மாதவரம், ஜூலை 8–
சென்னை வடகிழக்கு மாவட்டம் மாதவரம் சட்டமன்ற தொகுதிக்குட்பட்ட மணலி மண்டலம் 2 பெருநகர சென்னை மாநகராட்சி வார்டுகள் 15, 16, 17, 19 ஆகிய இடங்களில் அமைக்கப்பட்டுள்ள பேருந்து நிழற்குடைகளில், திராவிட மாடல் அரசின் சாதனைகள் மற்றும் முன்னாள் முதலமைச்சர் கழகத் தலைவர் மு. க. ஸ்டாலின் அவர்களின் படங்களையும் அதிகாரிகள் அகற்றி வருகின்றனர். இதற்கு கழக நிர்வாகிகள் கடும் கண்டனம் தெரிவித்து வாக்குவாதத்தில் ஈடுபட்டனர்.
மாதவரம் வடக்கு பகுதிக்கு உட்பட்ட 15, 16, 17,19 ஆகிய வார்டுகளில் உள்ள முக்கிய சந்திப்புகளில் திராவிட மாடல் அரசில் பேருந்து நிழற்குடைகள் பெருநகர சென்னை மாநகராட்சி சார்பில் சட்டமன்ற உறுப்பினர் மற்றும் கவுன்சிலர்கள் வார்டு மேம்பாட்டு நிதியில் அமைக்கப்பட்டது. இந்த நிழற்குடைகள் அமைக்கப்பட்ட இடங்களில் பொதுமக்கள் மழைக்காலங்களிலும்,கடுமையான வெயில்களிலும் இதை பயன்படுத்தி வந்தனர். இந்த பேருந்து நிழற்குடைகளில் திராவிட மாடல் அரசின் சாதனைகளான மகளிர் உரிமைத் தொகை, விடியல் பயணம்,நான் முதல்வன், தமிழ் புதல்வன், இல்லம் தேடி கல்வி, உங்களைத் தேடி மருத்துவம் போன்ற திட்டங்களுடன் முதலமைச்சராக இருந்த மு.க. ஸ்டாலின் அவர்களின் புகைப்படங்களும் பொருத்தப்பட்டிருந்தது.
கவுன்சிலர்களுடைய பதவிக்காலம் இன்னும் மாத கணக்கில் இருக்கும் நிலையில், பெருநகர சென்னை மாநகராட்சி அதிகாரிகள் அவசர கதியில் இந்த விளம்பரங்களை யும், முன்னாள் முதலமைச்சர் கழக தலைவர் மு. க. ஸ்டாலின் அவர்களின் படங்களையும் அகற்றி வருகின்றனர். அதோடு மட்டுமல்லாமல் பல லட்ச ரூபாய் செலவில் அமைக்கப்பட்ட பேருந்து நிழற்குடைகளில் உள்ள கம்பிகளை சிதைக்கும் வகை யிலும் வெட்டி எடுத்து சேதப்படுத்தி வருகிறார்கள்.
அரசியல் பழி வாங்கும் நோக்கத்துடன் முன்னாள் முதல்வரின் திட்டங்கள் குறித்த விளம்பர பலகையை அகற்ற சென்னை மாநகராட்சி அதிகாரிகள் துரிதமாக செயல்பட்டு அகற்றி வருவதை அறிந்த, மாதவரம் வடக்கு பகுதி செயலாளர் புழல் எம். நாராயணன், 16 வது வட்ட செயலாளர் இ.கண்ணப்பன், பகுதி துணை செயலாளர் கே. சிவசங்கரன், நா. மோகன் குமார், பா. சந்திரன், பகுதி இளைஞரணி துணை அமைப்பாளர் எலந்தனூர் வி. சிவப்பிரகாஷ், வட்ட இளைஞரணி துணை அமைப்பாளர் விக்னேஷ் உள்ளிட்ட கழகத்தினர், 16வது வார்டு ஆண்டாள் குப்பத்தில் உள்ள பேருந்து நிறுத்தம் அருகே சென்று நிழற்குடையை அகற்றிக் கொண்டு இருந்த உதவி பொறியாளர் மற்றும் மாநகராட்சி ஊழியர்களுடன் அகற்றுவதை நிறுத்த கோரிக்கை வைத்தனர்.
