#Title

கழகத் தலைவர் முதல்வராக இருந்தபோது அவரது சிந்தையில் உதித்த வடசென்னை வளர்ச்சித் திட்டத்தை முழுமையாக முடக்கிவிட்டது த.வெ.க. அரசு! முன்னாள் அமைச்சர் பி.கே.சேகர்பாபு குற்றச்சாட்டு!

சென்னை, ஜூலை 17–

எங்கள் கழகத் தலைவர் மு.க.ஸ்டாலின் அவர்கள் முதல்வராக இருந்தபோது அவரது சிந்தையில் உதித்த வடசென்னை வளர்ச்சித் திட்டத்தை விஜய் தலைமையிலான த.வெ.க. அரசு முழுமையாக முடக்கிவிட்டது என முன்னாள் அமைச்சர் பி.கே.சேகர்பாபு குற்றம் சாட்டியுள்ளார்.

கல்வி வள்ளல் காமராஜர் பிறந்த நாளான நேற்று முன்தினம் (15.7.2026) சென்னை அண்ணா சாலை பல்லவன் இல்லம் எதிரே அமைந்துள்ள ஜிம்கானா கிளப் வாசலில் அமைந்துள்ள கல்வி வள்ளல் காமராஜர் சிலைக்கு மேனாள் அமைச்சர் பி.கே.சேகர் பாபு அவர்கள் மாலை அணிவித்து மரியாதை செய்தார்.

பிறகு செய்தியாளர்களுக்கு அளித்த பேட்டி வருமாறு:

மாணவச் செல்வங்களின் கல்விக்கு உயர்வு தந்தவர் திராவிட முன்னேற்றக் கழகத் தலைவர் தளபதி மு.க.ஸ்டாலின் அவர்கள். காமராஜர் ஒரு கர்மவீரர்; அவர் வழியிலே திராவிட முன்னேற்றக் கழகத்திடைய தலைவர் கடமை வீரராக இன்றைக்குப் பணியாற்றிக் கொண்டிருக்கின்றார்.

கலைஞர் அவர்கள் ஆட்சி காலத்திலும் சரி, ‘திராவிட மாடல்’ ஆட்சியுடைய நாயகனாக இருந்த திராவிட முன்னேற்றக் கழகத்தில் எங்கள் உயிரினும் மேலான தலைவர் ஆட்சி காலத்திலும் சரி, காமராஜர் புகழுக்குப் புகழ் சேர்க்கின்ற அனைத்துப் பணிகளையும் மேற்கொண்டிருக்கின்றோம்.

அந்த வகையில் 23 துறைகளை ஒருங்கிணைத்து, காமராஜர் பிறந்த நாளிலே, ‘‘உங்களுடன் ஸ்டாலின்’’ என்ற திட்டத்தை, காமராஜருக்குப் பெருமை சேர்க்கின்ற வண்ணம் தொடங்கி, பல லட்சம் மக்கள், பல ஆண்டு காலமாக அமைப்பு ரீதியான. இருப்பிடச் சான்றிதழ், சொத்து மாற்றம் சான்றிதழ், அதேபோல் ஜாதிச் சான்றிதழ் அதேபோல் வருமானச் சான்றிதழ்–ஆதார் அட்டை போன்றவை கிடைக்காமல், பல ஆண்டு காலம் தவித்த மக்களுக்கு, காமராஜர் பிறந்தநாளை முன்னிட்டு அறிவிக்கப்பட்ட ‘‘உங்களுடன் ஸ்டாலின்’’ திட்டத்தால் பல லட்சம் மக்கள் பயன்பெற்றது, காமராஜர் நினைவைப் போற்றுகின்ற வகையில் அமைந்திருந்தது.

காமராஜருக்கு புகழ் சேர்த்த கழக அரசு!

