சேலம், ஜூலை 16 –
ஆத்தூர் நகராட்சி துப்புரவு பணிகளுக்கு பத்திரத்தில் எழுதி வாங்கி கொண்டு பணியில் அமர்த்தபடுகிறது.அடிப்படை உரிமைகளை கேட்க கூடாது. போராட்டத்தில் ஈடுபட கூடாது என்று பத்திரத்தில் எழுதி வாங்கி பணியில் அமர்த்தும் அடிமை நிலை குறித்து விசாரணை நடத்திட கோரிக்கை.
சேலம் மாவட்டம் ஆத்தூர் நகராட்சி துப்புரவு பணியாளர்களுக்கு துறையூர் பகுதியைச் சேர்ந்த தனியார் ஒப்பந்த நிறுவனமான எஸ். ஆர்.எண்டர்பிரைசஸ் நிறுவனம் சார்பில் ஆட்கள் தேர்வு செய்யப்பட்டு வருகிறது.
துப்புரவு தூய்மை பணிகளுக்கு ஆட்களை தேர்வு செய்யும் அந்த நிறுவனம் கொத்தடிமைகளை போல பத்திரத்தில் எழுதி வாங்கும் அவலம் அரங்கேறி வருகிறது.
எஸ். ஆர். எண்டர்பிரைசஸ் நிறுவனத்தைச் சேர்ந்த கண்காணிப்பாளராக உள்ள அருண் என்பவர் 100 ரூபாய் பத்திரத்தில் துப்புரவுப் பணி செய்ய வரும் பணியாளர்களிடத்தில் அரசின் எந்த சலுகையும் கேட்கக் கூடாது. நிரந்தர பணியாளர்களுக்கு வழங்கப்படும் இ.எஸ்.ஐ., பி.எப். போன்றவற்றை கேட்கக் கூடாது. பணியாளர்கள் சங்கங்கள் சார்பில் பணி நிரந்தரம் கேட்டு போராட்டம் நடத்தக்கூடாது. போராட்டம் நடத்தினால் நிர்வாகம் எடுக்கும் முடிவிற்கே கட்டுப்பட்டு பணியில் இருந்து விலகிக் கொள்ள வேண்டும். எந்த பிரச்சினையும் செய்யக்கூடாது என 100 ரூபாய் பத்திரத்தில் தொழிலாளர்களிடம் கையெழுத்து வாங்கி அடிமைகள் போல் மாற்றி வரும் நிலை ஏற்பட்டுள்ளது.