சென்னை, ஜூலை 14 –
த.வெ.க.வின் குதிரை பேரத்தை உறுதிப்படுத்தும் முன்னாள் அமைச்சர் எம்.ஆர்.விஜயபாஸ்கரின் பேச்சு குறித்து தி.மு.க. சார்பில் ஆளுநரிடம் புகார் அளிக்கப்பட்டுள்ளது. ஆளுநர் நடவடிக்கை எடுக்காவிட்டால் நீதிமன்றத்தை நாடுவோம் என்று கழக அமைப்புச் செயலாளர் ஆர்.எஸ்.பாரதி தெரிவித்துள்ளார்.
தி.மு.க. அமைப்புச் செயலாளர் ஆர்.எஸ்.பாரதி ஆளுநர் அர்லேகரிடம் புகார் மனு ஒன்றை அளித்துள்ளார். அதில், சட்டவிரோதமான தூண்டுதல்கள் மற்றும் முறைகேடுகள் மூலம், ம.தி.மு.க. எம்.எல்.ஏ.க்களை பதவி விலகுமாறு முதலமைச்சர் விஜய், வைகோவுடன் சேர்ந்து சதித்திட்டம் தீட்டியது குறித்து வழக்கு பதிவு செய்ய உத்தரவிடக் கோரி ஜூலை ஒன்றாம் தேதி தாம் அளித்த புகாரின் தொடர்ச்சியாக, இந்த மனுவை அளிப்பதாக குறிப்பிட்டுள்ளார்.
மேலும், தி.மு.க. எம்.எல்.ஏ. அனிதா ராதாகிருஷ்ணனை பதவி விலகிவிட்டு, த.வெ.க.வில் இணையுமாறு காவல்துறை அதிகாரிகள் கட்டாயப்படுத்திய விவகாரம் குறித்து கடந்த 4-ம் தேதி தனியாக புகார் அளித்ததையும், இதேபோல் நாகர்கோவில் தொகுதி தி.மு.க. எம்.எல்.ஏ. ஆஸ்டின் கட்சித்தாவ தூண்டப்பட்ட சம்பவம் குறித்தும் அவர் சுட்டிக்காட்டி உள்ளார்.
அ.தி.மு.க.வைச் சேர்ந்த 6 சட்டமன்ற உறுப்பினர்கள் அடுத்தடுத்து பதவி விலகி த.வெ.க.வில் இணைந்தனர் என்றும், இவர்களில் கரூர் தொகுதி சட்டமன்ற உறுப்பினர் எம்.ஆர். விஜயபாஸ்கரும் ஒருவர் என்றும் அவர் குறிப்பிட்டுள்ளார். மேலும், கடந்த 2-ம் தேதி செய்தியாளர்களிடம் பேசிய எம்.ஆர். விஜயபாஸ்கர், “த.வெ.க. தரப்பில் இருந்து தங்களை அணுகினார்கள் என்றும் அதன் அடிப்படையில் த.வெ.க.வில் இணைந்ததாக வெளிப்படையாக ஒப்புக் கொண்டதையும் ஆர்.எஸ்.பாரதி சுட்டிக்காட்டி உள்ளார்.
விஜயபாஸ்கரின் இந்த ஒப்புதல் வாக்குமூலம் த.வெ.க. மற்ற கட்சி எம்.எல்.ஏ-.க்களை விலைக்கு வாங்கும் குதிரை பேரத்தில் ஈடு படுவதை உறுதிப்படுத்தி உள்ளதாகவும் இத்தகைய வெளிப்படையான குதிரை பேரம் குறித்து ஊழல் தடுப்பு மற்றும் கண்காணிப்புத் துறை விசாரணை நடத்த வேண்டும் என்றும், முதலமைச்சர் விஜய் மீது உரிய நட வடிக்கை எடுக்க வேண்டும் என்றும் தி.மு.க. அமைப்புச் செயலாளர் ஆர்.எஸ்.பாரதி தனது மனுவில் வலியுறுத்திஉள்ளார்.
