தேனி, ஜூலை 11–
திருவில்லிபுத்தூர் - மேகமலை புலிகள் காப்பகத்திற்கு உட்பட்ட வருசநாடு வனப்பகுதிகளில் அதிக அளவில் நில ஆக்கிரமிப்புகள் நடைபெறுவதாகவும், மலைச்சரிவுகளில் மரங்களை வெட்டி ஏலக்காய், இலவம் பஞ்சு பயிரிடுவதாகவும் புகார் எழுந்துள்ளது.
வைகை ஆற்றின் முக்கிய நீர்பிடிப்பு பகுதியான திருவில்லிபுத்தூர் - மேகமலை புலிகள் காப்பகத்தில் சட்டவிரோத ஆக்கிரமிப்புகள் அதிகரித்து வருவ தாக தெரிவித்த உச்சநீதிமன்றம், 6 மாதங்களில் துணை ராணுவ படை உதவியுடன் ஆக்கிரமிப்புகளை அகற்ற அதிரடி உத்தரவு பிறப்பித்துள்ளது.
இதனால் 3 தலைமுறைகளாக மலைப்பகுதிகளில் விவசாயம் செய்து வரும் லட்சக்கணக்கான விவசாயிகள் கலக்கமடைந்துள்ளனர்.
தேனி தெற்கு தி.மு.க. ஆலோசனை!
இப்பிரச்சினை குறித்து தேனி தெற்கு மாவட்ட தி.மு.க. சார்பில் மயிலாடும்பாறை தி.மு.க. கட்சி அலுவலகத்தில் மலை கிராம விவசாயிகளுடன் ஆலோசனைக் கூட்டம் நடைபெற்றது.
கூட்டத்திற்கு தெற்கு மாவட்டக் கழகச் செயலாளர் கம்பம் ராமகிருஷ்ணன் தலைமை தாங்கினார்.
ஆண்டிப்பட்டி சட்டமன்ற உறுப்பினர் மகா ராஜன் கலந்து கொண்டார்.
நிறைவேற்றப்பட்ட முக்கிய தீர்மானம் வருமாறு: –
100 ஆண்டுகளுக்கும் மேலாக இப்பகுதியில் பாரம்பரியமாக விவசாயம் செய்து வரும் சுமார் 2 லட்சம் மக்களின் வாழ்வாதாரத்தை பாதுகாக்கும் வகையில், தற்போதைய த.வெ.க அரசு போதிய ஆதாரங்களுடன் உடனடியாக உச்சநீதிமன்றத்தில் மேல்முறையீட்டு சீராய்வு மனுவை தாக்கல் செய்ய வேண்டும்.
முதலமைச்சர் ஜோசப் விஜய் இதில் உடனடியாக தலையிட்டு நடவடிக்கை எடுக்க வேண்டும் என தீர்மானம் நிறைவேற்றப் பட்டது.
மேலும், இது தொடர்பாக சட்டமன்ற உறுப்பினர் மகாராஜன் கடந்த ஒரு மாதத்திற்கு முன்பு முதலமைச்சருக்கு எழுதிய கடிதத்திற்கு இதுவரை பதில் கிடைக்கவில்லை எனவும், மக்களின் வாழ்வாதாரத்தை காக்க அரசு விரைந்து செயல்பட வேண்டும் எனவும் வலியுறுத்தப்பட்டது.
இக்கூட்டத்தில் கட மலை-மயிலை தெற்கு ஒன்றியக் கழகச் செயலாளர் வக்கீல் சுப்பிரமணி, வடக்கு ஒன்றியக் கழகச் செயலாளர் தங்கப்பாண்டி, மாவட்ட விவசாய அணி ஜெயபால், மாநில பொதுக்குழு உறுப்பினர் சேரன், முன்னாள் ஒன்றியக் கவுன்சிலர்கள், ஊராட்சி மன்றத் தலைவர்கள் மற்றும் கிளைக் கழக நிர்வாகிகள், கழக முன்னணியினர் பலரும் கலந்து கொண்டனர்.