தன்னுடைய அலட்சியத்தினாலும் பொறுப்பின்மையினாலும் கரூரில் 41 உயிர்கள் பலியானது குறித்து கொஞ்சம்கூட இரக்கமேயில்லாமல், மனசாட்சியைத் தூக்கியெறிந்துவிட்டு, இடைத்தேர்தலுக்கான பிரச்சாரத்தை ஜூலை 10 அன்று நடத்தியிருக்கிறார் முதலமைச்சர் விஜய்.
சினிமாவில் விஜய் ஹீரோவாக இருக்கலாம். அரசியல் மேடையில் கோமாளியாக, அதுவும் பொய்யை மட்டுமே பேசி, சொந்தக் கட்சிக்காரர்களிடம் கைதட்டல் வாங்கும் கொடூரக் கோமாளியாகத் தன்னை வெளிப்படுத்தியுள்ளார்.
2025ஆம் ஆண்டு செப்டம்பர் 27ஆம் நாள் ஏறத்தாழ 7 மணி நேரம் தாமதமாக கரூருக்கு விஜய் பிரச்சாரம் செய்யச் சென்றதால், நீண்ட நேரம் காத்திருந்த கூட்டத்தினர் நெரிசலுக்குள்ளாகியும், தண்ணீர் இல்லாமல் மயங்கியும் மருத்துவமனைக்குக் கொண்டு செல்லப்பட்ட நிலையில், கூட்டத்தினரில் 41 பேர் இறந்து போனார்கள். அப்போதைய திராவிட மாடல் அரசும் அதன் முதலமைச்சரும் விரைந்து நடவடிக்கை எடுத்ததுடன், முதலமைச்சரே உடனடியாக கரூர் சென்று நிலவரத்தை அறிந்து, உயிர்ப்பலிகள் மேலும் அதிகமாகாமல் பாதுகாத்தார். ஆனால், இந்த ரீல் ஹீரோ விஜய், தனக்காகக் காத்திருந்தவர்கள் பலியாவதைப் பார்த்தபடியே, எந்தச் சலனமும் இல்லாமல் பிரச்சார வாகனத்தை விட்டு இறங்கி, காரில் திருச்சிக்கு விரைந்து வந்து, அங்கிருந்து சென்னைக்கு விமானத்தில் பறந்து வந்தார்.
திருச்சி விமான நிலையத்தில் விஜய்யை ஊடகத்தினர் பார்த்ததும், “சார்.. 30 பேருக்கு மேல செத்துப் போயிருக்காங்க சார்.. ஏதாவது சொல்லிட்டுப் போங்க சார்” என்று கேட்டபோது, அவர்களுக்கு முதுகு காட்டியபடி ஓட்டமும் நடையுமாகச் சென்ற பொறுப்பற்ற கோழைதான் விஜய். அதன்பிறகு, கரூர் பக்கமே வரவில்லை. தேர்தல் பிரச்சாரத்திற்கும் கரூருக்கு வரவில்லை. 285 நாட்கள் கழித்து, கரூருக்கு வந்து முதலைக் கண்ணீர் வடித்திருக்கிறார் முதலமைச்சர்.
41 உயிர்ப்பலிகளுக்கு இவர் மீது பழி போட்டுவிட்டதாம் தி.மு.க. அரசு. தமிழ்நாடே விஜய்யின் இரக்கமற்ற தன்மையை விமர்சித்த நிலையில், அன்றைய முதலமைச்சர் நம் கழகத் தலைவர்தான், ‘‘எந்த ஓர் அரசியல் தலைவரும் தன் தொண்டர்கள் இறப்பதை விரும்பமாட்டார்கள்” என்று தனக்கே உரிய அரசியல் முதிர்ச்சியுடன் அறிவித்தார். கத்துக்குட்டியும் வெத்துவேட்டுமான விஜய், திரும்பத் திரும்ப தன் மீது பழி போட்டதாகப் பொய் பேசித் திரிகிறார்.
