சென்னை, ஜூலை. 14–
‘‘விஜயின் குதிரை பேர
அரசியல் குறித்து ஆளுநர்
உடனடி நடவடிக்கை எடுக்காத பட்சத்தில் நீதிமன்றத்தை நாடுவோம்” என்று கழக அமைப்புச் செயலாளர் ஆர்.எஸ்.பாரதி அவர்கள் கூறியுள்ளார்.
த.வெ.க. அரசின் குதிரை பேர ஊழல் பற்றி தி.மு.க. சார்பில் ஆளுநர் அவர்களிடம் மீண்டும் புகார் அளிக்கப்பட்டது குறித்து கழக அமைப்புச் செயலாளர் ஆர்.எஸ்.பாரதி அவர்கள் அண்ணா அறிவாலயத்தில் செய்தியாளர்களிடம் கூறியதாவது:–
கரூரில் முதல்வர் விஜய் பேசியது தொடர்பாக உச்ச நீதிமன்ற வழிகாட்டல் படி ஓய்வு பெற்ற உச்ச நீதிமன்ற நீதிபதி தலைமையிலான விசாரணைக் குழுவிடமும், CBI யிடமும் தி.மு.க. சார்பில் புகார் அளிக்கப்பட்டுள்ளது. மேலும் முதல்வர் விஜய் குதிரைபேர ஊழலில் ஈடுபட்டு உள்ளார் என்பதை வைகோ அளித்த வாக்குமூலம் அடிப்படையில் ஏற்கனவே கடந்த 4 ஆம் தேதி ஆளுநரைச் சந்தித்து ஆதாரத்தோடு புகார் அளித்தோம்.
அதேபோலவிஜய பாஸ்கர் அவர்களும் வெளிப்படையாகவே செய்தியாளர் கூட்டத்திலே என்னை த.வெ.க.வில் வந்து சேரும்படி கேட்டுக்கொண்டார்கள், ஆகவேதான் நான் ராஜினாமா செய்கிறேன் என்று சொல்லி
எம்.எல்.ஏ. பதவியை ராஜினாமா செய்துவிட்டு அவரும் சேர்ந்துவிட்டார். ஆக இதெல்லாம் குதிரைபேர ஊழலுக்கு தகுந்த ஆதாரங்கள் என்பதை சுட்டிக்காட்டி ஆளுநரிடத்தில் இன்று மீண்டும் ஒருமுறை தி.மு.க.வின் சார்பில் புகார் கொடுத்திருக்கிறோம்.
எச்சில் இலையை வைத்து
விழா நடத்துகிறார்!
விஜய் பேசும் போது கொத்து பரோட்டா என்றெல்லாம் கொச்சையாக பேசுகிறார். கரூர் விஜய பாஸ்கர், விராலிமலை விஜயபாஸ்கர் ஆகிய இருவருமே நாங்கள் சாப்பிட்டுப் போட்ட இரண்டு இலை தான் அதை த.வெ.க.வில் இணைத்துக் கொண்டுள்ளனர் என அ.தி.மு.க. வினரே விமர்சித்து உள்ளனர். ஆகவே எச்சில் இலையை வைத்து ஒரு விழா நடத்துகிறார்.
அதில் ஏற்கனவே வெளியிட்ட கரூர் அறநிலையத்துறை நிலம் தொடர்பான அரசாணையை ஏதோ இவரிடம் கோரிக்கை வைத்து அதன் பிறகு வெளியிடுவது போல ஒரு நாடகத்தை நடத்தி காட்டியுள்ளார். இந்த நாடகம் நடந்தது 10ஆம் தேதி, ஆனா 9 ஆம் தேதியே அதற்கான அரசாணை போடப்பட்டுவிட்டது. இது எவ்வளவு பெரிய பித்தலாட்டம், எவ்வளவு பெரிய நாடகம்.
ஆக இப்படிப்பட்ட நாடகங்களை இவர்கள் நடத்திக்கொண்டிருக்கிறார்கள். இதற்கெல்லாம் முடிவுகட்டுகிற வகையில் தி.மு.க. நடவடிக்கை எடுக்கும் என்பதை தெரிவித்துக் கொள்கிறேன். குதிரை பேர புகாரின் பேரில் ஆளுநர் நடவடிக்கை எடுக்காத பட்சத்தில் நீதிமன்றத்தை நாடுவோம்.
இவ்வாறு கழக அமைப்புச் செயலாளர் ஆர்.எஸ்.பாரதி அவர்கள் செய்தியாளர்களிடம் கூறினார்.