#Title

மக்கள் நலத்திட்டங்கள் – துறைகளின் முன்னேற்றத்திற்கு தமிழ்நாட்டிற்குரிய நிதிப்பங்கை ஒன்றிய அரசு உறுதி செய்ய வேண்டும்! மக்களவையில் ஈரோடு கே.இ.பிரகாஷ் வலியுறுத்தல்!

புதுடெல்லி, ஜூலை 21–

தமிழ்நாட்டுக்கு நிதி வழங்குவது குறித்த கேள்விக்கு ஒன்றிய அரசிடமிருந்து உரிய பதில் வரவில்லை எனவும், உறுதியான நிலைபாட்டை ஒன்றிய அரசு எடுக்க வேண்டும் எனவும் நாடாளுமன்ற மக்களவையில் ஈரோடு கே.இ.பிரகாஷ் வலியுறுத்தியுள்ளார்.

அவர் கூறியதாவது :–

தமிழ்நாட்டின் நியாயமான நிதிப் பங்கு குறித்த அடிப்படை கேள்விக்கு ஒன்றிய அரசு பதிலளிக்கத் தவறியுள்ளது. நாட்டின் மொத்த உள்நாட்டு உற்பத்தி மற்றும் நேரடி வரி வசூலில் முன்னணி பங்களிப்பு வழங்கும் மாநிலமாக தமிழ்நாடு விளங்கியபோதும், அதற்கேற்ப நியாயமான நிதிப் பங்கு வழங்கப்படுகிறதா என்ற கேள்விக்கு நேரடியாக பதிலளிக்காமல், வரி பகிர்வில் 4.079 சதவீதத்திலிருந்து 4.097 சதவீதமாக ஏற்பட்டுள்ள மிகக் குறுகிய உயர்வை மட்டும் சுட்டிக்காட்டியுள்ளது. இது நிதி சமநீதி தொடர்பாக எழுப்பப்பட்டுள்ள அடிப்படையான கேள்விக்கான பதிலாக அமையவில்லை. அதேவேளையில், தமிழ்நாட்டின் உரிமையான நிதிப் பங்கை உறுதி செய்ய தற்போதைய மாநில அரசு ஒன்றிய அரசிடம் மேற்கொண்டுள்ள முயற்சிகள் குறித்து வெளிப்படையாக விளக்க வேண்டும்.

ஒன்றிய அரசிடம் தெளிவான பதில் இல்லை!

நிலுவை நிதிகள் தொடர்பாக ஒன்றிய அரசின் பதில் முழுமையானதாக இல்லை. மத்திய ஆதரவு திட்டங்கள் (CSS), மானிய உதவிகள், பேரிடர் நிவாரண நிதி உள்ளிட்ட பிரிவுகளில் தமிழ்நாட்டிற்கு வழங்கப்பட வேண்டிய நிலுவை நிதிகள் குறித்து பிரிவு வாரியாகவும், ஆண்டு வாரியாகவும் விவரங்கள் கேட்கப்பட்டிருந்தன.

ஆனால், அவற்றை வழங்குவதற்குப் பதிலாக நிதி வழங்கும் நடைமுறைகள் மட்டுமே விளக்கப்பட்டுள்ளன. தமிழ்நாட்டிற்கு தற்போது ஏதேனும் நிதிகள் நிலுவையில் உள்ளனவா என்பது குறித்த தெளிவான தகவல் வழங்கப்படவில்லை. இதனிடையே, ஒன்றிய அரசிடமிருந்து பெற வேண்டிய நிலுவை நிதிகளின் முழுமையான பட்டியலையும், அவற்றை விரைந்து பெற்றிட மேற்கொள்ளப்பட்ட நடவடிக்கைகளையும் மாநில அரசு பொதுமக்கள் முன் வெளியிட வேண்டும்.

மக்கள் தொகை அடிப்படையில் வரி பகிர்வுக்கும் பதிலில்லை!

