திருவள்ளூர், ஜூலை 21–
தமிழகத்தில் சட்டம்–ஒழுங்கு நிலை தொடர்ந்து சீர்குலைந்து வருவதாக எதிர்க்கட்சிகள் குற்றம் சாட்டி வரும் நிலையில், தற்போது சட்டத்தை நிலைநாட்டச் சென்ற காவல்துறை அதிகாரியே அரிவாளால் வெட்டப்பட்ட சம்பவம் பெரும் அதிர்ச்சியை ஏற்படுத்தியுள்ளது. குற்றவாளிகளை கைது செய்யும் பணியில் ஈடுபட்டிருந்த உதவி ஆய்வாளர் தலையில் பலத்த வெட்டுக்காயம் அடைந்து மருத்துவமனையில் அனுமதிக்கப்பட்ட சம்பவம், காவல் துறையினர் மத்தியிலும் கடும் அதிர்வலைகளை ஏற்படுத்தியுள்ளது.
சென்னை வில்லிவாக்கம் காவல் நிலையத்தின் சரித்திர பதிவேடு குற்றவாளி யான பூபாலன், திரு வள்ளூர் மாவட்டம் அத்திப்பட்டு பகுதியில் பதுங்கியிருப்பதாக சென்னை போதைப்பொருள் தடுப்பு பிரிவு (ANIU) போலீசாருக்கு ரகசிய தகவல் கிடைத்தது. இதையடுத்து செல்போன் சிக்னல் உள்ளிட்ட தொழில்நுட்ப ஆதாரங்களை பயன்படுத்தி அவரை கைது செய்ய தனிப்படை போலீசார் விரைந்தனர்.
போதைப்பொருள் தடுப்பு பிரிவு உதவி ஆய்வாளர் வெங்கடேஷ் மற்றும் மற்றொரு காவலர், பூபாலன் பதுங்கியிருந்ததாகக் கூறப்படும் வீட்டிற்குள் சென்று கைது செய்ய முயன்றனர். அப்போது முன்கூட்டியே திட்ட மிட்டு பதுங்கியிருந்த பூபாலன் மற்றும் அவரது கூட்டாளிகள், திடீரென அரிவாள்களுடன் போலீசாரை நோக்கி தாக்குதல் நடத்தினர்.
இந்த கொடூர தாக்குதலில் உதவி ஆய்வாளர் வெங்கடேஷின் தலையில் பலத்த வெட்டுக்காயம் ஏற்பட்டது. ரத்த வெள்ளத்தில் சரிந்த அவரை உடனடியாக சக போலீசார் மீட்டு மீஞ்சூரில் உள்ள தனியார் மருத்துவமனைக்கு கொண்டு சென்று சிகிச்சைக்காக அனுமதித்தனர். தாக்குதல் நடத்திய கும்பல் சம்பவ இடத்திலிருந்து கணநேரத்தில் தப்பிச் சென்றது.
இந்த சம்பவம் குறித்து தகவல் கிடைத்தவுடன் செங்குன்றம் துணை ஆணையர் மகேஸ்வரி தலைமையில் மூத்த காவல்துறை அதிகாரிகள் சம்பவ இடத்துக்கு விரைந்து சென்று ஆய்வு மேற்கொண்டனர். அப்பகுதியில் பொருத்தப்பட்டிருந்த கண்காணிப்பு கேமராக்களின் காட்சிகள் சேகரிக்கப்பட்டு ஆய்வு செய்யப்பட்டு வருகின்றன.
முதற்கட்ட விசாரணை யில், சரித்திர பதிவேடு குற்றவாளியான பூபாலன் அண்மையில் அத்திப்பட்டு பகுதியில் வாடகை வீடு எடுத்து பதுங்கியிருந்தது தெரியவந்துள்ளது. அவர் மற்றும் அவரது கூட்டாளிகள் எந்த வழியாக தப்பிச் சென்றனர் என்பது குறித்து போலீசார் தீவிர விசாரணை நடத்தி வருகின்றனர்.
சிகிச்சை பெற்று திரும்பிய உதவி ஆய்வாளர் வெங்கடேஷ், மீஞ்சூர் காவல் நிலையத்தில் அளித்த புகாரின் பேரில், கொலை முயற்சி, அரசு ஊழியரை பணி செய்ய விடாமல் தாக்குதல், ஆபத்தான ஆயுதங்களால் கொடுங்காயம் ஏற்படுத்துதல் உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டுள்ளது. பல்வேறு தனிப்படைகள் அமைக்கப்பட்டு குற்ற வாளிகளை கைது செய்ய தீவிர தேடுதல் வேட்டை நடைபெற்று வருகிறது.
சட்டத்தை காக்கும் காவல்துறையினரே குற்றவாளிகளின் அரிவாளுக்கு இலக்காகும் நிலை ஏற்பட்டிருப்பது, மாநிலத்தின் சட்டம்–ஒழுங்கு குறித்து கடும் கேள்விகளை எழுப்பியுள்ளது. காவல்துறையினர் உயிரைப் பணயம் வைத்து குற்றவாளிகளை பிடிக்கச் செல்லும் சூழலில் கூட அவர்களுக்கு போதிய பாதுகாப்பு இல்லையா என்ற கேள்வி பொதுமக்கள் மத்தியிலும் எழுந்துள்ளது.
“சட்டத்தை அமல்படுத்தும் காவல்துறையினருக்கே பாதுகாப்பு அளிக்க முடியாத நிலை ஏற்பட்டிருந்தால், சாதாரண பொதுமக்களின் பாதுகாப்பு எந்த நிலையில் இருக்கும் என்ற கேள்வி தவிர்க்க முடியாததாகிறது. சரித்திர பதிவேடு குற்றவாளிகள் போலீசாரையே அரிவாளால் தாக்கிவிட்டு தப்பிச் செல்லும் அளவுக்கு துணிச்சல் பெற்றிருப்பது, மாநிலத்தில் சட்டம்–ஒழுங்கு சீர்குலைந் துள்ளதாக பொது மக்கள் சமூக ஆர்வலர்கள் குற்றம்சாட்டுகின்றன.
குற்றவாளிகளுக்கு அச்சமில்லாத சூழல் உருவாகியுள்ளது என்றும், சட்டத்தின் மீதான மரியாதையை மீட்டெடுக்க அரசு உடனடியாக உறுதியான நடவடிக்கை எடுக்க வேண்டும் என்றும் அவர்கள் வலியுறுத்துகின்றனர்.