திருவள்ளுர், ஜூலை 13;-
திருவள்ளூர் மாவட்டம், திருத்தணி அடுத்த பொதட்டூர்பேட்டையில் பள்ளிக்குச் சென்ற 16 வயது மாணவியை வழிமறித்து கடத்திச் சென்று பாலியல் சீண்டலில் ஈடுபட்ட சம்பவம் தமிழகம் முழுவதும் பெரும் அதிர்ச்சியையும், பெற்றோர்கள் மத்தியில் கடும் அச்சத்தையும் ஏற்படுத்தியுள்ளது. இந்த வழக்கில் சாமியப்பன் (19) என்பவரை போலீசார் போக்சோ சட்டத்தின் கீழ் கைது செய்து நீதிமன்றத்தில் ஆஜர்படுத்தி சிறையில் அடைத்துள்ளனர். மேலும், இந்தக் கடத்தல் மற்றும் பாலியல் சீண்டல் சம்பவத்திற்கு உடந்தையாக செயல்பட்டதாக கூறப்படும் அவரது தாய் உட்பட நான்கு பேரை போலீசார் தீவிரமாக தேடி வருகின்றனர்.
பொதட்டூர்பேட்டை அரசு மகளிர் மேல்நிலைப்பள்ளியில் பிளஸ்-2 பயிலும் 16 வயது மாணவி, நேற்று முன்தினம் காலை வழக்கம்போல் வீட்டிலிருந்து பள்ளிக்குச் சென்றார். பேருந்து நிலையம் அருகே வாரச் சந்தை திடலை கடந்து சென்றபோது, வாணிவிலாசபுரம் காலனியைச் சேர்ந்த வெங்கடேஷின் மகன் சாமியப்பன் (19) என்பவர், தனது உறவினர்கள் மற்றும் நண்பர்களின் உதவியுடன் மாணவியை வழிமறித்து பைக்கில் வலுக்கட்டாயமாக கடத்திச் சென்றதாக கூறப்படுகிறது.
கடத்திச் செல்லப்பட்ட மாணவிக்கு பாலியல் சீண்டல் செய்யப்பட்டதாக மாணவியின் தந்தை பொதட்டூர்பேட்டை காவல் நிலையத்தில் புகார் அளித்தார். நிலையில் போலீசார் வழக்குப்பதிவு செய்து விசாரணை மேற்கொண்டனர்.
இதையடுத்து சாமியப்பன் மீது போக்சோ சட்டம் உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டு கைது செய்யப்பட்டார். பின்னர் நீதிமன்றத்தில் ஆஜர்படுத்தப்பட்ட அவர் சிறையில் அடைக்கப்பட்டார். இந்தச் சம்பவத்தில் சாமியப்பனுக்கு உடந்தையாக செயல்பட்டதாக அவரது தாய் நாகம்மாள் (44), உறவினர்கள் நாகராஜன் (43), சிவக்குமார் (40), நண்பர் விஷ்ணு (19) ஆகியோர் மீதும் போக்சோ சட்டத்தின் கீழ் வழக்குப்பதிவு செய்யப்பட்டுள்ளது. தலைமறைவாக உள்ள நான்கு பேரையும் கைது செய்ய போலீசார்தனிப்படை அமைத்து தேடுதல் வேட்டையில் ஈடுபட்டுள்ளனர். இந்தச் சம்பவம் திருவள்ளூர் மாவட்ட மக்களிடையே கடும் அதிர்ச்சியை ஏற்படுத்தியுள்ளது. பள்ளிக்குச் செல்லும் மாணவிகளுக்குக் கூட பாதுகாப்பு இல்லாத நிலை ஏற்பட்டுள்ளதாக பெற்றோர்கள் வேதனை தெரிவிக்கின்றனர். குழந்தை களை நம்பிக்கையுடன் பள்ளிக்கு அனுப்ப முடியாத சூழல் உருவாகி வருவதாகவும் சமூக ஆர்வலர்கள் கவலை தெரிவிக்கின்றனர்.
இந்த நிலையில், த.வெ.க. ஆட்சியில் பெண்கள் மற்றும் குழந்தைகளுக்கு எதிரான குற்றங்கள் நாளுக்கு நாள் அதிகரித்து வருவதாக சமூக ஆர்வலர்கள் பொதுமக்கள் குற்றம்சாட்டுகின்றன. பெண்களின் பாதுகாப்பை உறுதி செய்வதாக தேர்தல் வாக்குறுதிகள் அளிக்கப்பட்ட போதிலும், நடைமுறையில் பெண்கள், மாணவிகள் மற்றும் குழந்தைகள் பாதுகாப்பின்றி வாழும் சூழல் உருவாகியுள்ளதாக அவர்கள் கூறுகின்றனர்.
மேலும், தமிழகத்தின் பல்வேறு பகுதிகளில் தொடர்ந்து பெண்களுக்கு எதிரான பாலியல் குற்றங்கள், சிறுமிகள் மீதான வன்முறைகள், கடத்தல் சம்பவங்கள் அதிகரித்து வருவது சட்டம்-ஒழுங்கு சீர்குலை வதற்கான அறிகுறி எனவும் குற்றவாளிகள் மீது கடுமையான நடவடிக்கை எடுத்து, பெண்கள் மற்றும் குழந்தைகளின் பாதுகாப்பை உறுதி செய்ய அரசு தவறினால், பொதுமக்களின் நம்பிக்கை மேலும் பாதிக்கப்படும் என்றும் அவர்கள் எச்சரிக்கின்றனர்.