ஆனால் உதவி பொறியாளர் தனக்கு மேலிடத்திலிருந்து உத்தரவு வந்திருப்பதால் இதை அகற்றி தான் ஆக வேண்டும் என்று விடாப்பிடியாக அகற்றும் பணியில் ஈடுபட்டார். கவுன்சிலர்கள் பதவிக்காலம் முடிய இன்னும் பல மாதங்கள் இருக்கும் நிலையில் அவர்களது நிதியில் கட்டப்பட்ட பேருந்து நிறுத்தத்தில் உள்ள விளம்பர பலகையை அவசர கதியில் அகற்றுவதால் மக்களின் வரிப்பணம் வீணாகதோடு, அரசியல் காழ் புணர்ச்சியாக உள்ளது என்று அதிகாரிகளுடன் நிர்வாகிகள் வாக்குவாதத்தில் ஈடுபட்டனர். மேலும் உதவி பொறியாளர் உயர் அதிகாரிகளின் உத்தரவு எங்களால் நடைமுறைப்படுத்த முடியாமல் இருக்க முடியாது என்று பதில் அளித்தார். திமுக அரசின் சாதனைகளை மறைக்கும் விதத்தில், முன்னாள் முதலமைச்சர் மு க ஸ்டாலின் அவர்களின் படத்தை அகற்றிய, அதிகாரிகளின் இந்த செயல் தொடர்ந்தால் தொண்டர்களை திரட்டி போராட்டம் நடத்துவோம் என்று அதிகாரிகளிடம் மாதவரம் வடக்கு பகுதி செயலாளர் புழல் எம். நாராயணன் தலைமையிலான திமுகவினர் தெரிவித்தனர். ஆனாலும் திமுகவினரின் எதிர்ப்பை மீறியும் அரசியல் காழ்ப்புணர்ச்சி காரணமாக பதவிக்காலம் முடிவதற்கு முன்பே கவுன்சிலர்கள் மேம்பாட்டு நிதியில் வைக்கப்பட்ட பேருந்து நிழல் குடைகளில் பொருத்தப்பட்டுள்ள முன்னாள் முதலமைச்சர் கழக தலைவர் மு. க. ஸ்டாலின் அவர்களின் படங்களும் திராவிட மாடல அரசின் சாதனைகளும் அகற்றப்பட்டு வருகின்றது.
மேலும் இதுபோன்ற பெருநகர சென்னை மாநகராட்சியின் அதிகாரிகளின் செயல்களை பொதுமக்களும் ஒன்று கூடி கண்டித்தனர்.
மாதவரம் சட்டமன்றத் தொகுதி 16-வது வட்டம் ஆண்டார்குப்பம் பகுதியில் உள்ள மாநகராட்சி பேருந்து நிழற்குடையில் உள்ள முன்னாள் முதலமைச்சர் கழக தலைவர் மு.க.ஸ்டாலின் அவர்களின் படம் மற்றும் திராவிட மாடல் அரசின் சாதனைகளை விளக்கி இருந்த விளம்பரங்கள் மாநகராட்சி அதிகாரிகளால் அகற்றப்பட்ட போது மாதவரம் வடக்கு பகுதி செயலாளர் புழல் எம்.நாராயணன் மற்றும் நிர்வாகிகள் நேரில் சென்று அதிகாரிகள் மற்றும் ஊழியர்கள் படங்களை அகற்றக்கூடாது என்று எதிர்ப்பு தெரிவித்தனர். உடன் வட்டச் செயலாளர் இ. கண்ணப்பன், கே. சிவசங்கரன், எலந்தனூர் வி. சிவ பிரகாஷ், விக்னேஷ் உள்ளிட்ட பலர் உள்ளனர்.