நாகர்கோவில், ஜூலை 15
நாகர்கோவில் சிறையில் விசாரணை கைதியாக அடைக்கப்பட்டு இருந்தவர் மர்மமான முறையில் உயிரிழந்த சம்பவத்தில் காவல்துறையினர் மீது உறவினர்கள் பரபரப்பு குற்றம் சாட்டியுள்ளனர்.
கன்னியாகுமரி மாவட்டம் ஈத்தங்காடு நாராயணன்புதூர் பகுதியை சேர்ந்த மாற்றுத்திறனாளியான சபரி வர்மன் என்பவர் புகையிலைப் பொருட்கள் விற்பனை செய்ததாக கைது செய்யப்பட்டு நாகர்கோவில் சிறையில் அடைக்கப்பட்டார்.
நேற்று முன்தினம் அதிகாலையில், சிறையில் சபரிவர்மன் மயக்க நிலையில் கிடந்ததாக கூறப்படுகிறது. ஆசாரிபள்ளம் அரசு மருத்துவக்கல்லூரி மருத்துவமனைக்கு கொண்டு சென்ற போது அவர் இறந்தது தெரிய வந்தது.
அவரது உடலை அவசரமாக பிணவறைக்குள் கொண்டு சென்றது ஏன்? உடலை ஏன் காட்டவில்லை என கூறி, போலீசாரிடம் உறவினர்கள் வாக்குவாதம் செய்தனர்.
சபரிவர்மனின் குடும்பத்தினர், உறவினர்கள் மருத்துவக்கல்லூரி மெயின் ரோட்டில் மறியலில் ஈடுபட்டனர். சபரிவர்மனின் கையில் முறிவு போன்ற காயம் உள்ளதாகவும் முதுகில் ரத்த கட்டுகள் இருப்பதாகவும் காவல்துறையினர் தாக்கியே அவர் உயிரிழந்ததாகவும் உறவினர்கள் குற்றம் சாட்டியுள்ளனர்.
சபரிவர்மன் மரணத்தில் முறையான விசாரணை நடத்தப்பட வேண்டும் என்று வலியுறுத்தியுள்ளனர். சிறையில் இருந்தபோது உயிரிழந்த சபரிவர்மனின் குடும்பத்துக்கு 1 கோடி ரூபாய் நிதி மற்றும் அவரது மனைவிக்கு அரசு வேலை வழங்க வேண்டும் என கோரிக்கை வைத்துள்ளனர்.
தமிழ்நாட்டில் த.வெ.க ஆட்சி பொறுப்பேற்றதில் இருந்து த.வெ.க. நிர்வாகிகள், சட்டமன்ற உறுப்பினர்கள் ஆய்வு என்ற பெயரில் பல்வேறு குளறுபடிகள் செய்து வருகின்றனர்.
அதுமட்டுமின்றி இந்த ஆட்சியில் தொடர்ந்து நடைபெறும் பாலியல் வன்கொடுமை, கொலை, கொள்ளை என்று சட்டம் ஒழுங்கு சீர்கேடுகளில் தற்போது லாக்கப் டெத்தும் இணைந்து விட்டதா என்று மக்கள் அச்சம் கொண்டுள்ளனர்.