அந்த வகையிலே காமராஜரின் புகழுக்காக எடுக்கப்பட்ட அனைத்து நடவடிக்கைகளும், காமராஜருக்காக, காமராஜர் பிறந்தநாளை ‘கல்வி வளர்ச்சி நாளாக’ அறிவித்த முத்தமிழறிஞர் கலைஞர் அவர்களுடைய நினைவை இந்த நேரத்தில் போற்றுகிறோம். காமராசருடைய நினைவு இல்லமாக இருக்கின்ற அந்த இல்லத்தைப் புதுப்பிப்பத்திற்கு உத்தரவிட்ட திராவிட மாடல் ஆட்சி யினுடைய நாயகன் – திராவிட முன்னேற்றக் கழக தலைவரையும் இந்த நேரத்தில் நாம் நினைவு கூருவோம்.

அந்த வகையில், காமராஜரின் புகழுக்குப் புகழ் சேர்த்த, மறைந்த முத்தமிழ் அறிஞர் கலைஞர் அவர்களும், வாழும் கலைஞராக இருக்கின்ற திராவிட முன்னேற்றக் கழகத்தின் தலைவர் அவர்களும், எந்நாளும் கல்விக்கும், மக்களுடைய அடிப்படைத் தேவைகளுக்கும் முன்னுரிமை தருகின்ற ஓர் இயக்கமாக திராவிட முன்னேற்றக் கழகம் விளங்குகிறது என்பதை மகிழ்ச்சியோடு தெரிவித்துக் கொள்கிறோம்.

அறநிலையத்துறையில் விரும்பத்தகாத நிகழ்வுகள்!

செய்தியாளர்: பழனி கோயில் பிரச்சினை குறித்து அமைச்சர் பேசும்போது, முறைகேடு நடந்திருக்கிறது என்று சொல்லிருக்காரே, அதுகுறித்து உங்கள் கருத்து என்ன?

முன்னாள் அமைச்சர் பி.கே. சேகர்பாபு எம்.எல்.ஏ.: அந்தத் துறையில் நடைபெறுகின்ற அனைத்து விரும்பத் தகாத நிகழ்வுகளையும், சட்டமன்றத்தினுடைய மானியக் கோரிக்கைகளில் தெளிவாக எடுத்துரைப்போம். 100 நாள் கணக்கென்று வைத்திருக்கின்றோம்.

செய்தியாளர்: தி.மு.க. ஆட்சியின்போது வேளச்சேரியில் பாலம் கட்டும் ஒப்பந்தத்தை ரத்து செய்திருக்கிறார்களே, நிதி நெருக்கடி என்ற ஒரு காரணத்தைச் சொல்லியிருக்கிறார்களே? அப்படி ஒரு காரணத்தைச் சொல்லிருக்கிறார் களே?

பி.கே.சேகர்பாபு: சென்னையை பொறுத்தளவில், வளர்ச்சித் திட்டங்கள் என்ற வகையிலே, சென்னை பெருநகர மாநகராட்சி மேற்கொண்ட ரூ.800 கோடிக்கும் மேலான வளர்ச்சித் திட்டப் பணிகளை ரத்து செய்திருக்கின்றார்கள். ரத்து செய்யப்பட்ட பணிகளை, மீண்டும் எப்பொழுது ஒப்பந்தம் கோரப்பட்டு, மக்களுடைய அடிப்படை தேவைகளுக்கு இன்றியமையாத பணிகள் என்பதை உணர்ந்து, வெகுவிரைவில் அந்தப் பணிகளை மக்கள் பயன்பாட்டிற்குக் கொண்டுவர வேண்டும்.

திராவிட மாடல் ஆட்சியினுடைய நாயகன் எங்கள் உயிரினும் மேலான திராவிட முன்னேற்றக் கழகத் தலைவரின் சிந்தையில் உதித்திட்ட வடசென்னை வளர்ச்சித் திட்டத்தை முழுமையாக இன்றைக்கு முடக்கி வைத்திருக்கிறார்கள். அந்த ஒவ்வொரு திட்டமும், ஏழை – எளிய மக்களுடைய அன்றாட வாழ்க்கையில் பின்னிப் பிணைந்திருக்கின்ற திட்டங்கள்.

