சென்னை, ஜூலை 7–
தி.மு.க. தலைமை நிலைய அலுவலகச் செயலாளர் துறைமுகம் காஜா இல்ல மணவிழாவை சட்டமன்ற எதிர்க்கட்சித் தலைவரும் கழக இளைஞரணிச் செயலாளருமான உதயநிதி ஸ்டாலின் அவர்கள் நடத்தி வைத்து வாழ்த்துரை வழங்கினார். ‘தமிழ்நாட்டை தற்போதைய அரசியல் பேரிடரிலிருந்து தி.மு.கழகம் மீட்டெடுக்கும்’’ என்று அப்போது அவர் குறிப்பிட்டார்.
மணவிழாவில் சட்டப்பேரவை எதிர்க்கட்சித் தலைவர் உதயநிதி ஸ்டாலின் அவர்கள் கலந்துகொண்டு மணமக்களை வாழ்த்திப் பேசியது வருமாறு:–
இன்று கழகத்தின் தலைமை நிலையச் செயலாளரும், நம் அருமை அண்ணன் துறைமுகம் காஜா அவர்களின் பேத்தி சமீனா சப்ரியத் - ஹனீஃப் கான் அவர்களின் திருமண விழாவில் பங்கேற்று, உங்களோடு சேர்ந்து மணமக்களை வாழ்த்துவதில் மிகுந்த மகிழ்ச்சி அடைகிறேன். முதலில் நம் அத்தனை பேரின் சார்பாக மணமக்களுக்கு நம் வாழ்த்துகளை நான் தெரிவித்துக் கொள்கிறேன்.
குடும்பத்தில் ஒருவன்
இந்த விழாவில், வெறும் விருந்தின ராக மட்டுமல்லாமல் துறைமுகம் காஜா அவர்களின் குடும்பத்தில் ஒருவனாக, நான் இந்த நிகழ்ச்சியில் கலந்து கொள்வதில் மிகுந்த பெருமை அடைகிறேன். நம் கழகத் தலைவர் அவர்கள் இந்த திருமண விழாவைத் தலைமையேற்று நடத்தி வைப்பதாக இருந்தது. இன்றைக்குக் கழகத் தலைவரின் சார்பாக நாங்கள் இந்தத் திருமண விழாவில் கலந்து கொண்டிருக்கிறோம்.
தலைவர் அவர்கள் இங்கே இல்லை என்றாலும், அவர் நினைவு முழுவதும் இந்தத் திருமண விழாவில் நிச்சயம் இருக்கும். தலைவரின் வாழ்த்துகளும் நிச்சயம் இந்த மணமக்களுக்கு உண்டு.
இன்றைக்கு மணமகளாக இருக்கக்கூடிய தங்கை சமீனா சப்ரியத், அவர்களின் தாயார் ஜமீல் பாத்திமாவின்
திருமணத்தை, முத்தமிழறிஞர் கலைஞர் அவர்கள் 2000-வது ஆண்டில், தலைவர் அவர்கள்தான் தலைமையேற்று நடத்தி வைத்தார்கள். இன்றைக்கு நம் காஜா அண்ணனின் பேத்தியின் திருமணத்தை நடத்தி வைக்கின்ற வாய்ப்பு எனக்குக் கிடைத்திருக்கிறது.
அறிவாலயத்தின் தூண்கள்
நம் கழகத்தின் தலைமை நிலையம், அண்ணா அறிவாலயத்துக்குள் யார் நுழைய வேண்டும் என்றாலும், யார் உள்ளே வர வேண்டும் என்றாலும் அவர்கள் முதலில் இரண்டு பேரின் அனுமதியை வாங்க வேண்டும். ஒன்று
அண்ணன் பூச்சி முருகன் அவர்கள், இன்னொன்று நம் துறைமுகம் காஜா அவர்கள். இவர்கள் இரண்டு பேரும் நினைத்தால் மட்டும்தான் அண்ணா அறிவாலயத்துக்குள்யாராக இருந்தாலும் நுழைய முடியும். அதனால்தான் நம் தலைவர் அவர்கள்அடிக்கடி சொல்வார், அண்ணன் துறைமுகம் காஜா அவர்களும், அண்ணன் பூச்சி முருகன் அவர்களும் அண்ணா அறிவாலயத்தின் இரண்டு தூண்கள் என்று பெருமையோடு குறிப்பிடுவார்.
இன்னொரு முக்கியமான விஷயம், 1989-இல் துறைமுகம் தொகுதியில் நம் முத்தமிழறிஞர் கலைஞர் அவர்கள் போட்டியிட்டு வெற்றிபெற்றார். அப்போது முத்தமிழறிஞர் கலைஞர் அவர்களுக்கு எதிர்த்து நின்ற வேட்பாளர் யாரென்று பார்த்தீர்களென்றால், அண்ணன் துறைமுகம் காஜா அவர்கள்தான். அண்ணன் அவர்கள் அப்போதுஅனைத்திந்திய அண்ணா திராவிட முன்னேற்றக் கழகத்தின் சார்பாக, கலைஞர் அவர்களை எதிர்த்துப் போட்டி போட்டார். ஆனால், தேர்தலில் கலைஞர் அவர்கள்தான் வெற்றி பெற்றார்கள்.
வாக்கு எண்ணிக்கை முடிவுறும் நேரத்தில், இன்னும் சொல்லப்போனால் வாக்கு எண்ணிக்கையே முடியவில்லை, அந்த நேரத்தில் போட்டியாக நின்ற அண்ணன் துறைமுகம் காஜா அவர்கள், கலைஞருக்கு மாலை போட வேண்டும் என்று சொல்லி, எதிர்க்கட்சி வேட்பாளராக இருந்த அவர் அப்பொழுதே கலைஞரை பார்த்து வாழ்த்துச் சொல்லி மாலை
போட்டார். அதன் பிறகு கழகத்திலும் தன்னை இணைத்துக் கொண்டார்.
அண்ணன் துறைமுகம் காஜா
அன்றைக்குத் தொடங்கி இன்றைக்கு வரைக்கும் கிட்டத்தட்ட37 ஆண்டுகள் கழகத்தில் தன்னை இணைத்துக்கொண்டு, கழகத்தின் உண்மையான உடன்பிறப்பாக இன்றைக்கு அண்ணன் துறைமுகம் காஜா அவர்கள் சிறப்பாகக் கழகப் பணியைச் செய்து கொண்டிருக்கிறார்.
கலைஞர் அவர்களால் 2003-ஆம் ஆண்டு தலைமை நிலையச் செயலாளராக நியமிக்கப்பட்டு, கிட்டத்தட்ட 23 ஆண்டுகள் அந்தப் பொறுப்பில் மிகச் சிறப்பாகச் செயல்பட்டுக் கொண்டிருக்கிறார். அறிவாலயத்தில் மட்டுமல்ல, நம் கழக மாநாடுகள், நிகழ்ச்சிகள் எங்கு நடந்தாலும் அங்கே முதலில் இருக்கக்கூடிய நபர் அண்ணன் துறைமுகம் காஜா அவர்கள். எங்கு சென்றாலும், எந்தக் கழக நிகழ்ச்சிக்கு சென்றாலும் முதல் ஆளாக நம் உடன்பிறப்புகள் பார்க்கக்கூடிய நபர் அண்ணன் துறைமுகம் காஜா அவர்கள்.