சென்னை, ஜூலை 19 –
100 கோடி ரூபாய் மதிப்பிலான பழனி கோயில் நிலம் முறைகேடாக பதிவு செய்யப்பட்ட விவகாரத்தில் சி.பி.சி.ஐ.டி. காவல்துறையினர் விசாரணையை தீவிரப்படுத்தியுள்ளனர்.
திண்டுக்கல் மாவட்டம் பழனி அடிவாரத்தில் கோவிலுக்குச் சொந்தமான 100 கோடி ரூபாய் மதிப்புள்ள நிலத்தை எவருக்கும் விற்பனை செய்யவோ அல்லது வில்லங்கப் படுத்தவோ உரிமை கிடையாது. இத்தகைய கடுமையான சட்டப்பாதுகாப்பு மற்றும் கோயில் நிர்வாகத்தின் தொடர் எழுத்துப்பூர்வ ஆட்சேபனைகளையும் மீறி, கடந்த ஜூலை 6-ஆம் தேதி, தனிநபர்கள் இருவரது பெயரில் 1.40 ஏக்கர் நிலம் பத்திரப்பதிவு செய்யப்பட்டுள்ளது.
த.வெ.க. ஆட்சியில் கோவில் நிலம் மோசடியாக பத்திரப்பதிவு செய்யப்பட்டு தனி நபர்களுக்கு விற்பனை செய்யப்பட்டது அம்பலமாகி பக்தர்கள் மத்தியில் கடும் அதிர்ச்சியை ஏற்படுத்தியது. சார்பதிவாளர் ஜஸ்டின் மணிகண்டன், நிலத்தை கிரையம் செய்து கொடுத்த முருகதாஸ், கிரையம் பெற்ற வெள்ளைத்துரை மற்றும் சேதுபதி ஆகிய 4 பேர் மீது வழக்குப்பதிவு செய்யப்பட்டுள்ளது.
பெரும் பரபரப்பை ஏற்படுத்தியுள்ளஇந்த முறைகேடு தொடர்பாக சி.பி.சி.ஐ.டி.காவல்துறையினர் விசாரணை நடத்தி வருகின்றனர். திண்டுக்கல் சி.பி.சி.ஐ.டி. அலுவலகத்தில் பழனி அறநிலையத்துறை அதிகாரிகள் 5க்கும் மேற்பட்டோரிடம் சி.பி.சி.ஐ.டி. மாவட்ட காவல் கண்காணிப்பாளர் சஜிதா தீவிர
விசாரணை மேற்கொண்டுள்ளனர்.
பழனி அடிவாரம் பூங்கா சாலையில் தண்டபாணி சுவாமிகள் மடம் செயல்பட்டு வந்தது. இந்த மடத்தின் மூலமாக பழனிக்கு வரும் பக்தர்களுக்கு தங்குவதற்கான வசதிகள் செய்து கொடுக்கவும், அன்னதானம் வழங்கவும், இந்து மதத்தை வளர்த்தெடுக்கவும், இந்த இடத்தை பயன்படுத்த வேண்டும் என்பதற்காக தண்டபாணி சுவாமிகள் அறக்கட்டளை நிறுவப்பட்டது. இந்த மடம் பல ஆண்டுகளாக நிர்வாகிகளால் முறையாக பராமரிக்கப்படாமல் இருந்தது.
தண்டபாணி சுவாமிகள் மறைவுக்கு பின்பு அறக்கட்டளையை நிர்வாகம் செய்தவர்கள் இந்த இடம் எதற்காக கொடுக்கப்பட்டதோ அதனை மாற்றி வணிக ரீதியாக பயன்படுத்த முயற்சி செய்தனர். மேலும் பலரும் இந்த இடத்தை ஆக்கிரமித்து கடைகள் அமைத்தனர். இந்த நிலத்தின் தற்போதைய மதிப்பு ரூ.100 கோடி என கோவில் நிர்வாகம் சார்பில் தெரிவிக்கப்பட்டுள்ளது.
