திருவள்ளூர், ஜூலை 10–-
திருவள்ளூர் அருகே சிறுவானூர் ஊராட்சிக்குட்பட்ட ஜே.ஜே. கார்டன் புதிய குடியிருப்பு பகுதியில் கடந்த ஒரு வாரத்தில் அடுத்தடுத்து நான்கு வீடுகளில் பூட்டை உடைத்து பணம், தங்கம் மற்றும்வெள்ளிப் பொருட்கள் கொள்ளையடிக்கப்பட்ட சம்பவங்கள் அப்பகுதி மக்களிடையே கடும் அச்சத்தை ஏற்படுத்தியுள்ளன.
ஒரே பகுதியில் குறுகிய கால இடைவெளியில் தொடர்ச்சியாக நடந்துள்ள இந்தச் சம்பவங்கள், அப்பகுதியின் பாதுகாப்பு ஏற்பாடுகள் குறித்து கேள்விகளை எழுப்பியுள்ளன.
சுமார் 500-க்கும் மேற்பட்ட குடும்பங்கள் வசிக்கும் இந்தப் பகுதியில் பெரும்பாலானோர் தனியார் தொழிற்சாலைகளில் பணிபுரிகின்றனர். பலர் இரவு நேரப் பணிக்குச் செல்வதால், வீடுகளில் பெண்கள், முதியவர்கள் மற்றும் குழந்தைகள் மட்டும் இருக்கும் சூழல் நிலவுவதாக அப்பகுதி மக்கள் தெரிவிக்கின்றனர். இந்த நிலையில் தொடர்ந்து நடைபெறும் கொள்ளைச் சம்பவங்கள் அவர்களின் அச்சத்தை மேலும் அதிகரித்துள்ளதாக கூறப்படு
கிறது.
நேற்று இரவு முனி ரத்தினம் என்பவரின் வீட்டின் பூட்டை உடைத்து ரூ.22 ஆயிரம் ரொக்கம் திருடப்பட்ட தாகவும், சிவகுமார் என்பவரின் வீட்டில்கொள்ளை முயற்சி நடைபெற்றதாகவும் புகார் அளிக்கப்பட்டுள்ளது. தகவலறிந்த புல்லரம்பாக்கம் போலீசார் சம்பவ இடத்திற்குச் சென்று கைரேகை நிபுணர்கள் மற்றும் மோப்பநாய் உதவியுடன் தடயங்களைச் சேகரித்து விசாரணையை மேற்கொண்டுள்ளனர்.
இதற்கு முன்பு, அதே பகுதியில் ஆசிரியர் உதயகுமாரியின் வீட்டில் ரூ.20 ஆயிரம் ரொக்கமும் வெள்ளிப் பொருட்களும், அருணகிரி என்பவரின் வீட்டில் 2 சவரன் தங்க நகைகளும் ரூ.40 ஆயிரம் ரொக்கமும் கொள்ளையடிக்கப்பட்டதாக ஏற்கனவே புகார்கள் பதிவு செய்யப்பட்டு விசாரணை நடைபெற்று வருகிறது.
ஒரே குடியிருப்பில் மீண்டும் மீண்டும் நடைபெறும் சம்பவங்கள் குற்றவாளிகள் குறித்து விரைந்து நடவடிக்கை எடுக்க வேண்டிய தேவையை வலியுறுத்துகின்றன.
அப்பகுதி மக்கள் கூறுவதாவது, இரவுநேரங்களில் காவல்துறை ரோந்து அதிகரிக்கப்பட வேண்டும், புதிய குடியிருப்புகள் மற்றும் மக்கள் அதிகம் வசிக்கும் பகுதிகளில் நிரந்தர கண்காணிப்பு ஏற்படுத்தப்பட வேண்டும், முக்கியச் சாலைகள் மற்றும் தெருக்களில் கூடுதல் மின்விளக்குகள் மற்றும் கண்காணிப்பு கேமராக்கள் அமைக்கப்பட வேண்டும் என்பதாகும். குற்றவாளிகளை விரைந்து கைது செய்து, இதுபோன்ற சம்பவங்கள் மீண்டும் நடைபெறாத வகையில் உறுதியான பாதுகாப்பு நடவடிக்கைகள் எடுக்கப்பட வேண்டும் என்றும் அவர்கள் வலியுறுத்துகின்றனர்.
சட்டம்-ஒழுங்கைப் பேணுவது மற்றும் பொதுமக்களின் உயிர், உடைமை பாதுகாப்பை உறுதி செய்வது அரசின் அடிப்படைப் பொறுப்பாகும். தொடர்ச்சியாக நடைபெறும் குற்றச் சம்பவங்கள் குறித்து காவல்துறை தீவிர விசாரணை மேற்கொண்டு, குற்றவாளிகளை விரைந்து கைது செய்வதோடு, பொதுமக்களிடம் பாதுகாப்பு நம்பிக்கையை ஏற்படுத்தும் வகையில் கண்காணிப்பு மற்றும் ரோந்து பணிகளை மேலும் வலுப்படுத்துவது அவசியம் என்ற கருத்து சமூக ஆர்வலர்கள் மற்றும் அப்பகுதி மக்களிடையே வலுத்து வருகிறது.