நேற்று முன்தினம் அண்ணாமலை தனது
‘ வீ த லீடர்ஸ்’ அமைப்பின் முதல் கூட்டத்தை பொள்ளாச்சியில் நடத்தினார். தமிழ்நாட்டின் பெரும்பாலான சேனல்கள் அதை நேரலை செய்தன. பல தொலைகாட்சிகளில் அவரது பேச்சு குறித்த விவாதங்கள் நடைபெற்றன. மறுநாள் பாரம்பரியம் மிக்க ஒரு நாளிதழில் அது முகப்புச் செய்தியானது. இதோதமிழகத்தை மீட்க அடுத்த தேவ தூதர் வந்துவிட்டார்.
யார் இந்த அண்ணாமலை? ஒரு வி.ஆர்.எஸ் கொடுத்த ஐ.பி.எஸ். அதிகாரி. தீவிர ஆர்.எஸ்.எஸ் சுயம் சேவக். ரஜினி காந்த் அரசியலுக்கு வருவதாக செய்திகள் அடிபட்டபோது அதற்கு ஒரு பக்கபலமாக பா.ஜ.க.வால் அனுப்பப்பட்டவர் அண்ணாமலை. பிறகு ரஜினி காந்த் கடைசி நேரத்தில் சுதாரித்துக் கொண்டு அரசியலுக்கு வரும் முடிவை கைவிட்ட பின் பா.ஜ.க. அதன் தமிழகத் தலைவராக
அண்ணாமலையை முன்னிறுத்தியது.
தி.மு.க.வுக்கு எதிராக பச்சைப் பொய்களை விஜய்க்கு முன்னதாக பரப்பியவர் அண்ணாமலை. முக்கியமாக செந்தில் பாலாஜியால் ‘வாட்ச்’ விவகாரம் உட்பட பலவற்றில் அம்பலப்படுத்தப்பட்டவர். அவரால் தேர்தலில் தோற்கடிக்கப்பட்டவர். அதற்காக செந்தில் பாலாஜியை பழி தீர்க்க அத்தனை ஆயுதங்களையும் பயன்படுத்தியவர். ஆளுநரிடம் தி.மு.க. விற்கு எதிராக ஊழல் புகார் என்ற பெயரில் ட்ரங்க் பெட்டிகளில் வெற்றுக் காகிதங்களைக் கொடுத்தது முதல் தன்னைத் தானே சவுக்கால் அடித்துக்கொண்டதுவரை பல கேலிக்கூத்துகளை அரங்கேற்றியவர்.
அவரை ஒரு தலைவனாக்க ஊடகங்கள் படாதபாடுபட்டன. அவர் போகுமிடங்களுக்கெல்லாம் சென்று அவரது பொய்களைப் பரப்பின. எதிர்த்துக் கேள்விகேட்ட ஊடகவியலாளர்களை அண்ணாமலை அவமானப்படுத்தினார். ஆனால் ஊடகங்களுக்கு கொடுக்கப்பட்ட அன்ணாமலையை தலைவனாக்கும்;அசைண்ட்மெண்டி’ற்காகப்பல ஊடகங்கள் ராப்பகலாய் உழைத்தன.அண்ணாமலை அ.தி.மு.க.எதிர்ப்பிற்கான ஆயுதமாய் பயன்படுத்தப்பட்டு வந்த சூழலில் பா.ஜ.கவிஜய்யை முன்வைத்து தன் பாதையை மாற்றியது
.
தமிழ்நாட்டில் கடும் பா.ஜ.க. எதிர்ப்பு நிலவுவதால் கழகங்கள் இல்லாத தமிழ்நாடு என்ற தன் கனவை நிறைவேற்றவேண்டும் என்றால் அது அண்ணாமலையை வைத்து நேரடியாகச் செய்ய முடியாது என்ற சூழலில் பா.ஜ.க. விஜய்யின் அரசியலுக்கு உத்வேகம் அளிக்கத் தொடங்கியது. செங்கோட்டையனை பா.ஜ.க.தான் த.வெ.கவிற்குள் அனுப்பியது. ஐ.ஆர்.எஸ். அதிகாரி அருண்ராஜ் பதவியை ராஜினாமா செய்துவிட்டு த.வெ.கவிற்கு வந்ததும் இப்படித்தான். தி.மு.கவிற்கு எதிராக பா.ஜ.க.வின் சமூக வலைத்தள கட்டமைப்பு எவ்வாறு த.வெ.க.விற்கு பயன்பட்டது என்று ஊடகஆய்வாளர்கள் சுட்டிக் காட்டுகிறார்கள்.
