#Title

“கடவுளுக்கே பாதுகாப்பு இல்லாத த.வெ.க. ஆட்சி”! திருத்தணி அருகே அம்மன் கழுத்திலிருந்த 10 சவரன் தாலி பட்டப்பகலில் கொள்ளை! சட்டம், ஒழுங்கு சீர்குலைந்துவிட்டதாக பொதுமக்கள் வேதனை!

திருவள்ளூர், ஜூலை 20–

திருவள்ளூர் மாவட்டம் திருத்தணி அருகே உள்ள ஆர்.கே.பேட்டை ஒன்றியத்திற்குட்பட்ட அய்யனேரி கிராமத்தில் அமைந்துள்ள பழமையான திரௌபதி அம்மன் திருக்கோயிலில், அம்மன் சிலையின் கழுத்தில் அணிவிக்கப்பட்டிருந்த சுமார் 10 சவரன் தங்கத் தாலியை மர்ம நபர்கள் பட்டப்பகலில் திருடிச் சென்ற சம்பவம் பக்தர்கள் மற்றும் பொதுமக்கள் மத்தியில் கடும் அதிர்ச்சியையும் பரபரப்பையும் ஏற்படுத்தியுள்ளது.

அய்யனேரி கிராமத்தில் ஆயிரத்திற்கும் மேற்பட்ட குடும்பங்கள் வசித்து வருகின்றன. இக்கிராமத்தின் முக்கிய ஆன்மிகத் தலமாக விளங்கும் திரௌபதி அம்மன் கோயிலில் நாளை நடைபெறவுள்ள தீமிதி திருவிழாவையொட்டி, அம்மன் மற்றும் பரிவார தெய்வங்களின் சிலைகள் பக்தர்கள் தரிசிப்பதற்காக கோயில் வளாகத்தில் அலங்கரித்து வைக்கப்பட்டிருந்தன.

பக்தர்கள் வழிபாடு செய்து சென்ற பின்னர், சிறிது நேரம் கழித்து கோயில் நிர்வாகிகள் வழக்கமான பணிக்காக சன்னதிக்குள் சென்றபோது, அம்மன் கழுத்தில் அணிவிக்கப்பட்டிருந்த 10 சவரன் தங்கத் தாலி காணாமல் போனதை கண்டு அதிர்ச்சியடைந்தனர். உடனடியாக ஆர்.கே.பேட்டை காவல் நிலையத்திற்கு தகவல் தெரிவிக்கப்பட்டது.

தகவலின் பேரில் சம்பவ இடத்திற்கு விரைந்து சென்ற போலீசார், கைரேகை நிபுணர்கள் மற்றும் மோப்பநாய் உதவி யுடன் தீவிர விசாரணை மேற்கொண்டனர். கோயில் வளாகத்தில் இருந்த தடயங்களை சேகரித்து, அருகிலுள்ள பகுதிகளில் உள்ள கண்காணிப்பு கேமராக்களின் பதிவுகளையும் ஆய்வு செய்து வருகின்றனர். தீமிதி திருவிழாவுக்கு முந்தைய நாளே இந்த துணிச்சலான திருட்டு நடந்திருப்பது பக்தர்களிடையே பெரும் அதிர்ச்சியை ஏற்படுத்தியுள்ளது.

இந்தச் சம்பவம் தொடர்பாக வழக்குப்பதிவு செய்துள்ள போலீசார், விசாரணை நடத்தி வருகிறார்கள்

இந்தச் சம்பவத்தை அடுத்து,“த.வெ.க. ஆட்சியில் மக்கள் மட்டுமல்ல, கோயிலில் உள்ள கடவுளுக்குக் கூட பாதுகாப்பு இல்லாத நிலை உருவாகிவிட்டதா?” என்ற கேள்வியை பொதுமக்களும் சமூக ஆர்வலர்களும் எழுப்புவதாக குற்றம்சாட்டுகின்றனர். பக்தர்களின் நம்பிக்கையின் சின்னமாக விளங்கும் ஆலயங்களில்கூட பாதுகாப்பு உறுதி செய்ய முடியாத அளவுக்கு சட்டம்–ஒழுங்கு சீர்குலைந்துள்ளதாகவும், குற்றவாளிகளுக்குஅச்சமே இல்லாத சூழல் நிலவுவதாகவும் அவர்கள் விமர்சிக்கின்றனர்.

மேலும், இந்தக் குற்றத்தில் ஈடுபட்டவர்களை உடனடியாக கைது செய்து, கோயில்களின் பாதுகாப்பை பலப்படுத்த அரசு நடவடிக்கை எடுக்க வேண்டும் என்றும், இல்லையெனில் இதுபோன்ற சம்பவங்கள் மீண்டும் மீண்டும் நடைபெறும் அபாயம் இருப்பதாகவும் வலியுறுத்தியுள்ளனர்.