தேர்தலுக்கு முன் தொடங்கிய விஜய்யின் பொய்ப் பிரச்சாரம், இடைத்தேர்தல் வரக்கூடிய நேரத்திலும் முடியவில்லை. அதே மேடை, அதே நாடகம், அதே பொய்.
கரூரில் ஜூலை 10ந் தேதி அவர் செய்த பிரச்சாரத்தில் ஏதேனும் ஒரேயொரு உண்மை பேசியிருப்பாரா? அத்தனையும் பொய்கள்தான். அதில் ஒரு சிலவற்றைப் பார்க்கலாம்.
பொய் 1- –
த.வெ.க. ஆட்சி வந்ததும் இலஞ்சமும் ஊழலும் ஒழிந்துவிட்டதாம். பொதுமக்களிடம் யாராவது இலஞ்சம் கேட்டால், விஜய் ஆட்சி நடக்கிறது என்று சொல்ல வேண்டுமாம். சென்னை திருவொற்றியூரில் வீடு கட்டும் நடுத்தரக் குடும்பத்துப் பெண்மணியிடம் த.வெ.க நிர்வாகி லஞ்சப் பணம் கேட்டு தொந்தரவு செய்வதையும், பணம் தராவிட்டால் வீடு கட்ட முடியாது என மிரட்டுவதாகவும் ஊடகத்தினரிடம் கண்ணீருடன் பேசியிருக்கிறார்கள். த.வெ.க. வழக்கறிஞர் அமைப்பின் நிர்வாகியே, அரசு வழக்கறிஞர் பதவிக்கு 10 இலட்சம் முதல் 30 இலட்சம் வரை லஞ்சம் கேட்கிறார்கள் என்று, அமைச்சர் புஸ்ஸி ஆனந்த் பெயரை இழுத்துப் புகார் செய்திருக்கிறார். என்ன நடவடிக்கை எடுத்துவிட்டார் விஜய்?
செங்கல் சூளையில் வசூல், வாரச்சந்தையில் வசூல் மிரட்டல் என த.வெ.க.வினரின் அடாவடிகள் நாள்தோறும் வெளிப்படுகின்றன. அண்மையில்
த.வெ.க.வில் சேர்த்துக்கொள்ளப்பட்டிருக்கும்
அ.தி.மு.க.வின் முன்னாள் அமைச்சர்களான இரண்டு விஜயபாஸ்கர்களை வைத்துக்கொண்டு, அதிலும் ஒரு விஜயபாஸ்கரை மேடையிலேயே வைத்துக்கொண்டு, ‘ஊழலை ஒழித்துவிட்டோம்’ என்று எப்படித்தான் சிரிக்காமல் ‘பஞ்ச்’ டயலாக் பேசுகிறார் முதல்வர் விஜய்?
பொய் 2 –
- த.வெ.க. ஆட்சி வந்த பிறகுதான், பொதுமக்கள் அரசு அலுவலகங்களுக்கு வந்தால், அதிகாரிகள் அவர்களை மிகுந்த மரியாதையுடன் நடத்து கிறார்களாம். இதுவும் விஜய் பேச்சுதான். அதே திருவொற்றியூரில், த.வெ.க. அரசின் நிர்வாக அவலட்சணத்தால் இரவு முழு வதும் ஏற்பட்ட மின்தடையைப் பொறுக்கமுடியாமல் மின்வாரிய அலுவலகத்திற்குச் சென்ற பொதுமக்களை அங்கிருந்த அதிகாரிகளும் அலுவலர்களும் எந்த அளவுக்கு இழிவுபடுத்தி விரட்டினர் என்பது ஊடகங்களிலேயே வீடியோவாக வெளியாகியுள்ளது. ‘ரீல்ஸ்’ முதல்வருக்கு இதையெல்லாம் பார்க்க நேரமில்லையா? விருப்பமில்லையா?
