#Title

விசாரணைக் கைதியின் உடலை வாங்க மறுத்து 4-ஆவது நாளாகப் போராட்டம்!

நாகர்கோவில்,

ஜூலை 18–

நாகர்கோவில் சிறையில் சக கைதிகள் மற்றும் சிறை காவலர்கள் தாக்கியதில் உயிரிழந்த விசாரணைக் கைதியின் உடலை வாங்க மறுத்து அவரது உறவினர்கள் 4-ஆவது நாளாகப் போராட்டத்தில் ஈடுபட்டனர்.

கன்னியாகுமரி மாவட்டம், வடக்குதாமரைகுளம் அருகேயுள்ள ஈத்தங்காட்டைச் சேர்ந்தவர் சபரிவர்மன் (33). மாற்றுத்திறனாளியான இவர் தனது வீட்டின் அருகிலேயே பெட்டிக்கடை நடத்தி வந்தார். இவரது கடையில் தடை செய்யப்பட்ட புகையிலைப் பொருள்கள்விற்றதற்காக தென்தாமரைகுளம் போலீஸாரால் கடந்த 9-ஆம் தேதி கைது செய்யப்பட்டு நாக ர்கோவில் கிளை சிறையில் அடைக்கப்பட்டிருந்தார்.

இந்த நிலையில், கடந்த 13 ஆம் தேதி அவர் உயிரிழந்துவிட்டதாக, சபரிவர்மனின் குடும்பத்தினருக்கு தகவல் தெரிவிக்கப்பட்டது. சபரிவர்மனை போலீஸார் அடித்து கொலை செய்துவிட்டதாகக் கூறி அவரது குடும்பத்தினர் போராட்டத்தில் ஈடுபட்டனர்.

இதைத்தொடர்ந்துமாவட்டக் காவல் கண்காணிப்பாளர் இரா.ஸ்டாலின் நேரடி விசாரணை மேற்கொண்டார். நாகர்கோவில் குற்றவியல் நீதிமன்ற நீதிபதி சத்தியமூர்த்தியும் விசாரணை நடத்தினார். இதில் சபரிவர்மன் சிறைக்குள் தாக்கப்பட்டதில் உயிரிழந்தது தெரியவந்தது.

சிறைக் காவலர்கள் கைது: மேலும் விசாரணை யில், சபரிவர்மனை சக கைதிகள் மற்றும் சிறை காவலர்கள் சேர்ந்து, அவரது கை, கால்களை கட்டிவைத்து தாக்கியது தெரியவந்தது.

இதுதொடர்பாக நாகர்கோவில் சிறை தலைமை வார்டர் திருமலைநம்பி, வார்டர்கள் சிவகுமார், ஜெகன் ஆகிய 3 பேரை நேசமணிநகர் போலீஸார் கைது செய்தனர். அவர்களிடம் மேற்கொண்ட விசாரணை அடிப்படையில், சக கைதிகள்விஷ்ணு, சாரதி, ஜெகன், சரத், பெருமாள், சேதுராம், அஜித், அரவிந்த் ஆகிய 8 பேர்கைது செய்யப்பட்டனர். அவர்கள் மீது கொலை உள்ளிட்ட 8 பிரிவுகளின் கீழ் வழக்கு பதிவு செய்யப்பட்டுள்ளது.

உடலை வாங்க மறுப்பு: இருப்பினும் முறையாக நிவாரணம், குடும்பத்தி னருக்கு அரசு வேலை அறிவிப்பை அரசு வெளியிட்டால் மட்டுமே சபரிவர்மனின் உடலை பெற்றுக் கொள்வோம் என்று கூறி 4 ஆவது நாளாக அவரது குடும்பத்தினர் வியாழக் கிழமையும் போராட்டத்தை தொடர்ந்தனர்.