#Title

அயோத்தி ராமர் கோயில் நன்கொடையில் திருடப்பட்ட பணம் பங்குச் சந்தையில் முதலீடு ! குற்றவாளிகளின் வங்கிக் கணக்குகள் முடக்கம் !

அயோத்தி, ஜூலை 11–

பா.ஜ.க. ஆளும் உத்தரப்பிரதேச மாநிலம் அயோத்தியில் உள்ள ராமர் கோயிலில் நன்கொடைகளை எண்ணும் பணியில் முறைகேடுகள் நடந்ததாகக் கண்டறியப்பட்டதைத் தொடர்ந்து, சர்ச்சை வெடித்துள்ளது.

முறைகேடு தொடர்பாக 8 பேர் மீது வழக்குப்பதிவு செய்து சிறப்பு புலனாய்வுக் குழு விசாரணை நடத்தி வருகிறது.

திருடப்பட்ட நன்கொடைப் பணம் பங்குச் சந்தையில் முதலீடு செய்யப்பட்டதையும், வட்டிக்குக் கடன் கொடுக்கப்பட்டதையும் முக்கிய குற்றவாளி அனுகல்ப் மிஷ்ரா மற்றும் மற்றொரு குற்றவாளியான அவினாஷ் ஆகியோர் ஒப்புக்கொண்டதாகத் தகவல்கள் தெரிவிக்கின்றன.

பணத்தை அவர்கள் நெருங்கிய கூட்டாளிகள் மற்றும் உறவினர்களிடையே பகிர்ந்தளித்ததாகவும், பின்னர் பரிவர்த்தனைகளை மறைப்பதற்காக அந்த நிதியைத் தங்கள் சொந்த வங்கிக் கணக்குகளுக்குத் திரும்ப மாற்றிக்கொண்டதாகவும் கூறப்படுகிறது.

இதுதொடர்பாக, குற்றவாளிகள் மற்றும் அவர்களின் உறவினர்களுக்குச் சொந்தமான 30 வங்கிக் கணக்குகள் முடக்கப்பட்டுள்ளதாக தெரிவிக்கப்பட்டுள்ளது.