சென்னை, ஜூலை 17 –

பெருந்தலைவர் காமராஜருடைய பிறந்த நாள் விழாவில்அவரது சிலைக்கு மாலை அணிவித்து மரியாதை செலுத்திய பிறகு கழக அமைப்புச் செயலாளர் ஆர்.எஸ்.பாரதி அவர்கள் அளித்த பேட்டி வருமாறு :–

“திராவிட முன்னேற்றக் கழகத்திற்கும், பெருந்தலைவர் காமராஜர் அவர்களுக்கும் இருக்கின்ற தொடர்பைக் கூற வேண்டுமானால், பெருந்தலைவர் காமராஜர் அவர்கள் முதலமைச்சராக வந்த பிறகு குடியாத்தம் சட்டமன்ற தொகுதியில் போட்டியிட்டார். அப்போதே எங்கள் தலைவர் பேரறிஞர் அண்ணா அவர்கள் காமராஜரை ஆதரித்து குணாளா குலக்கொழுந்தே என்று வர்ணித்து பிரச்சாரம் செய்து, அவர் ஆட்சி பீடத்தில் அமர்வதற்கு காரணமாக இருந்ததில் திராவிட முன்னேற்றக் கழகத்திற்கும் பங்கு உண்டு.

அதேபோல காமராஜர் அவர்கள் உயிரோடு இருக்கிற போதே அவருக்கு இன்றைய அண்ணா சாலையில் பிரம்மாண்டமாக நிற்கிற சிலையை சென்னை மாநகராட்சியின் சார்பில் முதல் முதலில் அமைத்தது திராவிட முன்னேற்றக் கழகம். பேரறிஞர் அண்ணாவுக்கு சிலை வைக்க வேண்டும் என்று திமுக நகரமன்ற உறுப்பினர்கள் எல்லோரும் விரும்பிய அந்த நேரத்தில் அண்ணா அவர்கள், ‘எனக்கு சிலை தேவையில்லை பெருந்தலைவர் காமராஜருக்கு வையுங்கள்’ என்று சொல்லி சிலை அமைத்து, அந்த சிலையை நேருவை வைத்தே திறக்க வைத்த பெருமை திராவிட முன்னேற்றக் கழகத்துக்கு உண்டு. இப்படி ஒவ்வொரு நிகழ்விலும் காமராஜரோடு பின்னிப் பிணைந்தது திராவிட முன்னேற்ற கழகம்.

டெல்லியில் காமராஜர் வீட்டுக்குத் தீ வைத்த போது அவர் உறங்கிக் கொண்டிருந்தார். அந்த நேரத்தில் அந்த வழியாக சென்று கொண்டிருந்த அசோகா ஹோட்டல் ஊழியரான குடியாத்தத்தைச் சார்ந்த கோதண்டபாணி என்கிற திமுக தொண்டர் பாய்ந்து சென்று காமராஜரை வெளியே மீட்டு வந்தார். காமராஜர் உயிரைக் காப்பாற்றிய அந்த கோதண்டபாணியும் தி.மு.க.வைச் சார்ந்தவர் தான் இதெல்லாம் வரலாறு.

அதேபோல கொடுமையான மிசா காலத்தில் காமராஜரை கைது செய்ய வேண்டும் என்ற உத்தரவு வந்தபோது ‘முடியாது’ என்று மறுத்தவர் தலைவர் கலைஞர். அதோடு மட்டுமல்ல அதற்காக ‘முதலமைச்சர் பதவியை ராஜினாமா செய்கிறேன்’ என்று கூறி காமராஜருடைய ஒப்புதலுக்காக சென்றபோது காமராஜர் தான், ‘நீ இருந்தால்தான் நான் வெளியே இருக்க முடியும், நீயும் ராஜினாமா செய்துவிட்டால் நான் சிறைக்கு போக வேண்டும்’ என்று கூறிய காரணத்தினால் ஆட்சியில் அன்றைக்கு நீடித்தார்.

அக்டோபர் 2ஆம் தேதி மறைந்தார் பெருந்தலைவர் காமராஜர். அவர் மறைந்தபோது அவருக்கு காங்கிரஸிலே இருக்கிற சில பேர் சத்தியமூர்த்தி பவனிலும், காங்கிரஸ் மைதானத்திலும் அடக்கம் செய்ய வேண்டும் என்று சொன்ன நேரத்தில், அவருக்கு அரசு மரியாதையோடு ராஜாஜி மண்டபத்தில் அவருடைய உடலை வைத்து, கொட்டுகிற மழையிலே சென்னை கிண்டி காந்தி மண்டபத்திற்கு அருகிலே இருக்கிற இந்த காட்டை சீர்படுத்தி, விளக்கு வசதிகள் இல்லாத நேரத்தில், கார் லைட்டினுடைய வெளிச்சத்தில், அப்போது முதலமைச்சராக இருந்த கலைஞர் அவர்கள் தலையில் முண்டாசு கட்டிக்கொண்டு அந்த காட்டை சீர்படுத்தி காமராஜரை நல்லடக்கம் செய்தார். அன்றைக்கு இருந்த மூத்த காங்கிரஸ்காரர்கள் எல்லாம் ‘காமராஜருக்கு கொள்ளி வைக்க மகன் இல்லை என்ற குறையை கலைஞர் கருணாநிதி தீர்த்து வைத்தார்’ என்று சொன்னார்கள்.

2006ஆம் ஆண்டு தலைவர் கலைஞர் அவர்கள் ஜூலை 15ஆம் நாளை காமராஜர் பிறந்த நாளை கல்வி வளர்ச்சி நாளாக அறிவித்தார். பொதுவாக இது போன்றஅறிவிப்புகள் வந்தால் G.o மட்டும் போட்டு விடுவார்கள்,அதாவது இன்னொரு ஆட்சி வந்தால் அதை கைவிட்டு விடுவார்கள். ஆனால் எந்த ஆட்சி வந்தாலும் காமராஜருடைய பிறந்த நாளை அரசு விழாவாக நடத்த வேண்டும் என்பதற்காக தனி சட்டமே போட்ட தலைவர் தான் கலைஞர்.

ஆக அப்படிப்பட்ட பெருந்தலைவர் காமராஜருடைய பிறந்தநாள் விழாவில் திராவிட முன்னேற்ற கழகத்தின் சார்பில் காமராஜர் சிலைக்கு மாலை அணிவித்து மரியாதை செய்யப்பட்டது.

இவ்வாறு ஆர்.எஸ்.பாரதி பேட்டியளித்தார்.