திருவள்ளூர், ஜூலை.15-
த.வெ.க. ஆட்சியில் அரசு துறைகளில் வெளிப்படைத்தன்மை கேள்விக்குறியாகி வருவதாக தொடர்ந்து குற்றம்சாட்டி வரும் நிலையில், அரசு வழக்கறிஞர் நியமனத்திலும் முறைகேடு நடைபெறுவதாக வழக்கறிஞர்கள் முன்வைத்த குற்றச்சாட்டு திருவள்ளூரில் பரபரப்பை ஏற்படுத்தியுள்ளது.
திருவள்ளூர் ஒருங்கிணைந்த நீதிமன்ற வளாகம் முன்பு நேற்று மாலை ஏராளமான வழக்கறிஞர்கள் திடீரென திரண்டு ஆர்ப்பாட்டத்தில் ஈடுபட்டனர். அரசு வழக்கறிஞர் பணியிடங்கள் தகுதி, அனுபவம் மற்றும் நேர்மையின் அடிப்படையில் அல்லாமல், பணம் பெற்றுக் கொண்டு வழங்கப்படுவதாக அவர்கள் குற்றம்சாட்டினர். இதனால் பல ஆண்டுகளாக நேர்மையாக வழக்கறிஞர் தொழிலில் ஈடுபட்டு வரும் திறமையானவர்கள் வாய்ப்பிழந்து வருவதாகவும் அவர்கள் வேதனை தெரிவித்தனர்.
பின்னர் நீதிமன்றத்திற்கு எதிரே சாலை மறியல் போராட்டத்தில் ஈடுபட்ட வழக்கறிஞர்கள், “பணம் கொடுத்தால்தான் அரசு வழக்கறிஞர் பதவி கிடைக்கிறது என்ற நிலை ஏற்பட்டுள்ளதாக குற்றச்சாட்டுகள் எழுந்துள்ளன. தகுதியானவர்கள் தொடர்ந்து புறக்கணிக்கப்படுகின்றனர். இந்த நிலை சட்டத்தின் மீதான நம்பிக்கையையே பாதிக்கும்” என்று முழக்கமிட்ட னர்.
போராட்டம் குறித்து தகவலறிந்த திருவள்ளூர் டவுன் போலீசார் சம்பவ இடத்திற்கு விரைந்து வந்து பேச்சுவார்த்தை நடத்தினர். அந்த நேரத்தில் போலீசாருக்கும் வழக்கறிஞர்களுக்கும் இடையே வாக்கு வாதம் ஏற்பட்டதால் சிறிது நேரம் பதற்றமான சூழல் நிலவியது. பின்னர் நடைபெற்ற பேச்சுவார்த்தையைத் தொடர்ந்து போராட்டம் கைவிடப்பட்டது.
இந்த சாலை மறியல் காரணமாக நீதிமன்றம் எதிரே சிறிது நேரம் போக்குவரத்துபாதிக்கப்பட்டது.
அரசு வழக்கறிஞர் நியமனத்தில் முறைகேடு நடைபெறுவதாக வழக்கறிஞர்களே போராட்டத்தில் ஈடு பட்டிருப்பது, சட்ட ஆட்சியின் வெளிப்படைத்தன்மை குறித்து பல்வேறு கேள்விகளை எழுப்பியுள்ளது. இந்த குற்றச்சாட்டு களுக்கு உரிய விளக்கம் அளித்து, தகுதியானவர்களுக்கு மட்டுமே வாய்ப்பு வழங்கப்பட வேண்டும் என்பதே சட்டத்துறை வட்டாரங்களின் எதிர்பார்ப்பாக உள்ளது.