நிதி ஆணையத்தின் வரி பகிர்வு அளவுகோல்கள் குறித்த தமிழ்நாட்டின் கவலைக்கு ஒன்றிய அரசு பதிலளிக்கவில்லை. மக்கள்தொகை கட்டுப்பாட்டில் வெற்றி பெற்று, பொருளாதார வளர்ச்சியில் முன்னணியில் உள்ள தமிழ்நாடு போன்ற மாநிலங்களுக்கு தற்போதைய மக்கள்தொகை அடிப்படையிலான வரி பகிர்வு அளவுகோல்கள் பாதிப்பை ஏற்படுத்துகின்றனவா? என்ற கேள்விக்கு நேரடியாக பதிலளிக்காமல், தென் மாநிலங்களின் மொத்த பங்கு உயர்ந்துள்ளது என்ற பொதுவான தகவலை மட்டுமே ஒன்றிய அரசு தெரிவித்துள்ளது.

இதுகுறித்து தமிழ்நாட்டின் நிலைப்பாட்டை நிதி ஆணையத்திடமும் ஒன்றிய அரசிடமும் மாநில அரசு அதிகாரப்பூர்வமாக வலியுறுத்தியுள்ளதா? என்பதையும் தெளிவுபடுத்த வேண்டும்.

வரி பகிர்வு முறையை மறுஆய்வு செய்வதில் ஒன்றிய அரசு எந்த உறுதியையும் வழங்கவில்லை. தற்போதைய வரி பகிர்வு முறை மற்றும் ஒன்றிய பட்ஜெட் நிதி ஒதுக்கீட்டு அளவுகோல்களை மறுபரிசீலனை செய்வதற்கான எந்தத் தெளிவான உறுதியும் பதிலில் இடம்பெறவில்லை. “காலந்தோறும் ஆய்வு மேற்கொள்ளப்படுகிறது” என்ற பொதுவான விளக்கம் மட்டுமே அளிக்கப்பட்டுள்ளது.

உறுதியான நிலைப்பாடு!

தமிழ்நாடு மற்றும் பிற தென் மாநிலங்கள் தொடர்ந்து முன்வைத்து வரும் நியாயமான கோரிக்கைகளுக்கு ஒன்றிய அரசு உறுதியான நிலைப்பாட்டை வெளிப்படுத்த வேண்டியது அவசியமாகும்.

ஈரோடு போன்ற மாவட்டங்களின் வளர்ச்சிக்கு நியாயமான நிதி ஒதுக்கீடு இன்றியமையாதது. இது வெறும் நிதி ஒதுக்கீடு குறித்த விவாதம் அல்ல; மாவட்ட வளர்ச்சியுடன் நேரடியாக தொடர்புடைய முக்கியமான பிரச்சினையாகும்.

உள்கட்டமைப்பு மேம்பாடு, பாசன வசதிகள், வேளாண்மை, குறு, சிறு மற்றும் நடுத்தர தொழில்கள் (MSME), மக்கள் நலத் திட்டங்கள் உள்ளிட்ட துறைகளின் முன்னேற்றத்திற்கு ஒன்றிய அரசின் போதுமான மற்றும் காலமுறை நிதி ஒதுக்கீடு அவசியம்.

ஈரோடு போன்ற மாவட்ட வளர்ச்சிக்கு நிதி தேவை!

கூட்டாட்சி தத்துவத்திற்கு ஏற்ப தமிழ்நாட்டிற்கு உரிய நிதிப் பங்கை ஒன்றிய அரசு உறுதி செய்ய வேண்டும். அதேநேரத்தில், ஒன்றிய அரசிடமிருந்து பெறப்படும் நிதி முழுமையாகப் பயன்படுத்தப்பட்டு, ஈரோடு உள்ளிட்ட மாவட்டங்களின் வளர்ச்சியில் கண்கூடும் பலன்களை உருவாக்க மாநில அரசும் தேவையான நடவடிக்கைகளை மேற்கொள்ள வேண்டும்.

இவ்வாறு ஈரோடு கே.இ.பிரகாஷ் மக்களவையில் வலியுறுத்தியுள்ளார்.