பொய் 3 –
சட்டமன்றத்தில் ‘பார்ட்டி ஃபண்ட்’ என்று விஜய் பேசத் தொடங்கியதும் எதிர்க்கட்சியான தி.மு.க.வின் சட்டமன்ற உறுப்பினர்கள் வெளியே ஓடிவிட்டார்களாம். கரூர் நாடக மேடையில் விஜய்யின் அண்டப்புளுகு வசனம் இது. ஆளுநர் உரை மீதான விவாதங்களுக்குப் பதிலளித்து முதலமைச்சர் என்ற முறையில்
விஜய் பேசும்போது, ‘பார்ட்டி ஃபண்ட்’ என்று குற்றம்சாட்டினார். எதிர்க்கட்சித் தலைவரான தி.மு.க.வின் இளைஞரணிச் செயலாளர் எழுந்து, “எந்த பார்ட்டி? எந்த பார்ட்டிக்கான ஃபண்ட் என்பதை ஆதாரத்துடன் தெரிவிக்க வேண்டும். அப்போதுதான் முதலமைச்சர் வைக்கும் குற்றச்சாட்டுக்கு எங்களால் ஆதாரங்களுடன் பதில் சொல்ல முடியும்’‘ என்று பேரவைத் தலைவரிடம் தெளிவாகச் சொன்னார். அதன்பிறகாவது, எந்த பார்ட்டி? எவ்வளவு ஃபண்ட்? என்று
சட்டமன்றத்தில் ஏதேனும் புள்ளிவிவரத்துடன் முதலமைச்சர் பேசினாரா? அவதூறுகளை மட்டுமே அவர் தொடர்ந்து பேசியதாலும், அதை பேரவைத்தலைவர் அனுமதித்ததாலும் எதிர்க்கட்சிக்குரிய ஜனநாயக நெறிமுறைப்படி தி.மு.க.வினர் வெளிநடப்பு செய்தனர்.
சட்டமன்றத்தில் ஆதாரம் காட்டிப் பேச
வக்கில்லாத விஜய்க்கு, கரூர் மேடை நாடகத்திலும் ஆதாரத்தைக் காட்டும் தெம்பில்லை.
கரூரில் கடந்த செப்டம்பரில், ‘பாட்டிலுக்கு பத்து ரூபாய்’ என்று பாட்டு பாடிய விஜய், இந்த முறை அந்தக் கரூரில் ஏன் பாடவில்லை? பாடினால், பாட்டிலுக்கு 20 ரூபாய் என்று பாடவேண்டியிருக்கும். அந்த பாட்டில் ஃபண்ட், எந்த பார்ட்டிக்கான ஃபண்ட் என்று வெளிப்படையாகப் பேச விஜய்யால் முடியுமா?
பொய் 4 –
கரூர் மாவட்டக் கழகச் செயலாளரான செந்தில்பாலாஜி எம்.எல்.ஏ ஊரைவிட்டு ஓடிவிட்டார் என்று பச்சைப் பொய் ஒன்றை விஜய் அந்த மேடையில் அவிழ்த்துவிட்டு, ‘ஓடு..ஓடு..ஓடு..’ என்று பாட்டும் பாடித் தன் தரம் இவ்வளவுதான் என்பதைக் காட்டினார்.
