புதுச்சேரி, ஜூலை 8–
இந்திய ரிசர்வ் வங்கியின் உத்தரவை மதிக்காமல் செயல்படும் இந்தியன் வங்கி அதிகாரிகள் மீது நடவடிக்கை எடுக்க வேண்டும், சர்ஃபாசி சட்டத்தை வங்கி அதிகாரிகள் சட்டவிரோதமாக பயன்படுத்தி வாடிக்கையாளர்களின் சொத்துக்களை ஏலம் விட்டு கொள்ளை அடிப்பதைக் கண்டித்தும், சிறு, குறுதொழில்களை நசுக்கும் வங்கிநிர்வாகத்தை கண்டித்தும் அகில இந்திய வங்கி மற்றும் வங்கி சாரா வாடிக்கையாளர் நலன் மற்றும் பாதுகாப்பு நலச்சங்கம் சார்பில் புதுச்சேரி கொக்குப்பார்க் சந்திப்பில் இந்தியன் வங்கி மண்டல அலுவலகம் அருகில் நேற்று முன்தினம் காலை கண்டன ஆர்ப்பாட்டம் நடைபெற்றது.
ஆர்ப்பாட்டத்திற்கு சங்க ஒருங்கிணைப்பாளர் நடராஜன் தலைமை வகித்தார். தி.மு.க. மாணவர் அணி அமைப்பாளர் எஸ்.பி. மணிமாறன், தட்டாஞ்சாவடி தொகுதி பொறுப்பாளர் டாக்டர் ரோ. நித்திஷ் ஆகியோர் முன்னிலை வகித்தனர்.
இதில், தி.மு.க. மாநில அமைப்பாளர் இரா. சிவா சிறப்பு அழைப்பாளராக கலந்து கொண்டு போராட்டத்திற்கு ஆதரவு தெரிவித்து பேசுகையில், வங்கிகள் மக்களின் பணத்தைப் பாதுகாக்க உருவாக்கப்பட்ட அமைப்புகளா, அல்லது மக்களிடம் பல்வேறு கட்டணங்களை வசூலித்து லாபம் ஈட்டும் நிறுவனங் களா என்ற கேள்வி இன்று எழுந்துள்ளது.
ஒரு சாதாரண மனிதர் வங்கியில் பணம் செலுத்தினாலும் கட்டணம், பணம் எடுத்தாலும் கட்டணம், குறைந்தபட்ச இருப்புத்தொகை இல்லாவிட்டாலும்கட்டணம்,குறுஞ்செய்திக்கும் கட்டணம் என வாடிக்கையாளர்களின் மீது பல்வேறு பெயர்களில் சுமைகள் ஏற்றப்படுகின்றன. வங்கிகள் தங்களது கட்டண விவரங்களை வெளிப்படையாகவும் எளிதில் புரியும் வகையிலும் தெரிவிக்க வேண்டும்.
அவமானப்படுத்தும் அணுகுமுறை!
பெரிய நிறுவனங்களின் கடன்களை வசூலிப்பதில் காட்டப்படாத வேகம், சிறு வியாபாரி, நடுத்தர குடும்பம், வீடு கட்ட கடன் வாங்கியவர், வாகனக் கடன் பெற்றவர் ஆகியோரிடம் மட்டும் காட்டப்படுவது ஏன்? ஒரு தவணை தாமதமானாலே சாதாரண மக்களுக்கு தொடர்ந்து தொலைபேசி அழைப்புகள், அழுத்தம், அவமானப்படுத்தும் அணுகுமுறை போன்ற புகார்கள் எழுகின்றன. கடன் வசூல் நடவடிக்கைகள் சட்டத்திற்கும் மனிதகண்ணியத்திற்கும் உட்பட்டதாக இருக்க வேண்டும்.
சர்ஃபாசி சட்டத்தின் கீழ் நடவடிக்கை எடுக்கப்படும் போது, சிறு மற்றும் நடுத்தர கடனாளிகளின் வாழ்வாதாரம், தொழில் தொடர்ச்சி, குடும்ப சூழ்நிலை ஆகியவற்றைக் கருத்தில் கொண்டு உரிய மறுசீரமைப்பு மற்றும் நியாயமான தீர்வு வாய்ப்புகள் உறுதி செய்யப்பட வேண்டும். சிறு தொழில்களைத் தொடங்குங்கள், இளைஞர்கள் தொழில்முனைவோராக மாறுங்கள் என்று அரசு கூறுகிறது. ஆனால் தொழிலில் ஒரு பின்னடைவு ஏற்பட்டவுடன் வங்கிகள் அவர்களை மீண்டும் எழ முடியாத நிலைக்குத் தள்ளினால், புதிய தொழில் முனைவோர் எப்படி உருவாக முடியும்? முத்ரா, ஸ்டார்ட்–அப் போன்ற திட்டங்கள் விளம்பரத்திற்கான வார்த்தைகளாக மட்டும் இருக்கக் கூடாது. சிறு தொழில்களுக்கு எளிய கடன், நியாயமான வட்டி, மறுசீரமைப்புவாய்ப்பு மற்றும் தொழில் தோல்வியடைந்தால் மீண்டு வருவதற்கான பாதுகாப்பு ஆகியவை தேவை.
