கோவை, ஜூலை 8 –
தமிழக வரலாற்றில் அரசு வழக்கறிஞர்கள் இல்லாமல் நீதிமன்றங்கள் செயல்பட்டது கிடையாது. அரசு வழக்கறிஞர்கள் நியமிக்கப்படாதது அரசு நிர்வாகத்தின் மிகப்பெரிய தவறு, அரசியலமைப்பு சட்டம் வகுத்திருக்கக்கூடிய விதிகள் மீறப்பட்டுள்ளன என்று வழக்கறிஞர் கோபாலகிருஷ்ணன் பத்திரிகையாளர்களிடம் கூறினார்.
கோவை மாவட்டத்தில் அரசு வழக்கறிஞர்களை நியமிக்காததால் கடந்த 5 நாட்களில் 300 வழக்குகள் தேக்கமடைந்துள்ளதாக குற்றச்சாட்டு எழுந்துள்ளது.
தமிழ்நாட்டில் கடந்தஜூன் 30ம் தேதியுடன் அரசுவழக்கறிஞர்களின் பணிக்காலம் முடிவடைந்தது.
அதன்பின், ஒரு வாரம் ஆகியும் அரசு வழக்கறிஞர்கள் நியமிக்கப்படாமல் உள்ளதால் வழக்குகள் தேக்கம் ஏற்பட்டுள்ளதாகவும், உடனே அரசு வழக்கறிஞர்களை அதிகாரப்பூர்வமாக அறிவிக்க வேண்டும் என வழக்கறிஞர்கள் கோரிக்கை விடுத்து வருகின்றனர்.
இந்நிலையில், கோவை நீதி மன்றத்தில் நேற்று முன்தினம்வழக்கறிஞர் கோபால கிருஷ்ணன் பத்திரிகை
யாளர்களை சந்தித்தார்.
அப்போது அவர் கூறியதாவது:-–
சட்டமன்றத் தேர்தல் முடிந்து கடந்த 60 நாட்களாக உட்கட்சி பிரச் சினை, கட்சி தாவல், குதிரை பேரம், சோபா மாடல் போன்ற செய்திகள் மட்டுமே அதிகமாக வெளிவந்து கொண்டிருக்கின்றன.
ஆனால், நீதிமன்றத்தில் மிகப்பெரியபிரச்சினை நிலவிவருகிறது. தமிழ்நாட்டில் உள்ளபெரும்பான்மையான கீழமை நீதிமன்றங்களில் அரசு வழக்க றிஞர்கள் கடந்த 5 நாட்களாக நியமிக்கப்படாத தால் பல்வேறு சிக்கல்கள் ஏற்பட்டுள்ளன. இது அரசியல் அமைப்பு சட்டத்திற்கு எதிரானது.
தமிழக வரலாற்றில் அரசு வழக்கறிஞர்கள் இல்லாமல் நீதிமன்றங்கள் செயல்பட்டது கிடையாது. அரசு வழக்கறிஞர்கள் நியமிக்கப்படாதது அரசு நிர்வாகத்தின் மிகப்பெரிய தவறு, இதனால் அரசியலமைப்பு சட்டம் வகுத்திருக்கக்கூடிய விதிகள் மீறப்பட்டுள்ளன. தற்போது கோவையில் 24 பேர் அரசு வழக்கறிஞர்களாக நியமிக்கப்பட உள்ளதாக அரசு தரப்பில் தெரிவிக்கப்பட்டுள்ளது. ஆனால், அதற்கு உரிய அரசாணை இன்னும் வெளி வரவில்லை.
அரசு வழக்கறிஞர் இன்மையால் கோவை மாவட்ட நீதிமன்றத்தில் கடந்த 5 நாட்களில் சுமார் 300க்கும் மேற்பட்ட பிணை வழக்குகள், சிவில் வழக்குகள் தேக்கமடைந்து இருக்கிறது. எனவே உரிய அரசாணை பிறப்பித்து அரசு வழக்கறிஞர்கள் விரைவில் நியமிக்க வேண்டும் என்று அவர் கூறினார்.