மும்பை, ஜூலை 7 –
மகாராஷ்டிரா, குஜராத், அரியானா உள்ளிட்ட பல்வேறு மாநிலங்களில் கனமழை வெளுத்து வாங்கி வருவதால், அங்கு இயல்பு வாழ்க்கை பாதிக்கப்பட்டுள்ளது.
மும்பையில் வந்தே பாரத் ரயில் சென்றபோது, தண்டவாளத்தில் தேங்கியிருந்த மழைநீர் அருகே இருந்த மேம்பாலத்தின் மீது அருவி போல் கொட்டிய காட்சிகள் வெளியாகியுள்ளது.
மகாராஷ்டிரா மாநிலத்தில் பெய்து வரும் கனமழை காரணமாக பல்வேறு இடங்களில் மழைநீர் தேங்கியுள்ளது. குறிப்பாக, மும்பையின் நலாசோபாரா பகுதியில் மழைநீர் தேங்கியுள்ளதால், அப்பகுதி மக்களின் இயல்பு வாழ்க்கை பாதிக்கப்பட்டுள்ளது. பலத்த காற்றுடன் பெய்த மழை காரணமாக கிழக்கு பாந்த்ராவில் மரம் வேரோடு சாய்ந்து கார்கள் சேதமானது.
கோவா-மும்பை தேசிய நெடுஞ்சாலையிலும் மழைநீர் தேங்கியது. புனேயில் மழை காரணமாக வீடு ஒன்று இடிந்து விழுந்ததில், இருவர் காயமடைந்தனர். மும்பையில் உள்ள கடற்பகுதிகளில் பலத்த காற்று வீசி வருவதால், கடல்சீற்றத்துடன் காணப்படுகிறது. இதனிடையே, கனமழையால் மும்பையில் உள்ள ரயில் தண்டவாளங்களிலும் தண்ணீர் தேங்கியுள்ளது.
இருப்பினும், வந்தே பாரத் ரயில் இயக்கப்பட்டபோது, தண்டவாளத்தில் தேங்கியிருந்த தண்ணீரை கிழித்துக் கொண்டு ரயில் சென்றநிலையில், தேங்கிய மழைநீர் அருகே இருந்த மேம்பாலத்தின் மீது அருவி போல் கொட்டியதால், வாகன ஓட்டிகள் அதிர்ச்சியடைந்தனர்.
இதேபோல், குஜராத் மாநிலத்தில் பெய்து வரும் கனமழையால், குடியிருப்பு பகுதிகளில் தண்ணீர் தேங்கியுள்ளது. இதனால், அப்பகுதி மக்கள் கடும் இன்னல்களுக்கு ஆளாகி வருகின்ற னர்.
அரியானா மாநிலத்தின் குருகிராம் பகுதியில் மழை பெய்த நிலையில், அங்கும் தண்ணீர் தேங்கியுள்ளது. ஒடிசா மாநிலம் கட்டாக்கில் பலத்த மழை காரணமாக தண்ணீர் தேங்கியுள்ளதால், அப்பகுதி மக்களின் இயல்பு வாழ்க்கை கடுமையாக பாதிக்கப்பட்டுள்ளது. இதனிடையே, தேங்கியுள்ள மழைநீரை வெளியேற்றும் பணிகள் தீவிரமாக நடைபெற்று வருகிறது.