#Title

ரூ.120 கோடி மதிப்பு கோயில் நிலம்; ரூ.2 கோடிக்கு பத்திரப்பதிவு! அமைச்சர்களின் முரண்பட்ட கருத்துகளால் உண்மை வெளிச்சத்துக்கு வந்தது!

சென்னை, ஜூலை 16 –

ரூ.120 கோடி மதிப்புள்ள பழநி தண்டாயுதபாணி கோயில் நிலம், ரூ.2 கோடிக்கு பத்திரப்பதிவு நடந்தது உண்மை தான் என பத்திரப்பதிவுத்துறை அமைச்சர் லோகேஷ் தமிழ்செல்வனும், நிலத்தின் விவரம் சரிவரி தெரியாமல் பத்திரப்பதிவு நடத்துள்ளது என அறநிலையத்துறை அமைச்சர் ரமேசும் தெரிவித்த முரண்பட்ட கருத்துகளால் குழப்பம் ஏற்பட்டுள்ளது. பழநி தண்டாயுத பாணி கோயிலுக்கு சொந்தமான ஏறக்குறைய ரூ.120 கோடி மதிப்புடைய நிலம் வெறும் ரூ.2 கோடிக்கு விதிகளை மீறி தனியாருக்கு விற்பனை செய்யப்பட்டுள்ளதாக சர்ச்சைகள் எழுந்துள்ளன. இதுகுறித்து நேற்று சென்னை தலைமை செயலகத்தில் அறநிலையத்துறை அமைச்சர் ரமேஷ் மற்றும் பதிவுத் துறை அமைச்சர் லோகேஷ் ஆகியோர் கூட்டாக நிருபர் களை சந்தித்தனர்.

அப்போது ரமேஷ் பேசியதாவது: பழநி நிலம் முறைகேடாக பதிவாகியுள்ளதாக செய்திகள் வந்தன. பொய், புரட்டு, வன்மத்துடன் பல்வேறு கட்சியினர் செய்தி பரப்புகின்றனர். எனது உறவினர் பெயரில் பதிவாகியுள்ளதாக கூறியுள்ளனர். எனக்கு அவர் உறவினர் என இவர்களாகவே கண்டுபிடித்து கூறியுள்ளனர். அரசுக்கு தெரிந்து இந்த நிலப்பதிவு நடந்துள்ளதாக கூறியுள்ள னர். பழநி கோயில் அடிவாரத்தில் உள்ள தண்டபாணி மடத்துக்கு சொந்தமான நிலத்தை யாருக்கும் பதிவு செய்ய கூடாது என பலமுறை கோயில் இணை ஆணையர் மூலம் பல கடிதங்கள் பத்திரப்பதிவுத் துறைக்கு வழங்கப்பட்டுள்ளன. 2026 மார்ச் 27ல் அந்த நிலத்தை பதிவு செய்ய முயற்சி நடந்துள்ளது.

ஆனால் அப்போது சார்பதிவாளர் அலுவலகத்தில் அந்த நிலத்தை பதிவு செய்ய முடியாது என விளக்க கடிதம் கொடுத்துள்ளனர். நிலத்தை பதிவு செய்ய முடியாது என ஏப்ரல் 1ம் தேதி பதிவுத்துறை சார்பில் அந்த விளக்க கடிதம் கொடுக்கப்பட்டது. நிலத்தை பதிவு செய்ய முயன்றவர்கள் அந்த விளக்க ஆவணத்தை வைத்து நீதிமன்றம் சென்றுள்ளனர். ஆவணங்கள் சரிவர இருந்தால் நிலத்தை பதிவு செய்வது குறித்து ஆலோசிக்கலாம் என நீதிமன்றம் கூறியிருந்தது. அந்த தீர்ப்பை வைத்து ஜூலை 3ம் தேதி நிலத்தை பதிவு செய்ய முயற்சிக்கி ன்றனர். அதற்கு ஒருநாள் முன்பு அதாவது ஜூலை 2ம் தேதியே பழநி கோயில் இணை ஆணையர் அந்த நிலத்தை தனியாருக்கு கிரயம் செய்ய கூடாது என மாவட்ட பதிவாளருக்கு கடிதம் எழுதி இருக்கிறார்.

சார்பதிவாளர் பணியில் இருந்தவர் விடுமுறையில் சென்றதால் ஜூலை 6ம் தேதி கூடுதல் பொறுப்பாக ஜஸ்டின் மணிகண்டன் என்பவர் சார்பதிவாளர் பொறுப்புக்கு வருகிறார். அவருக்கு அந்த நிலம் குறித்த தகவல் சரிவர தெரியாததால் அந்த நிலத்தை அவர் ஜூலை 6ம் தேதி பதிவு செய்து கொடுத்து விடுகிறார். இந்த தகவல் தெரிந்தவுடன் நீதிமன்றத்தில் அறநிலையத்துறை, பதிவுத்துறை சார்பில் இதுகுறித்து வழக்கு பதிவு செய்யப்பட்டது. அரசு மீண்டும் அந்த இடத்தை கைப்பற்றும். நிலத்தை பதிவு செய்த சார்பதிவாளர் இடைநீக்கம் செய்யப்பட்டு ஒழுங்கு நடவடிக்கை எடுக்கப்பட்டுள்ளது. நிலத்தை வாங்க முயற்சித்தவர், பதிவு செய்த சார்பதிவாளர் மீது வழக்கு பதிந்து விசாரணை நடந்து வருகிறது.

