புதுடெல்லி, ஜூலை 20 –
நாடாளுமன்ற மழைக்கால கூட்டத்தொடர் இன்று தொடங்குவதை முன்னிட்டு புதுடில்லியில் நேற்று (19.7.2026) அனைத்துக் கட்சிக்
கூட்டம் நடைபெற்றது. இக்கூட்டத்தில் திரிணாமுல் காங்கிரஸ் கட்சியைச் சேர்ந்த அதிருப்தி எம்.பி.க்கள் பங்கேற்றதால், இக்கூட்டத்தில் இருந்து தி.மு.க., காங்கிரஸ், சமாஜ்வாதி, திரிணாமுல் காங்கிரஸ் உள்ளிட்ட எதிர்க்கட்சிகள் வெளிநடப்பு செய்தன.
நாடாளுமன்ற மழைக்கால கூட்டத்தொடர் இன்று (20.07.2026) தொடங்கி, ஆகஸ்ட் 13 வரை நடக்கிறது.
இக்கூட்டத்தொடரில், மகளிர் இட ஒதுக்கீடு மசோதா, தொகுதி மறுவரையறை மசோதா, ஒரே நாடு; ஒரே தேர்தல், தேசிய கவுரவ அவமதிப்பு தடுப்பு திருத்த
மசோதாவை நிறைவேற்ற பா.ஜ.,
தலைமையிலான தே.ஜ., கூட்டணி அரசு முடிவு செய்துள்ளது.
இந்நிலையில், நேற்று (19.07.2026) ஒன்றிய அமைச்சர் ராஜ்நாத் சிங் தலைமையில் அனைத்துக் கட்சிக் கூட்டம் நடந்தது. இதில், ஒன்றிய அமைச்சர்கள் அமித் ஷா, கிரண் ரிஜிஜு உள்ளிட்டோர் பங்கேற்றனர்.
டி.ஆர்.பாலு – திருச்சி சிவா பங்கேற்பு!
தி.மு.க. சார்பில் மக்களவை கழகக் குழுத் தலைவர் டி.ஆர்.பாலு, மாநிலங்களவை கழகக் குழுத் தலைவர் திருச்சி சிவா உள்ளிட்ட பல்வேறு கட்சிகளைச் சேர்ந்தவர்கள் பங்கேற்றனர்.
திரிணாமுல் காங்கிரஸ் கட்சியைச் சேர்ந்த அதிருப்தி எம்.பி.க்கள் பங்கேற்றதால், தி.மு.க., காங்கிரஸ், சமாஜ்வாதி உள்ளிட்ட கட்சிகள் கடும் எதிர்ப்பு தெரிவித்தனர்.
எதிர்க்கட்சிகள்
கூண்டோடு வெளிநடப்பு!
பிறகு அனைத்துக் கட்சி கூட்டத்தில் இருந்து தி.மு.க., சமாஜ்வாதி காங்கிரஸ், திரிணாமுல் காங்கிரஸ், ஆம் ஆத்மி, சிவசேனா, சமத்துவ பிரிவு உள்ளிட்ட எதிர்க்கட்சிகள் கூண்டோடு வெளிநடப்பு செய்தன.
கூட்டத்தில் மசோதா மீது எதிர்க்கட்சிகள் ஆக்கபூர்வமான விவாதங்களை முன் வைக்கவும், சுமூக மாக மழைக்கால கூட்டத்தொடரை நடத்த ஒத்துழைப்பு வழங்கவும் ஒன்றிய அரசு தரப்பில் கேட்டுக்கொள்ளப்பட்டது.
இன்று தொடங்கும் நாடாளுமன்றக் கூட்டத்தில் ஒன்றிய அரசால் பிறப்பிக்கப்பட்ட சில அவசர சட்டங்களுக்கு மாற்றான மசோதாக்கள், இந்தக் கூட்டத் தொடரில் அறிமுகப்படுத்தப்பட உள்ளன.
முக்கிய மசோதாக்கள் தாக்கலாக வுள்ள நிலையில், ஒன்றிய அரசுக்கு எதிராக நீட் வினாத்தாள் கசிவு, அயோத்தி ராமா் கோயில் நன்கொடை முறைகேடு, மேற்காசிய தாக்குதல்களில் இந்திய மாலுமிகள் உயிரிழப்பு, விலைவாசி உயா்வு உள்ளிட்ட விவகாரங்களை எழுப்ப எதிா்க்கட்சிகள் முடிவு செய்துள்ளன.