சென்னை, ஜூலை. 18–
மனித நேய மக்கள் கட்சியின் தலைவர் பேராசிரியர் எம்.எச். ஜவாஹிருல்லா விடுத்துள்ள அறிக்கை வருமாறு:–
புதியதலைமுறை தொலைக்காட்சியின் நெறியாளரும் ஊடகவியலாளருமான விஜயன், விசாரணை என்ற பெயரில் மீண்டும் மீண்டும் காவல் நிலையத்திற்கு அழைக்கப்பட்டு அலைக்கழிக்கப்பட்டதோடு, அவரது செல்போன் பறிமுதல் செய்யப்பட்டிருப்பதாக வெளியாகியுள்ள தகவல்கள் கடும் அதிர்ச்சியையும் கவலையையும் ஏற்படுத்தியுள்ளன.
ஒரு ஜனநாயக நாட்டில் ஊடகவியலாளர்களின் கடமை அதிகாரத்தை கேள்வி கேட்பதும், மக்களுக்குத் தகவல்களை கொண்டு சேர்ப்பதும் ஆகும். ஆனால் அண்மைக்காலமாக விமர்சனக் குரல்களை அடக்குவதற்கும், ஊடகங்களை அச்சுறுத்துவதற்கும் விசாரணை அமைப்புகள் பயன்படுத்தப்படுகின்றன என்ற அச்சம் அதிகரித்து வருகிறது. இந்தச் சூழலில், ஊடகவியலாளர் விஜயன் மீது மேற்கொள்ளப்பட்டுள்ள நடவடிக்கை ஊடக உலகிற்கு விடுக்கப்படும் எச்சரிக்கைச் செய்தியாகவே பார்க்கப்படுகிறது.
சட்டத்தின் பெயரால் நள்ளிரவு நேரங்களில் விசாரணைக்காக அழைப்பது, வீட்டிற்குச் சென்ற பிறகும் மீண்டும் வருமாறு வற்புறுத்துவது, சட்ட நடைமுறைகள் குறித்த வெளிப்படைத்தன்மை இன்றி செல்போனை பறிமுதல் செய்வது போன்றவை ஜனநாயக ஆட்சிக்கு ஏற்ற செயல்கள் அல்ல. இது காவல்துறையின் அதிகார துஷ்பிரயோகமாகவும், கருத்துச்சுதந்திரத்தை ஒடுக்கும் முயற்சியாகவும் விளங்குகின்றது.
தமிழகம்கருத்துச் சுதந்திரத்திற்கும் பத்திரிகைச் சுதந்திரத்திற்கும் பெயர் பெற்றமண்ணாகும். அவசரநிலை காலத்தை நினைவூட்டும் வகையில் ஊடகவியலாளர்கள் மீது அழுத்தம் செலுத்தும் போக்கு தமிழகத்தில் உருவாக அனுமதிக்கக் கூடாது. ஊடகங்களை அச்சுறுத்தி மௌனமாக்கும் முயற்சிகள் எந்த அரசுக்கும் நல்ல பெயரை ஏற்படுத்தாது.
எனவே, ஊடகவியலாளர் விஜயனிடமிருந்து பறிமுதல் செய்யப்பட்டுள்ள செல்போன் உடனடியாக திருப்பி வழங்கப்பட வேண்டும்.மேலும், விசாரணை என்ற பெயரில் ஊடகவியலாளர்களை அச்சுறுத்தும் மற்றும் அலைக்கழிக்கும் நடவடிக்கைகள் உடனடியாக நிறுத்தப்பட வேண்டும்.
கருத்துச் சுதந்திரமும் பத்திரிகைச் சுதந்திரமும் ஜனநாயகத்தின் உயிர்நாடிகள் ஆகும். அவற்றை பாதுகாக்கத்தவறும் எந்த ஆட்சியும் ஜனநாயகத்தின் அடித்தளத்தையே பலவீனப்படுத்தும் என்பதை தவெக அரசு உணர வேண்டும்.
இவ்வாறு அவர் தனது அறிக்கையில் குறிப்
பிட்டுள்ளார்.