வங்கி தொடர்பான அறிவிப்புகள்
தமிழ்மொழியில் காட்சிப்படுத்த வேண்டும்!
வங்கி வாடிக்கையாளர்களின் புகார்கள் குறிப் பிட்ட காலக்கெடுவிற்குள் தீர்க்கப்பட வேண்டும். வங்கிகள் மீது புகார் அளிக்கும் பொதுமக்கள் அலைக்கழிக்கப்படக் கூடாது. புகார் பதிவு செய்தவுடன் கண்காணிப்பு எண், தீர்வுக்கான காலக்கெடு, மேல்முறையீட்டு வழிமுறை ஆகியவை தெளிவாக வழங்கப்பட வேண்டும். வங்கி வாடிக்கையாளர்களின் உரிமைகள் தொடர்பான அறிவிப்புகள் தமிழ் உள்ளிட்ட மாநில மொழிகளில் அனைத்து வங்கிக் கிளைகளிலும் தெளிவாகக் காட்சிப்படுத்தப்பட வேண்டும்.
புதுச்சேரியில் கடந்த ஆண்டு அரசு நிகழ்ச்சியில் பங்கேற்ற ஒன்றிய நிதி அமைச்சர் நிர்மலா சீதாராமன் புதுச்சேரியில் சிறு, குறு,நடுத்தர தொழில் வளர்ச்சிக்காக பல ஆயிரம் கோடி கடன் அளித்திருப்பதாகவும், அதன் மூலம் வேலைவாய்ப்பு பெருகி இருப்பதாகவும் தெரிவித்திருந்தார். அதன்படி, புதுச்சேரியில் உள்ள வங்கிகள் மூலம் எவ்வளவு சிறு, குறு தொழில்களுக்கு கடன் வழங்கப்பட்டுள்ளது என்பது குறித்தும், முத்ரா, ஸ்டார்ட்–அப் திட்டங்களில் எவ்வளவு பேருக்கு வங்கி கடனளித்திருக்கிது என்பது குறித்தும், ஏழை, எளிய மக்கள் சிறு கடன் பெற்றவர் அடங்கியவெள்ளை அறிக்கை ஒன்றைபுதுச்சேரி அரசு வெளியிட வேண்டும்.
வாடிக்கையாளர்களின் பாதுகாப்பு முக்கியம்!
வங்கிகள் மக்களுக்காக இருக்க வேண்டும். மக்கள் வங்கிகளுக்காக வாழ வேண்டிய நிலை ஏற்படக் கூடாது. சேமிப்பாளரின் பணமும் பாதுகாக்கப்பட வேண்டும்; கடன் வாங்கியவரின் கண்ணியமும் பாதுகாக்கப்பட வேண்டும். சட்டம் வங்கிகளுக்கு மட்டும் கவசமாக இருக்கக் கூடாது.சாதாரண மக்களுக்கும் பாது காப்பாக இருக்க வேண்டும்.வங்கி வாடிக்கையாளர்களின் உரிமைகளைப் பாதுகாக்கும் போராட்டத்தில் தி.மு.க. மக்கள் பக்கம்
உறுதியாக நிற்கும்.
இவ்வாறு பேசினார்.
இந்தக் கண்டன ஆர்ப்பாட்டத்தில், தி.மு.க. பொதுக்குழு உறுப்பினர் இளம்பரிதி, தொகுதி செயலாளர்கள் நடராஜன், வடிவேல், தியாகராஜன், மகளிர் அணி அமைப்பாளர் காயத்ரி, அமைப்பு சாரா ஓட்டுநர் அணி அமைப்பாளர் மதிமாறன், நெசவாளர் அணி அமைப்பாளர் செந்தில்குமரன், மாநில துணை அமைப்பாளர்கள் சிவதாஸ், சிவா, உருளையன்பேட்டை தொகுதி பொருளாளர் சசிகுமார் உள்ளிட்டபலர் கலந்து கொண்டனர்.