கள் அத்தனை பேர் சார்பாகக் கேட்டுக்கொண்டு, மணமக்களுக்கு மீண்டும் உங்கள் அத்தனை பேர் சார்பாக என்னுடைய வாழ்த்துகளைக் கூறி விடைபெறுகிறேன்.
நன்றி, வணக்கம்.
இவ்வாறு கழக இளைஞர் அணிச் செயலாளரும் எதிர்க்கட்சித் தலைவருமான உதயநிதி ஸ்டாலின் அவர்கள் உரையாற்றினார்.
பங்கேற்றவர்கள்
மாவட்டக் கழகச் செயலாளரும் சட்டமன்ற உறுப்பினருமான துரை சந்திரசேகரன், முன்னாள் அமைச்சர்கள் ரகுபதி, அன்பில் மகேஷ் பொய்யாமொழி, பழனிமாணிக்கம், கோவி.செழியன், மெய்யநாதன், வைத்தியலிங்கம், மாவட்டக் கழகச் செயலாளர் செல்லப்பாண்டியன், பழனிவேல், நாடாளுமன்ற உறுப்பினர் முரசொலி, சட்டமன்ற உறுப்பினர் அண்ணாதுரை, மருத்துவர் முத்துராஜா, முன்னாள் நாடாளுமன்ற உறுப்பினர் அப்துல்லா, முன்னாள் சட்டமன்ற உறுப்பினர்கள் ராமச்சந்திரன், நீலமேகம், ரெங்கசாமி, மகேஷ் கிருஷ்ணசாமி, மாநகர செயலாளர் தமிழழகன், சன் ராமநாதன், ராஜேஷ், துணை மேயர்கள் மருத்துவர் அஞ்சுகம் பூபதி, லியாகத் அலி, தலைமை செயற்குழு உறுப்பினர்கள் செல்வம், கீரை தமிழ்ராஜா, கழக அணிகளின் மாநில நிர்வாகிகள் சந்திரசேகர், சுப.தமிழழகன், சுப.சரவணன், கருப்பையா, கனகவல்லி, ஒன்றிய கழக செயலாளர்கள் நடுவூர் செல்வராஜ், முருகையன், செல்ல ரமேஷ்குமார், கார்த்திகேயன், முத்துக் கிருஷ்ணன், பேரூர் கழக செயலாளர் முருகேசன், திராவிடக் கதிரவன், துரை ஜெயக்குமார், மாவட்ட இளைஞர் அணி அமைப்பாளர்கள் சண்முகம், முகில்வேந்தன், மாநகர அமைப்பாளர் வாசிம் ராஜா, துணை அமைப்பாளர்கள் செந்தமிழ்ச்செல்வன், சுரேஷ், வெங்கடேசன், கார்த்திக், உதயநிதி, ஹரிதரன், மருத்துவர் சந்திரசேகரன், வீரமணி, சிவக்குமார், அன்சாரி பாஷித், மாநகர துணை அமைப்பாளர் மதிபாலன், ஒன்றிய இளைஞர் அணி அமைப்பாளர்கள் பிரபு, செல்லத்துரை, அழகிரி, ஐயப்பன், பேரூர் அமைப்பாளர் ஃபரூக், உள்பட கழக முன்னணியினர் பலரும் கலந்துகொண்டனர்.