அதே சமயம் பா.ஜ.க. சட்டமன்றத் தேர்தலில் அ.தி.மு.க. கூட்டணியில் எந்த ஆர்வமும் காட்டவில்லை. ஒப்புக்கு கூட்டணியில் இருந்தது. வழக்கமாக தேர்தலில் ஆவேசமாகச் செயல்படும் மோடி– அமித் ஷா இந்தத் தேர்தலைக் கண்டு கொள்ளவே இல்லை. எடப்பாடி பழனிச்சாமியை தனித்து போராட விட்டனர் என்பதே உண்மை. அ.தி.மு.க. அழிந்து தாங்கள் வரவேண்டும் என்றால் அதற்கு முதலில் ஒரு இடைநிலை சக்தியாக விஜய் வரவேண்டும் என த.வெ.க.விற்கு வழிவிட்டு நின்றது. பா.ஜ.க. அண்ணாமலையை கொஞ்ச காலத்திற்கு கண்ணில் படாமல் ஒளித்துவைத்துவிட்டு, அண்ணாமலை அளவுக்கு பிரபலம் இல்லாத நயினார் நாகேந்திரன் பா.ஜ.க. தலைவராக்கப்படுகிறார். விஜய்க்கு பா.ஜ.க , அ.தி.மு.க. கூட்டணியிலிருந்து பெரிய தொந்தரவு எதுவும் இருக்கக்கூடாது என்பதுதான் அதற்குக் காரணம்.
பா.ஜ.க. விரும்பியிருந்தால் அ.தி.மு.க.– பா.ஜ.க.– த.வெ.க. கூட்டணியைஉருவாக்கியிருக்க முடியும். அப்போது அக்கூட்டணி வெற்றி பெற்றால் எடப்பாடிதான் முதலமைச்சர் ஆவார். அதனால் பா.ஜ.க. விற்கு பெரிய பயன் இல்லை. மாறாக முதலில் அரசியல் தெரியாத, வலிமையற்ற ஒருவர் தமிழ்நாட்டில் ஆட்சிக்கு வரவேண்டும். பின்னர் அவரை வீழ்த்த வேண்டும் என்பதுதான் பா.ஜ.க.வின் தொலைநோக்குத் திட்டம்.
விஜய்யின் குடுமி இன்று கரூர் விவகார வழக்கில் வசமாக பா.ஜ.க.விடம் சிக்கியிருக்கிறது.ஒன்றிய அரசை எதிர்க்க மாட்டோம் என விஜய் திரும்பத் திரும்ப ‘சரண்டர்’ வாக்குமூலம் கொடுக்கிறார். ஊரக வேலைவாய்ப்புத் திட்டம், மும்மொழிக் கொள்கை, மேகதாது விவகாரம், காவிரியில் நீர் திறப்பது, ஆளுநரின் போட்டி அரசாங்கம் என எல்லாப் பிரச்சினை களிலும் எப்படி பவ்யமாக கண்மூடி வாய் பொத்தி நிற்கிறார்கள் என்பதைப் பார்க்கிறோம். அவர்கள் விரும்பியபடி பெரும்பான்மை இல்லாத, பலவீனமான தங்களுக்கு அஞ்சி நடுங்குகிற, எந்தக் கொள்கையுமில்லாத தனது ஏஜெண்டுகளை உள்ளடக்கிய ஒரு பொம்மை அரசை உருவாக்கிவிட்டார்கள்.
இதே திட்டம்தான் காங்கிரஸிற்கு இருந்தது.
அ.தி.மு.க. அழிந்தால்தான் தாங்கள் வளர்வோம் என பா.ஜ.க நினைத்ததுபோலவே தி.மு.க. பலவீனப்பட்டால்தான் தாங்கள் வளர முடியும் என ராகுல் காந்தி நினைத்தார். கூட்டணியை சிதைக்க எல்லா சதிகளையும் மேற்கொண்டார். பா.ஜ.க. தலைவர்கள்போலவே தமிழ்நாட்டில் பிரச்சாரத்திற்கு வர ராகுல்காந்தி மறுத்தார். பா.ஜ.க.வின் திட்டத்திற்கு ஒரு ‘கரசேவக’ராக ராகுல் காந்தி செயல்படுவதைக் கண்டு அமித்ஷா எப்படி சிரித்திருப்பார் என்பதை கற்பனை செய்யவே வேடிக்கையாக இருக்கிறது. ராகுல் காந்தி– அமித் ஷா இருவரும் நினைத்தது நடந்தது. தங்கள் கூட்டணிக்கு துரோகம் இழைத்த காங்கிரஸ், பா.ஜ.க. இருவருமே விஜய்யின் வெற்றியால் ஆதாயமடைந்தனர். காங்கிரஸிக்கு மந்திரி சபையில் இடம் கிடைத்தது. பா.ஜக.விற்கோ தங்களுக்கான ஒரு நிழல் அரசாங்கமே கிடைத்தது. அமித்ஷா – ராகுல் காந்தி இருவருமே திராவிட இயக்கங்களை அழித்தொழிக்கும் பணியில் இணைந்த கரங்களாக செயல்பட்டு வருகின்றனர்.
