திருவள்ளூர், ஜூலை 14;–
திருவள்ளூர் மாவட்டம் பழவேற்காட்டில் பட்டப்பகலில் வீட்டிற்குள் புகுந்த மர்ம கும்பல், தனியாக இருந்த பெண்ணை கழுத்தில் கத்தியால் சரமாரியாக குத்திக் கொலை செய்து, சுமார் 15 சவரன் தங்க நகைகளை கொள்ளையடித்துச் சென்ற சம்பவம் மாநிலம் முழுவதும் அதிர்ச்சியை ஏற்படுத்தியுள்ளது. பகல்நேரத்திலேயே வீட்டிற்குள் புகுந்து கொலை செய்து, எந்த அச்சமும் இன்றி கொள்ளையடித்து தப்பிச் சென்ற சம்பவம், மாநிலத்தின் சட்டம்–ஒழுங்கு நிலை குறித்து கடுமையான கேள்விகளை எழுப்பியுள்ளதாக பொதுமக்கள் சமூக ஆர்வலர்கள் குற்றம்சாட்டி
யுள்ளன.
பழவேற்காடு பழைய பேருந்து நிலையம் அருகே வசித்து வந்த ராதாகிருஷ்ணன் – வனஜா (55) தம்பதியரின் பிள்ளைகள் திருமணமாகி தனித்தனியாக வசித்து வரும் நிலையில், முதிய தம்பதியர் மட்டும் வீட்டில் வசித்து வந்தனர். ராதாகிருஷ்ணன் மளிகைக் கடை நடத்தி வந்தார். வனஜா வீட்டிலேயே மாவு விற்பனை செய்து வந்ததாக கூறப்படுகிறது.
சம்பவத்தன்றுநேற்று காலை வழக்கம்போல் கணவருக்கு தேநீர் கொடுத்து விட்டு வீட்டிற்கு வந்த வனஜா, பின்னர் தனியாக இருந்துள்ளார். மதியம் வீட்டிற்கு திரும்பிய ராதாகிருஷ்ணன், வீடு பூட்டப்பட்டிருந்ததைத் திறந்து உள்ளே சென்றபோது, கழுத்தில் பல இடங்களில் கத்திக்குத்துக் காயங்களுடன் ரத்த வெள்ளத்தில் உயிரிழந்த நிலையில் மனைவி கிடந்ததை கண்டு கதறி அழுதுள்ளார்.
தகவல் அறிந்து விரைந்து வந்த திருப்பாலைவனம் காவல்துறையினர் நடத்தியமுதற்கட்ட விசாரணையில், மாவு வாங்குவது போல வீட்டிற்குள் நுழைந்த மர்ம கும்பல், வனஜாவை கொடூரமாக கத்தியால் தாக்கி கொலை செய்து, கழுத்தில் இருந்த தாலிச் சரடு, காதில் இருந்த தங்க நகைகள் உள்ளிட்ட சுமார் 15 சவரன் நகைகளை பறித்துக் கொண்டு, வீட்டை பூட்டிவிட்டு தப்பிச் சென்றிருப்பது தெரியவந்துள்ளது.
கைரேகை நிபுணர்கள், மோப்ப நாய் பிரிவு, தனிப்படைகள் என பல்வேறு கோணங்களில் விசாரணை தீவிரப்படுத்தப்பட்டுள்ளது. அப்பகுதியில் உள்ள கண்காணிப்பு கேமரா காட்சிகளும் ஆய்வு செய்யப்பட்டு வருகின்றன. முதிய தம்பதியர் மட்டும் வசித்து வந்ததை முன்கூட்டியே நோட்டமிட்டு, திட்டமிட்டு இந்தக் கொலை அரங்கேற்றப்பட்டிருக்கலாம் என்ற கோணத்திலும் காவல்துறையினர் விசாரணை நடத்தி வருகின்றனர்.
“த.வெ.க. அரசு பொறுப்பேற்ற பிறகு மாநிலம் முழுவதும் கொலை, கொள்ளை, வழிப்பறி, பெண்கள் மற்றும் முதியவர்களை குறிவைக்கும் குற்றங்கள் அதிகரித்து வருவதாக அன்றாடம் செய்திகள் வெளியாகின்றன. மக்கள் நிம்மதியாக வீட்டில் கூட இருக்க முடியாத சூழல் உருவாகியுள்ளது. பட்டப்பகலில் வீட்டிற்குள் புகுந்து பெண்ணை கொலை செய்து நகைகளை கொள்ளையடிக்கும் அளவுக்கு குற்றவாளிகள் அச்சமின்றி செயல்படுவது, சட்டம்–ஒழுங்கு அமைப்பு எந்த நிலையில் உள்ளது என்பதை வெளிப்படுத்துகிறது” என்றுபொதுமக்கள் குற்றம்சாட்டியுள்ளனர்.
மேலும், “குற்றங்கள் நடந்த பிறகு விசாரணை நடத்துவதை விட, குற்றங்கள் நடைபெறாமல் தடுப்பதே அரசின் கடமை. ஆனால் மக்களின் உயிர் மற்றும் உடைமைகளுக்கு பாதுகாப்பு அளிப்பதில் அரசு தோல்வியடைந்துள்ளதாக பொதுமக்கள் மத்தியில் கடும் அதிருப்தி நிலவுகிறது. முதியவர்கள், பெண்கள் தனியாக வீட்டில் வசிக்கவே அச்சப்படும் நிலை ஏற்பட்டுள்ளது. இது மிகவும் கவலைக்குரிய சூழல்” என்றும் அவர்கள் தெரிவித்துள்ளனர்.
இந்தக் கொடூரக் கொலை மற்றும் கொள்ளைச் சம்பவத்தில் ஈடுபட்ட குற்றவாளிகளை உடனடியாக கைது செய்து, சட்டத்தின் முன் நிறுத்த வேண்டும். மாநிலம் முழுவதும் சட்டம்–ஒழுங்கை வலுப்படுத்தி, பொதுமக்களுக்கு பாதுகாப்பு வழங்க அரசு உடனடி நடவடிக்கை எடுக்க வேண்டும் என்றும் பொதுமக்கள் வலியுறுத்தியுள்ளன.
பழவேற்காட்டில் பட்டப்பகலில் நடைபெற்ற இந்தக் கொலைச் சம்பவம், அப்பகுதி மக்களிடையே பெரும் அதிர்ச்சியையும், பாதுகாப்பு குறித்த அச்சத்தையும் ஏற்படுத்தியுள்ளது.