மும்பை, ஜூலை.8–
மகாராஷ்டிரா மாநிலம் மும்பை மற்றும் புனே இடையேயான மலைப்பாதையில் நேற்று முன்தினம் பெய்த அதி தீவிர கனமழை காரணமாக திடீர் நிலச்சரிவு ஏற்பட்டது. இதனால்,தண்டவாளங்களில் பெரும்பாறைகள் உருண்டு விழுந்ததால் இரு நகரங்களுக்கு இடையேயான ரயில் மற்றும் சாலை போக்குவரத்து சேவை முற்றிலும் துண்டிக்கப்பட்டு மக்கள் கடும் அவதிக்குள்ளாகினர்.
இந்த இக்கட்டான சூழ்நிலை குறித்து ஒன்றிய ரயில்வே அமைச்சர் அஸ்வினி வைஷ்ணவ் நேரில்
ஆய்வு செய்து, ‘மும்பை மற்றும் புனே மலைப்பாதையில் நிலச்சரிவு ஏற்பட்டு, ரயில் தண்டவாளங்களில் பாறைகள் விழுந்ததால் உருவான தற்போதைய நிலைமையை ஆய்வு செய்துள்ளேன். சீரமைப்பு பணி களில் மீட்புக் குழுவினர் முழு வீச்சில் ஈடுபட்டு வருகின்றனர். இன்றும் பலத்த மழை பெய்ய வாய்ப்புள்ளதால், ரயில் சேவைகளை விரைவாக மீட்டெடுக்க மேற்கு மற்றும் மத்திய ரயில்வே அதிகாரிகள் இணைந்து ஒரே குழுவாக செயல்படுமாறு அறிவுறுத்தியுள்ளேன்’ என்று கூறினார்.
மத்திய ரயில்வே மண் டலத்தின் கர்ஜத் மற்றும் லோனாவாலா இடை யேயான தென்கிழக்கு மலைப் பாதையில் உள்ள தாக்கூர் வாடி மற்றும் மங்கி ஹில் லூப் கேபின் இடையே ஏற்பட்ட இந்த நிலச்சரிவால் துலே எக்ஸ்பிரஸ் உள்ளிட்ட 16 ரயில்கள் ரத்து செய்யப்பட்டன. மேலும், அகமதாபாத்–கோலாப்பூர் எக்ஸ்பிரஸ், சென்னை எக்மோர்–சிஎஸ்எம்டி மெயில் உள்ளிட்ட பல தொலை தூர ரயில்கள் மாற்றுப் பாதையில் திருப்பி விடப்பட்டன. உள்ளூர் மின்சார ரயில்கள் வழக்கம் போல் இயக்கப்பட்டாலும், முதன்மை வழித்தடத்தில் 6 முதல் 8 நிமிடங்களும், துறைமுக வழித் தடத்தில் 4 நிமிடங்களும் தாமத மாக இயக்கப்பட்டன.
இதேபோல், மும்பை – புனே அதிவேக நெடுஞ்சா லையில் உள்ள கண்டாலா வெளியேறும் பகுதிக்கு அருகே உள்ள மிஸ்சிங் லிங்க் பகுதியில் ஏற்பட்ட பெரிய நிலச்சரிவால் சாலைப் போக்குவரத்தும்முடங்கியது. பாதுகாப்பு காரணங்களுக்காக அதிகாலை 4 மணி முதல் வாகனங்கள் மாற்றுப் பாதையில் திருப்பி விடப்பட்டதாக மகாராஷ்டிரா மாநில சாலை மேம்பாட்டுக் கழகம் தெரிவித்துள்ளதுடன், நெடுஞ்சாலை போக்குவரத்து போலீசாருடன் இணைந்து நிலைமையை கண்காணித்து வருவதாக தெரிவித்தது.
ரயில் சேவைகள் பாதிக்கப்பட்டதால் மும்பையின் புகழ்பெற்ற டப்பாவாலாக்கள் தங்களது உணவு விநியோக சேவையை தற்காலிகமாக நிறுத்தினர். மாவட்ட தகவல் அலுவலகம் வெளியிட்டுள்ள எச்சரிக்கையில், பொதுமக்கள் தங்களது பயணங்களை தற்காலிகமாக ஒத்திவைக்குமாறு கேட்டுக்கொண்டுள்ளது.