#Title

திருவள்ளூர் மாவட்டத்தில் த.வெ.க. ஆட்சியில் தலைவிரித்தாடும் குட்கா – கஞ்சா விற்பனை! சில்லறை வியாபாரிகள் கைது மட்டும் போதுமா? பின்னணியில் உள்ள ‘முக்கியப் புள்ளிகள்’ மீது எப்போது நடவடிக்கை?

திருவள்ளூர், ஜூலை 19–

திருவள்ளூர் மாவட்டத்தில் கஞ்சா, போதை மாத்திரைகள் மற்றும் தடை செய்யப்பட்ட குட்கா புகையிலைப் பொருட்கள் விற்பனை நாளுக்கு நாள் அதிகரித்து வருவது, த.வெ.க. ஆட்சியின் சட்டம்–ஒழுங்கு மற்றும் போதைப்பொருள் தடுப்பு நடவடிக்கைகள் மீது கடும் கேள்விக்குறியை எழுப்பியுள்ளது. காவல்துறையினர் தொடர்ந்து கைது நடவடிக்கைகளில் ஈடுபட்டு வந்தாலும், போதைப்பொருள் விற்பனை எந்தவிதத்திலும் குறையாத நிலை தொடர்வதாக பொதுமக்கள் குற்றம் சாட்டுகின்றனர்.

மாவட்டம் முழுவதும் கஞ்சா, போதை மாத்திரைகள் மற்றும் குட்கா விற்பனை குறித்து தொடர்ந்து புகார்கள் எழுந்ததைத் தொடர்ந்து, காவல்துறையினர் தீவிர வாகன சோதனை மற்றும் கடைகளில் ஆய்வு மேற்கொண்டு வருகின்றனர்.

அதன்படி, திருத்தணி காவல் நிலைய எல்லைக்குட்பட்ட பகுதியில் கஞ்சா மற்றும் போதை மாத்திரைகள் விற்பனை யில் ஈடுபட்டதாக மகேஷ் மற்றும் விக்ரம் ஆகிய இருவரை கைது செய்த போலீசார், அவர்களிடமிருந்து 20 கிராம் கஞ்சா மற்றும் 150 போதை மாத்திரைகளை பறிமுதல் செய்தனர். பின்னர் இருவரையும் நீதிமன்றத்தில் ஆஜர்படுத்தி சிறையில் அடைத்தனர்.

அதேபோல், சிப்காட் பகுதியில் குட்கா விற்பனையில் ஈடுபட்டதாக சிவகுமார், கும்மிடிப் பூண்டி பகுதியில் பிரதீப்குமார், ஆரம்பாக்கம் பகுதியில் சென்னையைச் சேர்ந்த அமீர் அலி, கவரப்பேட்டை பகுதியில் தர்மா ஆகிய நான்கு பேரை கைது செய்த போலீசார், அவர்களிடமிருந்து மொத்தம் 107 கிலோ 200 கிராம் குட்கா புகையிலைப் பொருட்களை பறிமுதல் செய்தனர்.

இதன் மூலம் நேற்று ஒரே நாளில் கஞ்சா விற்பனையில் ஈடுபட்டதாக 2 பேரும், குட்கா விற்பனையில் ஈடுபட்டதாக 4 பேரும் என மொத்தம் 6 பேரை கைது செய்து சிறையில் அடைத்துள்ளனர்.

ஆனால், கைது நடவடிக்கைகள் தொடர்ந்தும் போதைப்பொருள் மற்றும் குட்கா விற்பனை குறைந்ததாக எந்த அறிகுறியும் இல்லாதது பொதுமக்களிடையே கடும் அதிருப்தியை ஏற்படுத்தி யுள்ளது. சில்லறை விற்பனையாளர்கள் கைது செய்யப்படுகின்றனர்; ஆனால் அவர்களுக்கு பொருட்களை சப்ளை செய்யும் மொத்த விற்பனையாளர்கள், கடத்தல் கும்பல்கள் மற்றும் பின்னணியில் செயல்படும் முக்கிய நபர்கள் மீது உறுதியான நடவடிக்கை எடுக்கப்படவில்லை என்ற குற்றச்சாட்டு வலுத்து வருகிறது.

“போதை இல்லா தமிழகம்” என்ற வாக்குறுதிகள் வெறும் முழக்கங் களாகவே மாறிவிட்டதா? என்ற கேள்வியை எதிர்க்கட்சிகள் எழுப்புகின்றன. த.வெ.க. ஆட்சியில் திருவள்ளூர் மாவட்டம் உட்பட பல பகுதிகளில் குட்கா மற்றும் போதைப்பொருள் புழக்கம் அதிகரித்து வருவது அரசின் நிர்வாகத் தோல்வியை வெளிப்படுத்துவதாகவும் அவர்கள் விமர்சிக்கின்றனர்.