செந்தில்பாலாஜி எங்கே ஓடினார்? விஜய்தான் நேருக்கு நேர் எதிர்கொள்ளத் துணிச்சலின்றி, தன்னுடைய கரூர் கூட்டத்துக்கு முன்பாக செந்தில்பாலாஜியைக் கைது செய்ய வேண்டும் என்றும், கரூர் உயிர்ப்பலிகள் நடந்தபோது விசாரணை நடத்திய காவல்துறை அதிகாரிகள் ஒருவர் கூட அந்த மாவட்டத்தில் இருக்கக்கூடாது என்றும் முடிவெடுத்து, செந்தில் பாலாஜி மீது பொய்வழக்குப் போட்டும், கால்துறை யினர் மீது பணியிட மாற்ற நடவடிக்கை எடுத்துவிட்டும்தான் கரூருக்கு வந்தார். ஒரு ஹீரோவுக்கு ஏன் இத்தனை பயம்? எதற்காக அதிகாரத் துஷ்பிரயோகம்? விஜய் அரசு போட்ட பொய் வழக்கை
செந்தில்பாலாஜி சட்டரீதியாகச் சந்தித்து, முன்ஜாமீன் பெற்று, இங்குதான் இருக்கிறார். கரூரிலிருந்து கடந்த செப்டம்பர் மாதம் 27ஆம் தேதியே ஓடியவர் விஜய்தானே, அவருக்குத்தானே அவர் பாடிய பாட்டு பொருந்தும்?
பொய் 5 –
ஓட்டுக்குப் பணம் கொடுக்கும் வழக்கத்தை ஒழித்து, த.வெ.க ஆட்சிக்கு வந்துள்ளதாகப் பெருமை பேசிக்
கொள்கிறார் விஜய். த.வெ.க.வின் ஓமலூர் வேட்பாளராகப் போட்டியிட்டவர், கட்சிக் கூட்டத்திலேயே வெளிப்படையாக
‘ஓட்டுக்கு 2000 ரூபாய் கொடுத்தது’ குறித்துப் பேசியதை விஜய் வசதியாக மறந்து போய்விடுகிறார். ஒரு வேட்பாளர் வெளியே சொல்லிவிட்டார். மற்றவர்களின் யோக்கியதை இனி மெல்ல மெல்ல வெளியே வரும். ஓட்டுக்குப் பணம், மாற்றுக் கட்சி வேட்பாளர்களிடம் நடத்திய பேரம் அனைத்தும் ஊரறிந்த ரகசியங்கள்தான்.
பொய் 6- –
- த.வெ.க ஆட்சி வந்ததும் பல திட்டங்கள் நிறை.ேவற்றப்பட்டு விட்டதாக விஜய் கூச்சமேயின்றி பேசினார். தேர்தலுக்கு முன்பு அவர் பேசிய போதெல்லாம் ‘‘நிறைவேற்றக்கூடிய வாக்குறுதிகளைத்தான் கொடுப்பேன்’’ என்றார். கரூர் கூட்டத்தில் தன் வாக்குறுதிகளை priority (முன்னுரிமை) அடிப்படையில் நிறைவேற்றுவேன் என்கிறார். விஜய் அவரது படங்களில் இரட்டை வேடங்களில் நடித்திருக்கலாம். ஆனால், இரட்டை நாக்குடன் பேசக்கூடாது. த.வெ.க ஆட்சியின் திட்டங்கள் பற்றி
கரூரில் பேசிய விஜய், அவர் தொடங்கிவைத்த ‘சிங்கப் பெண்’ திட்டம் பற்றி ஏன் பேசவில்லை? பெண்கள் பாதுகாப்பு பற்றி ஆட்சிக்கு வருவதற்கு முன் கூப்பாடு போட்டவர், இப்போது ஆட்சியாளர்களே ‘போக்சோ’ சட்டத்தை எதிர்கொள்ளும் நெருக்கடியில் இருக்கும்போது, ஏன் அது பற்றி வாய் திறக்க மறுக்கிறார்? நேர்மையான ஆட்சி நடத்துவதாக இருந்திருந்தால், த.வெ.க.வின் எம்.எல்.ஏ., நிர்வாகிகள் ஆகியோர்தான் சிங்கப்பெண்களின் பிடியில் சிக்கியிருப்பார்கள்.
‘யோக்கியன் வருகிறார்..சொம்பைத் தூக்கி உள்ளே வை’ என்பது போலத்தான், கரூர் மேடையில் விஜய் நடத்திய கண்றாவி நாடகம் அரங்கேறியிருக்கிறது.