#Title

மாற்றுத்திறனாளியான சபரிவர்மனை – த.வெ.க. அரசின் காவல்துறை விசாரணைக்கு அழைத்துச் சென்று கொன்றுள்ளது! 60 நாட்களில் 4 காவல்துறை மரணங்கள் – ரீல்ஸ் வேண்டாம்! நீதி வேண்டும்! கழக சட்டத்துறை இணைச் செயலாளர் வழக்கறிஞர் இ.பரந்தாமன் அறிக்கை!

சென்னை, ஜூலை 16–

கழக வழக்கறிஞர் அணி இணைச் செயலாளர் இ.பரந்தாமன் அளித்துள்ள பேட்டி வருமாறு:–

கன்னியாகுமரி மாவட்டம் தென் தாமரைக்குளத்தைச் சேர்ந்த சபரிவர்மன் என்கின்ற ஒரு மாற்றுத்திறனாளி சகோதரரை படுகொலை செய்துள்ளது விஜய் அரசு. மாற்றம் என சொல்லி வந்த இந்த அரசில் பிண நாற்றம் அடித்துக் கொண்டிருக்கிறது.

கைது செய்யப்பட்ட ஒருவரை சிறையில் அடைப்பதற்கு முன், அவரை நீதித்துறை மாஜிஸ்திரேட் முன்புஆஜர்படுத்த வேண்டும். அதற்கு முன் மருத்துவ பரிசோதனை செய்து, “Medically fit to remand” என்ற சான்றிதழ் பெறப்பட வேண்டும். அந்த மருத்துவத் தகுதி சான்றிதழ் பெறப்பட்ட பிறகே அவரை நீதிமன்றத்தில் ஆஜர்படுத்தி, பின்னர் சிறைக்கு அனுப்ப முடியும்.

குடும்பத்தினர் பார்க்க

அனுமதியில்லை!

அவ்வாறு மருத்துவ ரீதியாக தகுதி உள்ளவர் என்ற சான்றிதழ் பெறப்பட்ட பிறகு, சபரிவர்மன் சிறைக்கு அனுப்பப்பட்டதாக கூறப்படுகிறது. பத்தாம் தேதி வெள்ளிக்கிழமை அன்று குடும்பத்தினர் சிறைச்சாலைக்கு சென்று அவரை சந்தித்ததாகவும், அப்போது அவர் நலமுடன் இருந்ததாகவும், நன்றாக பேசிக் கொண்டிருந்ததாகவும் கூறப்படுகிறது. ஆனால், பதிமூன்றாம் தேதி, சிறைச்சாலை யிலிருந்து காவல்துறை மூலமாக குடும்பத்தி னருக்கு தொலைபேசியில் தொடர்பு கொண்டு, சபரிவர்மன் உடல்நலக்குறைவால் மருத்துவமனையில் அனுமதிக்கப்பட்டுள்ளார் என்று தகவல் தெரிவிக்கப்பட்டதாக கூறப்படுகிறது. மருத்துவ மனைக்கு சென்ற குடும்பத்தினர் சபரிவர்மனை பார்க்க அனுமதி வழங்கப்படவில்லை. நீண்ட நேரம் காத்திருந்து வலியுறுத்திய பிறகு, அவர் பிண வரையில் வைக்கப்பட்டுள்ளார் என்று தெரிவித்துள்ளனர். அதன் பிறகுதான் அவர் உயிரிழந்துவிட்டார் என்ற தகவல் குடும்பத்தினருக்கு தெரிய வந்துள்ளது.

“டைவெர்டிங் பாலிடிக்ஸ்”

பத்தாம் தேதி நலமாக இருந்த சபரிவர்மன், பின்னர் மரணம் அடைந்ததாக காவல்துறை தெரிவித்ததைத் தொடர்ந்து, அந்த பகுதியில் குடும்பத்தினர் பெரிய அளவில் போராட்டம் நடத்தி வருகிறார்கள். இந்த சம்பவம் சில ஊடகங்களில் மட்டும் வெளியாகி உள்ளது. அதே நேரத்தில், முதலமைச்சர் பெரம்பூரில் நடைபெற்ற நிகழ்ச்சியில் கலந்து கொண்டு, இந்த சம்பவத்திலிருந்து மக்களின் கவனத்தை திசைதிருப்பும் வகையில் நடந்து கொண்டார். இந்த அரசு ஆட்சிக்கு வந்ததில் இருந்து “டைவெர்டிங் பாலிடிக்ஸ்” மட்டுமே செய்து வருகிறது என்தை திராவிட முன்னேற்றக்கழகம் ஆரம்பத்தி லிருந்தே கூறி வருகிறது.