எங்கள் தலைவருக்கு புகழ் என்பதால் முடக்குகிறார்கள்!

அந்தத் திட்டங்களையும் நிதி நெருக்கடி என்று காரணம் காட்டி, கடந்த ஆட்சிக் காலத்தில் கொண்டுவரப்பட்ட திட்டங்கள் திராவிட முன்னேற்றக் கழகத்தினுடைய தலைவரின் புகழுக்குப் புகழ் சேர்க்கும் என்கிற காரணத்தால், நூலகங்கள், படைப்பகங்கள், விளையாட்டு மைதானங்கள், விளையாட்டுக் கூடங்கள், பூங்காக்கள், அதேபோல் கழிவுநீரேற்று நிலையங்கள், அதேபோல் தடையின்றி வழங்கப்பட இருக்கின்ற மின்சாரங்கள் இப்படிப்பட்ட பணிகளுக்கு, இன்றைக்குத் தடைகளை ஏற்படுத்தி இருக்கின்றார்கள். இவை அனைத்தும் மக்கள் வளர்ச்சிக்கான திட்டங்கள் என்பதால், இந்த ஆட்சியாளர்கள் அந்தப் பணியைத் தொடர வேண்டும் என்று இந்த நேரத்தில் வேண்டுகோள் வைக்கிறேன்.

செய்தியாளர்: தி.மு.க. ஆட்சியில் கொண்டு வரப்பட்ட திட்டங் களின் பெயர்களையெல்லாம் மாற்றி வைக்கிறதே த.வெ.க. அரசு?

பி.கே.சேகர்பாபு : அது அவர்களின் காழ்ப்புணர்ச்சியைத்தான் காட்டுகிறது. மக்கள் அனைத்தையும் உன்னிப்பாகக் கவனித்துக் கொண்டிருக்கின்றார்கள். உதாரணத்திற்குச் சொல்ல வேண்டும் என்றால், மயிலேடி பூங்காவில் அமைக்கப்பட்டிருந்த கல்வெட்டு, அவர் துணை முதல் அமைச்சராக இருந்த போது திறக்கப்பட்ட கல்வெட்டு. அந்த மயிலேடி பூங்காவினுடைய கல்வெட்டை, இரண்டு நாட்களுக்கு முன்பு அகற்றி இருக்கின்றார்கள்.

கல்வெட்டை அகற்றலாம்

மக்கள் மனதிலிருந்து

கழகத் தலைவரை அகற்ற முடியாது!

அதேபோல் ராயபுரம் மண்டலம் 5 எதிரிலே இருக்கின்ற முதல்வர் திருமண மாளிகையிலே பதிக்கப்பட்டிருந்த இரண்டு கல்வெட்டு களையும் அகற்றி இருக்கின்றார்கள். இப்படி கல்வெட்டுகளை அகற்றுவதால், திராவிட முன்னேற்றக் கழக தலைவருடைய புகழ் பணிகளை எந்நாளும் மறைக்க முடியாது. கல்வெட்டுகளை வேண்டுமென்றால் அகற்றலாம். மக்களு டைய இதய சிம்மாசனத்திலே குடியிருக்கின்ற அவரது பெயரை எதை வைத்து அகற்றுவார்கள்? எதை வைத்து நீக்குவார்கள்?

ஆகவே, இந்தக் காழ்ப்புணர்ச்சியை மக்கள் உன்னிப்பாகக் கவனித்துக் கொண்டிருக்கின்றார்கள். தகுந்த பாடம் விரைவில் கற்பிப்பார்கள்.

– இவ்வாறு முன்னாள் அமைச்சர் பி.கே.சேகர்பாபு பேட்டி யளித்தார்.