சென்னை, ஜூலை 8–
அரசுப் பள்ளியில் ஆய்வு என நேற்று முன்தினம் ‘ரீல்ஸ்’ வெளியிட்ட ‘ரீல்ஸ் புகழ்’ அமைச்சர் கீர்த்தனா, அந்தப் பள்ளிச் சிறுமியிடம் நடந்து கொண்ட விதம் அனைத்துத் தரப்பிலிருந்தும் கடும் கண்டனத்திற்குள்ளாகியுள்ளது.
இதையொட்டி, தி.மு.க. அயலக அணி சார்பில் நேற்று முன்தினம் வெளியிடப்பட்ட வலைதளப் பதிவில், ‘‘குழந்தைகளிடம் எப்படிப் பேச வேண்டும் என்கிற அடிப்படைப் பண்பு கூட இல்லாமல் நடந்து கொண்ட அமைச்சர் கீர்த்தனாவின் செயல் வன்மையாகக் கண்டிக்கத்தக்கது’’ என கடும் கண்டனம் தெரிவிக்கப்பட்டுள்ளது.
அந்த வலைதளப் பதிவு வருமாறு:–
“Hands off to all of you” அல்ல.
அது “Hats off to all of you”.
“Stand such a wonderful” அல்ல.
அது “Stand in front of such a wonderful...”.
மூன்று பேரின் பெயர்களைச் சொன்னால், அதற்கடுத்து பயன்படுத்த வேண்டியது ‘has’ அல்ல, ‘have’.
“Any of the sports minister” அல்ல.
அது “Any of the sports ministers”.
“have a breakfast” அல்ல.
அது “have breakfast”.
அமைச்சர் கீர்த்தனா மேடைகளில் பேசும் ஆங்கிலத்தில் பல அடிப்படைப் பிழைகள் இருந்தாலும், தி.மு.க. தரப்பில் இருந்து யாரும் அதை ஒரு குறையாகச் சுட்டிக்காட்டி விமர்சிக்க வில்லை. ஏனென்றால், மொழி என்பது வெறும் தொடர்பு சாதனம் மட்டுமே. ஒருவருக்கு மொழியை விடச் செயல்பாடுகளே முக்கியம் என்பது எங்களுடைய நம்பிக்கை.
ஆனால், இவ்வளவு பெரிய பொறுப்பில் இருக்கும் ஒரு அமைச்சர், பள்ளிகளுக்கு ஆய்வுக்குச் செல்லும்போது குழந்தைகளிடம் எப்படிப் பேச வேண்டும் என்கிற அடிப்படைப் பக்குவம் கூட இல்லாமல் நடந்துகொள்வதுதான் வன்மையாகக்
கண்டிக்கத்தக்கது.
பள்ளிகளுக்குச் செல்லும்போது மாணவர்களை ஊக்கப்படுத்த வேண்டும். பெண் குழந்தைகளுக்குக் கல்வியின் அவசியத்தை உணர்த்தி அவர்களின் எதிர்காலத்திற்குத் தன்னம்பிக்கை கொடுக்க வேண்டும்.
அதை விடுத்து, மாணவர்களின் தன்னம்பிக்கையை உடைக்கும் வகையிலும், அவர்கள் பள்ளிக்கே வர பயப்படும் வகையிலும் நடந்துகொள்வது ஒரு அமைச்சருக்கு அழகல்ல.
மாணவச் செல்வங்களிடம் தாழ்வு மனப்பான்மையை வளர்க்கும் இதுபோன்ற அமைச்சர்கள் பள்ளிகளுக்குள் செல்லாமல் இருப்பதே நல்லது.
குழந்தைகளிடம் எப்படிப் பேச வேண்டும், அவர்களுக்கு எவ்வாறு நம்பிக்கை கொடுக்க வேண்டும் என்பதை த.வெ.க. அமைச்சர்கள் முதலில் கற்றுக்கொள்ள வேண்டும்!
இவ்வாறு அவ்வலைதளப் பதிவில் தெரிவிக்கப்பட்டுள்ளது.