த.வெ.க.வின் இந்த நடவடிக்கைகள் அரசியலமைப்பு மற்றும் தேர்தல் நடைமுறை களுக்கு எதிரானது என்றும் ஜனநாயகத்தின் அடித்தளத்தையே தகர்ப்பதுடன், வாக்காளர்களின் தீர்ப்புக்கு துரோகம் இழைப்பதுடன், கட்சித் தாவல் தடைச் சட்டத்தின் நோக்கத்தை சீர்குலைப்பதாக உள்ளதாகவும் ஆர்.எஸ்.பாரதி தெரிவித்துள்ளார். தற்போது அளிக்கப்பட்டுள்ள புதிய ஆதாரங்கள்மற்றும் ஆவணங்களின் அடிப்படையில், வழக்கு பதிவு செய்ய ஊழல் தடுப்பு மற்றும் கண்காணிப்புத் துறை இயக்குநருக்கு ஆளுநர் உத்தரவிட வேண்டும் என்றும் ஆர்.எஸ்.பாரதி தனது மனுவில் வலியுறுத்தி உள்ளார்.
உச்சநீதிமன்றம்
வலியுறுத்தியுள்ளது!
தொடர்ந்து தமது மனுவில்,
மேற்குறிப்பிடப்பட்ட புகாரில் சமர்ப்பிக்கப்பட்டுள்ளபடி, Lalita Kumari v. Government of Uttar Pradesh என்ற வழக்கில்,தகவல்கள் ஒரு காவல்துறையால் நேரடியாகப் பதிவு செய்து விசாரிக்கக் கூடிய குற்றம் (Cognizable Offence) நிகழ்ந்திருப்பதை வெளிப்படுத்தினால், முதல் தகவல் அறிக்கை (FIR) பதிவு செய்வது கட்டாயம் என்று இந்திய உச்சநீதிமன்றம் தெளிவாகத் தீர்ப்பளித்துள்ளது. மேலும், இதில் சம்பந்தப்பட்ட நபர்களின் பதவி அல்லது செல்வாக்கு – அவர் ஒரு முதலமைச்சராக இருந்தாலும் கூட – சட்டத்தில் எந்தவித விதிவிலக்கிற்கும் இடமளிக்காது என்றும் நீதிமன்றம் வலியுறுத்தியுள்ளது.
தற்போது பதிவில் இடம்பெற்றுள்ள ஆதாரங்கள் – வைகோ அவர்கள் பொதுவெளியில் அளித்த ஒப்புதல், எம்.ஆர்.விஜயபாஸ்கர் அவர்கள் பொதுவெளியில் அளித்த ஒப்புதல், மற்றும் அனிதா ஆர். ராதாகிருஷ்ணன் அவர்கள் அக்காலகட்டத்தில் வெளியிட்ட அறிக்கைகள் – இவை அனைத்தையும் ஒருங்கிணைத்துப் பார்க்கும்போது, காவல்துறையால் நேரடியாகப் பதிவு செய்து விசாரிக்க வேண்டிய குற்றங்கள் நிகழ்ந்திருப்பதை வெளிப்படுத்துகின்றன. எனவே, உடனடியாக முதல்
தகவல் அறிக்கை (FIR) பதிவு செய்யப்படுவது அவசியம் என்பதை அவைஉறுதிப்படுத்துகின்றன.
விசாரிக்கத்தக்க
குற்றங்கள்!
மேற்கூறிய சூழ்நிலைகளின் அடிப்படையில், ஆளுநர் அவர்கள், தமது கவனத்திற்கு தற்போது சமர்ப்பிக்கப்பட்டுள்ள புதிய சான்று கள் மற்றும் ஆவணங்களை, 1.7.2026 அன்று அளிக்கப்பட்டுள்ள புகாருடன் இணைத்துப் பரிசீலிக்குமாறு பணிவுடன் கேட்டுக்கொள்கிறேன். அவை அனைத்தும் முதற்கட்ட (Prima Facie) பார்வையிலேயே காவல்துறையால் நேரடியாகப் பதிவு செய்து விசாரிக்கத்தக்க குற்றங்கள் (Cognizable Offences) நிகழ்ந்திருப்பதை வெளிப்படுத்து கின்றன.
எனவே, அதற்கேற்ப ஊழல் தடுப்பு மற்றும் கண்காணிப்புத் துறை (Directorate of Vigilance and Anti-Corruption -– DVAC)
இயக்குநருக்கு முதல் தகவல் அறிக்கை (FIR) பதிவு செய்து, சட்டப்படி தேவையான நடவடிக்கைகளை உடனடியாக மேற்கொள்ளுமாறு உத்தரவிடுமாறு ஆளுநர் அவர்களை மிகுந்த பணிவுடன் வேண்டிக் கொள்கிறேன்.என்றும் அமைப்புச் செயலாளர் ஆர்.எஸ்.பாரதி குறிப்பிட்டுள்ளார்.