நெல்லை, ஜூலை 5–
திருநெல்வேலி அருகே பட்டப்பகலில் தந்தை, மகனை கொடூரமாக கொலை செய்த மர்ம கும்பல், தந்தையின் தலையை வெட்டி நடுசாலையில் வைத்துவிட்டு சென்ற சம்பவம் பெரும் அதிர்ச்சியை ஏற்படுத்தியுள்ளது.
நெல்லை மாவட்டம், கல்லிடைக்குறிச்சி அருகே உள்ள மூலச்சி கிராமத்தைச் சேர்ந்த காளிமுத்து, தனது இரண்டு மகன்களுடன் இருசக்கர வாகனத்தில் வீடு திரும்பிக்கொண்டிருந்தார். காரில் அவரை பின்தொடர்ந்து வந்த மர்ம கும்பல், திடீரென காரால் இருசக்கர வாகனத்தின் மீது மோதி காளிமுத்துவை கீழே தள்ளியுள்ளது. காளிமுத்துவின்
5 வயது மகன் ஜெயராஜ் சம்பவ இடத்திலேயே உயிரிழந்தான். தப்பியோட முயன்ற காளிமுத்துவை விரட்டிச் சென்ற அந்த
கும்பல், சரமாரியாக வெட்டிக் கொலை செய்தது. பின்னர், தலையை தனியாக துண்டித்து, 5 கிலோ மீட்டர் தூரத்திற்கு கொண்டு சென்ற அந்த கும்பல், கல்லிடைக்குறிச்சி அருகே கரம்பை பகுதியில் சாலையின் மையத்தில் வைத்துவிட்டு தப்பிச் சென்றது.
தகவலறிந்து சம்பவ இடத்திற்கு வந்த போலீசார், படுகாயங்களுடன் உயிருக்குப் போராடிய காளிமுத்துவின் மூத்த மகன் சின்னராஜை மீட்டு மருத்துவமனைக்கு அனுப்பி வைத்தனர். கொலை செய்யப்பட்ட காளிமுத்து, ஜெயராஜின் உடல்களை மீட்டு போலீசார் பிரேத பரிசோதனைக்கு அனுப்பி வைத்தனர். ஏற்கனவே, இப்பகுதியில் நடைபெற்ற ஒரு கொலைக்கு பழிக்குப் பழியாகவே இந்த இரட்டைக்கொலை சம்பவம் அரங்கேறியிருப்பதும், காளிமுத்து வின் ஊரைச் சேர்ந்தவர்கள் இதில் ஈடுபட்டிருப்பதும் முதற்கட்ட விசாரணையில் தெரியவந்துள்ளது. பட்டப்பகலில் நடைபெற்றுள்ள இரட்டை கொலை சம்பவத்தால், கல்லிடைக்குறிச்சியில் பதற்றம் நிலவி வருகிறது.