கன்னியாகுமரி, ஜூலை 3–
கன்னியாகுமரி மாவட்டம், மணவாளக்குறிச்சியில் செயல்படும் ஒன்றிய அரசுக்குச் சொந்தமான இந்திய அருமணல் ஆலைக்கு (Indian Rare Earths Limited) தேவையான அணுக்கனிம மூலப்பொருட்களை (மோனோசைட், இலுமனைட், சிலிமனைட் போன்ற அணுசக்தி தாதுக்கள்) வழங்கும் நோக்குடன் கிள்ளியூர் மற்றும் அதன் சுற்றுவட்டார பகுதிகளான கீழ்மிடாலம், மிடாலம், இனையம், புத்தன்துறை, ஏழுதேசம், கொல்லங்கோடு வரை உள்ளிட்ட கடற்கரை கிராமங்களில் சுமார் 1800 ஹெக்டேர் பரப்பளவில் அணுக்கனிம சுரங்கம் அமைக்க 2015-ம் ஆண்டில் மத்திய அரசு முடிவு செய்தது. இது தொடர்பான அணுசக்தித் துறையின் கோரிக்கையை ஆய்வு செய்த அப்போதைய அ.தி.மு.க அரசு 1144 ஹெக்டேர் நிலத்தில் அணுக்கனிம சுரங்கம் அமைக்க 2020-ம் ஆண்டில் ஒப்புதல் அளித்தது.
அதைத் தொடர்ந்து அந்த நிலங்களை அணுக்கனிமச் சுரங்கம் அமைக்க ஒதுக்கீடு செய்து 11.06.2021ல் ஒன்றிய அரசு ஆணை பிறப்பித்தது. அதன் தொடர் நடவடிக்கையாக அங்கு அணுக்கனிம சுரங்கம் அமைப்பதற்கான பொதுமக்களின் கருத்துக் கேட்புக் கூட்டம் 2024-ம் ஆண்டு அக்டோபர் 1-ம் தேதி நடைபெறுவதாக இருந்தது. கழகத் தலைவர் முன்னாள் தமிழ்நாடு முதலமைச்சர் மு.க. ஸ்டாலின் அவர்களின் கடந்த கால ஆட்சியில் பொதுமக்களின் நலன் கருதி கருத்து கேட்புக் கூட்டம் நடத்தாமல், தமிழ்நாடு அரசின் சார்பில் அணுக்கனிம சுரங்கம் அமைக்கும் திட்டத்திற்கு அனுமதி அளிக்காமல் இருந்தது. அப்போது கூட்டணி யில் இருந்த காங்கிரஸ் கிள்ளியூர் சட்டமன்ற தொகுதி உறுப்பினர் ராஜேஷ்
குமார் பொதுமக்களுக்கு ஆதரவாக இத்திட்டத்திற்கு எதிர்ப்பு தெரி வித்து வந்தார். ஆனால் தற்போது த.வெ.க. அரசுடன் கூட்டணியில் இருக்கும். சுற்றுலாத்துறை அமைச்சர் ராஜேஷ்குமார் அவர்கள் பொதுமக்களுக்கு கேடு விளைவிக்கும் இத்திட்டத்திற்கு எந்த எதிர்ப்பும் தெரிவிக்காததை குறித்து கன்னியாகுமரி கிழக்கு மாவட்டச் செயலாளர் ரெ.மகேஷ் கேள்வி எழுப்பியுள்ளார்.
அணுக்கனிம சுரங்கம் அமைக்க 1144 ஹெக்டேர் நிலங்களை ஒதுக்கி 11.06.2021ம் நாள் ஒன்றிய அரசு பிறப்பித்த ஆணை ஐந்தாண்டுகளுக்கு மட்டும் தான் என்பதால், இந்த திட்டம் காலாவதியாகி விட்டதாக அனைவரும் நினைத்துக் கொண்டிருந்த வேளை யில் நில ஒதுக்கீட்டை மேலும் ஓராண்டுக்கு நீட்டித்து கடந்த 10.06.2026-ம் நாள் தமிழ்நாடு அரசு அரசாணை பிறப்பித்திருப்பது வேதனை அளிக்கிறது. ஏற்கனவே, கன்னியாகுமரி மாவட்டத்தில் புற்றுநோய் தாக்கம் அதிகமாக உள்ள நிலையில், மணவாளக்குறிச்சி பகுதியில் இயங்கும் இந்திய அருமணல் ஆலையால் ஏற்படும் கதிர்வீச்சு காரணமாக ஏற்கனவே சுற்றுப்புற கிராம மக்கள் புற்றுநோய், சிறுநீரகப் பாதிப்பு, தோல் நோய், ஆஸ்துமா, கருச்சிதைவு உள்ளிட்ட பாதிப்புகளை தொடர்ந்து சந்தித்து வருகின்றனர். இந்நிலையில் அணுக்கனிம சுரங்கம் அமைக்கப்பட்டால், அதில் ஏற்படும் கதிர்வீச்சின் காரணமாக மாவட்டத்தில் புற்றுநோய் பாதிப்பு கள் மேலும் அதிகரிக்கும். மத்திய அரசின் இதுபோன்ற கொடிய திட்டத்
திற்கு தமிழ்நாடு அரசு துணை போவது கன்னியாகுமரி மாவட்ட மக்களின் அடிப்படை உரிமைகளுக்கு எதிரானது. எனவே, பொதுமக்களுக்கு பேராபத்தை விளைவிக்கும் கிள்ளியூரில் அணுக்கனிம சுரங்கம் அமைக்க 1144 ஹெக்டேர் நிலம் ஒதுக்கிய அரசாணையின் செல்லுபடியாகும் காலத்தை மேலும் ஓராண்டு நீட்டித்து பிறப்பிக்க ப்பட்டுள்ள அரசாணையை தமிழ்நாடு அரசு உடனே ரத்து செய்து இத்திட்டத்தை கைவிட வேண்டும் இல்லையென்றால் பொதுமக்கள் சார்பில் கடற்கரை கிராம மக்களை ஒன்றிணைத்து மாபெரும் போராட்டம் நடத்தப்படும் என மாவட்டச் செயலாளர் ரெ.மகேஷ் தெரிவித்துள்ளார்.