இந்த இடத்தில்தான் அண்ணாமலையின் ‘புத்துயிர்ப்பு’ நடைபெறுகிறது. அமித்ஷாவிடம் ஆசிவாங்கிக்கொண்டு தனது புதிய இயக்கத்தை தொடங்குகிறார். அந்த இயக்கத்தின் பெயர்கூட தி.மு.க.விட மிருந்து கடன் வாங்கியதுதான். ‘ நான் முதல்வன்’ என்ற பெயரின் ஒருமையைத்தான் ‘we the leaders’ என்ற பன்மையாய் ஆங்கிலத்தில்
மாற்றியிருக்கிறார்கள்.
த.வெ.க. அரசு விரைவில் செல்வாக்கு இழக்கும் என்பதற்கு இந்த இரண்டு மாத ஆட்சியின் அவலங்களே சாட்சி. அப்போது த.வெ.க. மாயையிலிருந்து விலகும் இளைஞர்களை மீண்டும் திராவிட இயக்கங்கள் பக்கம் செல்லவிடாமல் தடுத்து திசைதிருப்பலாம் என்ற திட்டத்தோடு பா.ஜ.க.வால் தொடங்கப்பட்ட மாற்று இயக்கம்தான் அண்ணாமலையின் இயக்கம். அதாவது தமிழ்நாட்டில் ஆளும் கட்சியும் எங்கள் ஏஜெண்ட்தான். எதிர்கட்சியும் எங்கள் ஏஜெண்ட்தான் என்ற நிலையை பா.ஜ.க. உருவாக்க முயற்சிக்கிறது.
அதற்காகத்தான்ஊடக எலிகள் முதல் நாளிலேயேஅண்ணாமலை பின்னால் அம்மணமாய் ஒடுகின்றன. விஜய்க்கும் அண்ணாமலைக்கும் முதலாளி ஒருவர்தான். முதலாளியின் அசைண்மென்ட்தான் வேறு வேறு. அண்ணாமலைக்கு ஊழியம் செய்வது என்பது ஊடகங்களுக்கு ஏற்கனவே கொடுக்கப்பட்ட காண்ட்ராக்ட்தான். இப்போது அது புதுப்பிக்கப் பட்டிருக்கிறது.
சதியினால் பெற்ற வெற்றி என்பது ஒரு விதிவிலக்கான விபத்தாக இருக்க முடியுமே தவிர விதியாக இருக்க முடியாது. இந்தியாவில் பா.ஜ.க.விற்கு சவால்விடும் உறுதியான அரசியல்
கட்டமைப்பைக் கொண்ட கட்சி தி.மு.க. அதேபோல
அ.தி.மு.க.வின் கட்டமைப்பும். இந்த இரண்டு கட்சிகளையும் ஊடகங்களின் துணையால் விஜய்–அண்ணாமலையின் கோமாளி அரசியலை வைத்துமுடிவு கட்டலாம் என நினைப்பது சிறுபிள்ளைக் கனவு. அதனால்தான் பா.ஜ.க.வின் திட்டங்களுக்கு ஊழியம் செய்துகொண்டிருக்கும் சில கட்சிகளும் ஊடகவியலாளர்களும் தி.மு.க. – அ.தி.மு.க. கூட்டணி என்ற வதந்தியைக் கண்டே பதறுகிறார்கள்.
விஜய்– அண்ணாமலை இருவருமே அரசியலில் எந்த பண்பும் இல்லாத கேளிக்கை அரசியல்வாதிகள். பொய் சொல்ல கொஞ்சம்கூட கூச்சப்படாத
வர்கள். சீரழிவு அரசியலில் யார் நாயகர்கள் என்பதில் இவர்கள் இருவருக்கும் கடும் போட்டி ஏற்படலாமே தவிர மக்கள் அரசியலில் அல்ல.
கார்ல் மார்க்ஸ்ஓரிடத்தில் எழுதுகிறார். ‘ வரலாற்றில் மாபெரும் சம்பவங்கள் இரண்டுமுறை நிகழ்கின்றன. முதல் முறை அது அவலமானதாகவும் இரண்டாம் முறை கேலிக்கூத்தாகவும் முடிகிறது’ என்று.
முதல் அவலமான சம்பவத்தை விஜய் மூலம் பா.ஜ.க. ஏற்கனவேநிறைவேற்றி விட்டது. இரண்டாம் கேலிக்கூத்தான சம்பவம் அண்ணாமலையின் மூலம் விரைவாக நிறைவேற இருக்கிறது.