இருநூறு கிராம் குட்கா வைத்திருந்த மாற்றுத்திறனாளி ஒருவரை அடித்துக் கொலை செய்துள்ளது காவல்துறை. ஆனால் அதே சமயம் 40 கோடி ரூபாய் குட்கா கம்பெனிகளிடம் லஞ்சமாக பெற்ற குட்கா விஜய்பாஸ்கரை சிவப்பு கம்பளம் விரித்து கட்சியில் இணைத்துக்கொண்டுள்ளது. இதுதான் இன்றைய விஜய் அரசின் மாற்றம்.

திராவிட முன்னேற்றக் கழக ஆட்சிக் காலத்தில், மடப்புரம் கோவில் காவலாளி அஜீத் குமார் தாக்கப்பட்டு உயிரிழந்த சம்பவத்தின் போது விஜய் மேடை போட்டு பேசினார்.

அப்போது நடந்த சம்பவத்திற்காக பொறுப்பேற்று அவர் குடும்பத்திடம் எங்களது தலைவர் மன்னிப்பு கேட்டார். ஆனால் அப்போது சாரி வேண்டாம் எங்களுக்கு நீதி வேண்டும் என பேசினார் விஜய். இன்று அவரைப் பார்த்து “ரீல்ஸ் வேண்டாம்; எங்களுக்கு நீதி வேண்டும்” என்று தமிழ்நாட்டு மக்கள் கேட்கிறார்கள்.

அஜீத் குமார் கொலல்ப்பட்ட வழக்கில் காவல்துறை சம்மந்தப்பட்டு இருந்ததால் விமர்சனங்கள் ஏதும் எழ கூடாது என வழக்கை தானாக முன்வந்து CBI க்கு மாற்றி உத்தரவிட்ட எங்களது முதலமைச்சர் எங்கே, இன்று சபரிவர்மன் கொல்லப்பட்டதை கண்டும் காணாமல் ஓடு ஓடு என ஓடும் இவர் எங்கே.? இந்த அரசு பிரச்சனைகளை கண்டு ஓடுகிற மாடல் அரசா.? பிரச்சனை என்றால் பதுங்குகிற அரசா .? என்ற கேள்வி தமிழ்நாட்டு மக்கள்மனதில் ஏற்பட்டுள்ளது.

இந்த த.வெ.க. அரசு பொறுப்பேற்ற 60 நாட்களில் மட்டும் இதுபோன்ற 4 சம்பவங்கள் நடந்துள்ளன.

சென்னை எம்.ஜி.ஆர். நகரில் வெங்கடேஷ் என்ற காவலாளி காவல்துறையால் கைது செய்யப்பட்டு விசாரணைக்கு உட்படுத்தப்பட்ட பிறகு, மறுநாள் உயிரிழந்துள்ளார். திருச்சியில் ஸ்ரீராம் என்ற நபர் காவல்துறையால் விசாரணைக்காக அழைத்துச் செல்லப்பட்டு, பின்னர் அவர் வீட்டில் தூக்கிட்டு உயிரிழந்ததுள்ளார். கிருஷ்ணகிரியில் 17 வயது சிறுவனுடன் காவல்துறை அதிகாரி ஒருவர் தகராறு செய்து, அவரது செல்போனை பறிமுதல் செய்ததால், அந்த சிறுவன் தற்கொலை செய்துகொண்டுள்ளார். தென்காசி அருகே சிவகிரியில், அந்தோணிராஜன் என்ற முதியவர் காவல்துறை விசாரணைக்கு அழைக்கப்பட்டு, துன்புறுத்தப்பட்டதால் தற்கொலை செய்துகொண்டுள்ளர். இப்படி அறுபதே நாட்களில் காவல்துறையால் நான்கு மரணங்கள் நடந்துள்ளன.

சட்டம் அனைவருக்கும் சமம்!

“ஆளுக்கொரு நீதி ஆளுக்கொரு சட்டமா.? சட்டம் அனைவருக்கும் சமம்” ஆனால் இப்போது தவெக நிர்வாகி களுக்கு ஒரு சட்டம் மற்றவர்களுக்கு வேறு ஒரு சட்டம் தான் நடைமுறையில் உள்ளது என்று பேச்சாளர் குற்றம்சாட்டு கிறார்.