துறை ரீதியாகவும் விசாரணை நடைபெறுகிறது. நிலத்தை பதிவு செய்தோர் எனது உறவினர் என பொய் பரப்பியவர்கள் மீது காவல்துறையில் புகார் அளித்துள்ளேன். என் உறவினர் என நிரூபித்தால் ஆதாரம் வழங்கட்டும். கோயில் நிலங்களை ஒரு இன்ச் கூட யாருக்கும் தர நாங்கள் தயாரில்லை. இந்த பிரச்னை நடக்கும்போது இணை ஆணையருக்கு, கூடுதல் ஆணையராக பதவி உயர்வு வழங்கியதற்கு காரணம், மாரிமுத்து பதவி உயர்வு பட்டியலில் இருந்ததால் பதவி உயர்வு வழங்கப்பட்டது. அதில் என்ன தவறு இருக்கிறது. அந்த நிலத்தை தனியாருக்கு வழங்க கூடாது என 4 முறை பதிவுத் துறைக்கு கடிதம் எழுதியவர் அவர். என் மீது ஆதாரம் இல்லாத குற்றச்சாட்டுகளை சுமத்துவது குறித்து புகார் அளித்துள்ளேன்.

கரூர் வெண்ணைமலையில் கோயில் நிலம் தாரைவார்க்கப்பட்டதாக கூறுவது தவறு. அந்த நிலம் பற்றிய எந்த தகவலும் இன்றி நயினார் நாகேந்திரன் போன்றோர் பேசி வருகின்றனர். இனாம் ஒழிப்பு சட்டம் மூலம் 1963-67 காலத்தில் அந்த இடத்தை அனுபவிக்கும் உரிமையை அங்கு வாழ்ந்தவர்களுக்கு வழங்கி உள்ளனர். பட்டா வாங்கி 60 ஆண்டுகளாக அங்கு மக்கள் வாழ்ந்து வருகின்றனர். கரூரில் பட்டா கொடுத்து அந்த உரிமையாளர்களுக்கு அரசு இழப்பீடும் கடந்த காலத்தில் வழங்கி உள்ளது. பின்னர் கரூரில் அரசியல் சூழ லுக்காக 1912 நிலப்பதிவுகளை எடுத்து வைத்துக்கொண்டு அந்த நிலத்தை பொருளாதார ரீதியாக பயன்படுத்த முடியாத நிலையை உருவாக்குகின்றனர். அந்த நிலங்களை மதிப்பற்ற நிலங்களாக வகைப்படுத்தி வைத்தனர்.

அதனால் அந்த மக்கள் நிலத்தை அவசர தேவைக்காக கூட விற்க முடியாமல் போராட்டம் நடத்தி வந்தனர். கரூர் கோயில் நிலம் தொடர்பாக கடந்த தேர்தலில் அதிமுக - பாஜ தேர்தல் அறிக்கையில் கூறி இருந்ததை தான் நாங்கள் செய்துள்ளோம். கரூரில் 3071 இனங்களில், 2024 சர்வே எண் கொண்ட கோயில் நிலங்களும், 1167 பட்டா நிலங்களும் உள்ளன. இனாம் ஒழிப்பு சட்டம் மூலம் கொடுக்கப்பட்ட நிலங்கள் தெளிவான நிலம் என குறிப்பிடப்ப ட்டுள்ளன. அந்த நிலம் மீது எந்த கோயில் நிர்வாகம் சார்பிலும் வழக்கு தொடரவில்லை. கரூரில் கோயில் நிலத்தை புதிதாக யாருக்கும் நாங்கள் பட்டா போட்டு வழங்கவில்லை. அந்த நிலங்களை விற்க உரிமையாளர்களுக்கு வழங்கப்பட்டிருந்த தடைகளைத்தான் தற்போது நீக்கி உள்ளோம். இவ்வாறு அவர் கூறினார்.

பதிவுத்துறை அமைச்சர் லோகேஷ் கூறியதாவது: பழநியில் தவறு நடந்துள்ளதை ஏற்றுக் கொள்கிறேன். சார்பதிவாளர் தவறு செய்ததால்தான் அவர் மீது நடவடிக்கை எடுத்துள்ளோம். நீதிமன்ற வழிகாட்டுதல் அடிப்படையிலேயே கிரயம் செய்ததாக சார்பதிவாளர் கூறினார். அந்த பதிவை தற்போது நிறுத்தி வைத்துள்ளோம். பழநி நில விவகாரத்தில் சார்பதிவாளருக்கு மேல் அதிகாரிகள் யாரும் தவறில் ஈடுபட்டிருந்தால் அவர்கள் மீதும் நடவடிக்கை எடுக்கப்படும். மேலும், முதல்வரின் அனுமதி பெற்று தேவைப்பட்டால் மேல்மட்ட விசாரணை நடத்தப்படும். இவ்வாறு அவர் கூறினார்.