#Title

தமிழ்நாட்டில் செயல்படுவது தமிழக காவல் துறையா? த.வெ.க. காவல் துறையா? தி.மு.க. மனு மீது வழக்குப் பதிவு செய்ய என்ன தயக்கம்? முன்னாள் பேரவைத் தலைவர் மு.அப்பாவு கேள்வி!

----நெல்லை, ஜூலை 3 –

ஊத்தங்கரை இளையராஜா த.வெ.க. எம்.எல்.ஏ. விடம் போலியான புகார் மனு பெற்று தி.மு.க.வின் மீது பழிவாங்க நடவடிக்கை ஈடுபடுவது நியாயமா? இதுபோல தி.மு.க. சட்டமன்ற உறுப்பினர்கள் புகார் மனு கொடுத்தால் நடவடிக்கை எடுப்பீர்களா? தி.மு.க. சார்பில் கழக அமைப்புச் செயலாளர் ஆர்.எஸ்.பாரதி புகார் மனு மீது வழக்குப் பதிவு செய்ய என்ன தயக்கம்? தற்போது தமிழகத்தில் செயல்படுவது தமிழக காவல்துறையா அல்லது த.வெ.க. காவல்துறையா? என முன்னாள் சட்டப்பேரவை தலைவர் மு.அப்பாவு கேள்வி எழுப்பியுள்ளார்.

இது தொடர்பாக முன்னாள் பேரவை தலைவர் மு.அப்பாவு தனது எக்ஸ் வலைதள பதிவில் கூறியிருப்பதாவது.

தேர்தல் முடிவுகள் மே மாதம் 4 ம் தேதி முடிவடைந்த இரவே தி.மு.க. கூட்டணியில் வெற்றி பெற்ற காங்கிரஸ் எம்.எல்.ஏ.க்களை பனையூருக்கு அழைத்து வந்து த.வெ.க. கூட்டணியில் சேர்த்தவர் இன்றைய முதல்வர். தொடர்ந்து பா.ஜ.க. கூட்டணியில் வெற்றி பெற்ற அ.தி.மு.க. எம்.எல்.ஏ.க்களில் 25 பேர்களை கட்சியை தகர்த்து தனக்கு ஆதரவாக வாக்களிக்க வைத்தவர்.

அதேபோல அ.ம.மு.க. தலைமைக்கு தெரியாமல் காமராஜர் எம்.எல்.ஏ. கொள்முதல் செய்யப்பட்டு த.வெ.க.விற்கு ஆதரவாக வாக்களித்தார். இன்று வரை பல அ.தி.மு.கழக எம்.எல்.ஏ. க்கள் ராஜினாமா செய்து த.வெ.க.வில் இணைத்து வருகின்றனர்.

இந்த நிலையில் ம.தி.மு.க. பொதுச்செயலாளர் வைகோ அவர்கள் முதல்வரை சந்தித்த பின் பத்திரிக்கையாளர் சந்திப்பில் “உங்களது 2 எம்.எல்.ஏ.க்களையும் ராஜினாமா செய்ய சொல்லுங்கள் இடைத்தேர்தலில் நானே பிரச்சாரம் செய்து வெற்றி பெறச் செய்வேன்” என்று வாக்குமூலம் தந்தார்.அதனடிப்படையில் தி.மு.க. எம்.எல்.ஏ.க்களை த.வெ.க. விற்கு ஆதரவாக ராஜினாமா செய்ய சொன்ன முதல்வர் மீது வழக்கு பதிவு செய்ய நடவடிக்கை எடுக்க வேண்டும் என்று ஆளுநருக்கும், லஞ்ச ஒழிப்பு துறைக்கும் தி.மு.கழகத்தின் அமைப்புச் செயலாளர் ஆர்.எஸ்.பாரதி அவர்கள் புகார் மனு கொடுத்துள்ளார்.

இத்தனைகுற்றங்களை யும் கைகட்டி வேடிக்கை பார்த்த தமிழக காவல்துறை ஊத்தங்கரை இளையராஜா எம்.எல்.ஏ.விடம் போலியான புகார் மனு பெற்று தி.மு.க.வின் மீது பழிவாங்கும் நடவடிக்கை ஈடுபடுவது நியாயமா? இது போல் தி.மு.க. சட்டமன்ற உறுப்பினர்கள் புகார் மனு கொடுத்தால் நடவடிக்கை எடுப்பீர்களா?ஆர்.எஸ்.பாரதி புகார் மனு மீது வழக்கு பதிவு செய்து செய்ய என்ன தயக்கம்? தற்போது தமிழகத்தில் செயல்படுவது தமிழக காவல்துறையா? அல்லது த.வெ.க. காவல்துறையா?

இவ்வாறு முன்னாள் பேரவை தலைவர் மு.அப்பாவு தனது எக்ஸ் வலை தளத்தில் கூறியுள்ளார்.