இந்த நிலையில் இந்து சமய அற நிலையத்துறை சார்பில் நீதிமன்றத் தில் வழக்கு தொடர்ந்து தண்டபாணி சுவாமிகள் மடத்தை அறநிலையத்துறை கட்டுப்பாட்டின் கீழ் கொண்டு வந்தது. பழனி கோவில் இணை ஆணையராக இருந்த மாரிமுத்துவை தக்காராக நியமித்து மடத்தின் இடத்தை பராமரித்து வந்தனர்.
தற்போது இந்த இடத்தில் பழனி கோவிலுக்கு வரக்கூடிய பக்தர்கள் வாகனங்களை நிறுத்திச் செல்லும் வகையில் கட்டணம் இல்லாத வாகன நிறுத்தம் அமைக்கப்பட்டது. இந்த நிலையில் தண்டபாணி சுவாமிகள் மடத்துக்குச் சொந்தமான இடத்தை மடத்துக்கு சம்பந்தம் இல்லாத விழுப்புரம் மாவட்டத்தைச் சேர்ந்த முருகதாஸ் என்பவர் ரூ.2 கோடிக்கு திருப்பூர் மாவட்டம் உடுமலை வட்டம் பாப்பன்குளத்தைச் சேர்ந்த வெள்ளத்துரை, பழனி டி.கே.என். புதூரைச் சேர்ந்த சேதுபதி ஆகிய இருவருக்கும் கடந்த 6-ஆம் தேதி பழனி சார்பதி வாளர் அலுவலகத்தில் பத்திரப்பதிவு செய்து கொடுத்துள்ளார்.
வழக்கமாக பத்திரப்பதிவு செய்யும் நபரை அன்று விடுப்பில் அனுப்பி விட்டு ஜஸ்டின் மணிகண்டன் மூலம் கடந்த 6-ஆம் தேதி இந்த பத்திரப்பதிவு நடந்துள்ளது. கடந்த மார்ச் மாதம் 27-ஆம் தேதி இந்த பத்திரப்பதிவு செய்ய முயன்றபோது அப்போதைய பதிவாளார் ஒத்துழைப்பு அளிக்காததால் முயற்சியை தற்காலிகமாக கைவிட்டுள்ளனர். இதன் பிறகு தான் கடந்த 3-ஆம் தேதி பத்திரப்பதிவு அலுவலகத்தில் மீண்டும் இடத்தை பதிய அனுமதி கேட்டு 6-ஆம் தேதி பத்திரப்பதிவு செய்திருக்கிறார்கள்.
இதனைத் தொடர்ந்து முறைகேடாக பத்திரப்பதிவு செய்து கொடுத்த சார்பதிவாளார் ஜஸ்டின் மணிகண்டன், அறக்கட்டளை நிர்வாகி முருகதாஸன், இடத்தை வாங்கிய சேதுபதி, வெள்ளத்துரை ஆகிய 4 பேர் மீது மோசடி, சதி செய்தல் உள்பட 5 பிரிவுகளின் கீழ் போலீசார் வழக்கு பதிவு செய்தனர்.
மாவட்டப் பதிவாளர் நீக்கம்!
மாவட்ட பதிவுத்துறை சார்பிலும் இந்த பத்திரப் பதிவு தொடர்பாக விசாரணை நடத்தி பதிவுத்துறை தலைவருக்கு அறிக்கை சமர்ப்பிக்கப்பட்டது. இதனைத் தொடர்ந்து பதிவுத்துறை அதிகாரிகள் இந்த விவகாரத்தில் முதல் கட்டமாக அதிரடி நடவடிக்கையை எடுத்து உள்ளனர். இதன்படி முறைகேடாக பத்திரப்பதிவு செய்த பழனி சார்பதிவாளார் ஜஸ்டின் மணிகண்டன் பணிநீக்கம் செய்யப்பட்டார்.
இந்த நிலையில் பழனி கோவில் பத்திர பதிவு முறைகேடு வழக்கை சி.பி.சி.ஐ.டி.க்கு மாற்றி அரசு உத்தரவிட்டது. இதற்கான உத்தரவை டி.ஜி.பி.மகேஷ்குமார் அகர்வால் பிறப்பித்தார். இதனை தொடர்ந்து சி.பி.சி.ஐ.டி. போலீசார் தங்களது விசாரணையை அதிரடியாக தொடங்கினார்.