ஈரோடு பவானியை சேர்ந்த அருண் என்ற தவெக நிர்வாகி 140 கிலோ குட்கா கடத்தியதா கைது செய்யபட்டார். அவர் ஏற்கனவே நான்கு ஆண்டுகளுக்கு முன்பு குட்கா கடத்தி குண்டர் சட்டத்தில் கைது செய்யப்பட்டவர். அப்படி இருக்கும் நபர் மீண்டும் கைது செய்யப்பட்ட போது அவரை உடனடியாக ஸ்டேஷன் ஜாமீனில் விடுவித்துள்ளனர் காரணம் அவர் தவெக நிர்வாகி. கரூர் குளித்தலை பகுதியில் ஒரு பெண்ணுக்கு பாலியல் தொல்லை கொடுத்த தவெக ஒன்றிய செயலாளர் மீது இதுவரை நடவடிக்கை எடுக்கவில்லை. பொதுமக்களே சென்று அவரை தண்டித்துள்ளனர். ஸ்ரீவைகுண்டம் தொகுதி சட்டமன்ற உறுப்பினர் சரவணன் மீது விஜய் ரசிகர்மன்ற ரசிகையே புகார் கூறி உள்ளார் இதுவரை எந்த நவடிக்கையும் இல்லை. ஆனால் அந்த எம். எல். ஏ விற்கு துப்பாக்கி ஏந்திய போலீஸ் பாதுகாப்பு கொடுத்துள்ளனர். அதேபோல திருப்பூரில் பத்து லட்சம் ரூபாய் மதிப்புள்ள கஞ்சா கடத்திய தவெக கட்சி நிர்வாகி கைது செய்யப்பட்டுள்ளர். ஆனால் அவருக்கெல்லாம் எந்தவித டார்ச்சரும் இல்லை ஏன் என்றால் அவர் தவெக நிர்வாகி. ஆனால் சாதாரண மாற்றுத்திறனாளியை 200 கிராம் குட்கா வைத்திருந்ததாக கூறி விசாரணைக்கு அழைத்து சென்று கொலை செய்துள்ளது.

கடந்த எங்களது ஆட்சியில் இதுபோன்றதொரு சம்பவம் நடந்த போது இந்திய தண்டனைச் சட்டம் பிரிவு 302–ன் கீழ் வழக்கு பதிவு செய்தோம். இந்தியாவிலேயே முதல்முறையாக கொலை வழக்கு பதிந்து விசாரணை நடத்தியது எங்களது அரசு. ஆனால் இந்த அரசு இதுவரை எந்த நடவடிக்கையும் எடுக்கவில்லை. சிறைச்சாலையில் பணியாற்றிய ஜெயிலர் மற்றும் வார்டன்கள் ஜெகன், சிவக்குமார் ஆகியோர் இதுவரை கைது செய்யப்படவில்லை.

உடல் எங்கும் காயம்!

இன்று மாஜிஸ்திரேட் உடலைப் பார்த்தபோது அவரது உடலில் பல்வேறு காயங்கள் இருந்துள்ளன. அவரது கால்கள் கட்டப்பட்டிருந்தன, கைகளில் காயங்கள் இருந்தன, ஆண் உறுப்பில் காயம் இருந்தது, நெஞ்சுப் பகுதியில் காயம் இருந்தது என்று மாஜிஸ்திரேட் தனது அறிக்கையில் பதிவு செய்துள்ளார். அவர் கைது செய்யப்பட்டு சிறைக்கு சென்ற பிறகு எவ்வாறு மரணம் அடைந்தார் என்பதற்கு இந்த அரசு இதுவரை தெளிவான விளக்கம் அளிக்கவில்லை. காவல்துறைக்கு பொறுப்பான முதலமைச்சர் விஜயும் இதுவரை எந்த பதிலும் அளிக்கவில்லை. அவருக்கே இந்த தகவல் தெரியுமா என்ற சந்தேகம் எழுகிறது. குதிரை பேரத்தில் ஈடுபட்டு குதிரைகளை விலைக்கு வாங்கும் விஜய் அரசாங்கத்திற்கு மனித உயிரின் மதிப்பு தெரியவில்லை. குற்றவாளி தவெக கட்சியை சார்ந்தவர் என்றால் ஜாமீன் மற்றவர்கள் என்றல் மரணம். இந்த வழக்கில் முறையான விசாரணை நடத்தி குற்றவாளிகள் தண்டிக்கப்பட வேண்டும். இதில் தொடர்புடைய காவலர்கள் கைது செய்யபடவேண்டும். ரீல்ஸ் முதலமைச்சராக இல்லாமல் ரியல் முதலமைச்சராக இருக்க வேண்டும். படத்தில் ஹீரோவாக இருக்கலாம் ஆனால் ஆட்சி அதிகாரத்தில் இன்று ஜீரோவாக உள்ளீர்கள். பாதிக்கபட்ட குடும்பத்திற்கு உரிய நீதி வழங்கவேண்டும். தேவைப்பட்டால் திமுக நீதிமன்றத்திற்குச் செல்லும்.

இவ்வாறு அவர் தனது பேட்டியில் குறிப்பிட்டார்.