சமீபத்தில் ஒரு தொலைக்காட்சி வெளியிட்ட ‘நியூஸ் கார்ட்’ முக்கியமான ஒரு நிகழ்வை உலகிற்குச் சொன்னது. ‘‘சென்னை தலைமைச் செயலகத்தில் நடந்த அமைச்சரவைக்கூட்டத்தில் பங்கேற்க முதலமைச்சர் விஜய் ‘எண்ட்ரி’ ஆனதும் எழுந்து நின்று அவருக்கு வணக்கம் தெரிவித்த அமைச்சர்கள். பதிலுக்கு வணக்கம் தெரிவித்த cm விஜய்’’
எப்பேர்பட்ட வரலாற்றுச் சிறப்பு மிக்க சம்பவம். இதற்கு முன் உலகத்தில் இதுபோல நடந்ததே இல்லை. அவர்கள் இதோடு நிற்கவில்லை. முதலமைச்சர் ஆதிதிராவிடர் மாணவர் விடுதிக்கு ஆய்வுக்கு போனால் ‘அவர் உட்கார்ந்தார், எழுந்தார், திரும்பிப் பார்த்தார்’ என சுமார் 20 நியூஸ் கார்டுகள். த.வெ.க.வின்
விர்ஷுவல் வாரியர்ஸ் செய்து வந்த பணிகளை இன்றைக்கு ஊடகங்கள் எடுத்துக்கொண்டன.
ஆதி திராவிடர் மாணவர் விடுதியை இதற்கு முன் எந்த முதலமைச்சரும் பார்வையிட்டதில்லை என த.வெ.க. அமைச்சரவையிலிருக்கும் ஒரு வி.சி.க. அமைச்சர் உருட்டுகிறார். உடனே முன்னாள் முதலமைச்சர் மு.க.ஸ்டாலின் அவர்கள் இதுபோல ஆதிதிராவிடர் மாணவர் விடுதிகளை பார்வையிட்ட காணொளிகள் வெளியிடப்பட்டு பதிலடி தரப்பட்டது. வதந்தி பரப்புவதில் போட்டியே இப்போது த.வெ.க. விர்ஷுவல் வாரியர்ஸ்க்கும் த.வெ.க. அமைச்சர்களுக்கும்தான்.
அமைச்சரவைக் கூட்டத்தில் ‘‘எந்த அமைச்சர் ஊழல் குற்றச்சாட்டிற்கு ஆளானாலும் உடனே பதவி நீக்கம் செய்யபடுவார்கள் என முதலமைச்சர் எச்சரித்ததாக ‘தகவல்’ என ஒரு செய்தி அனைத்து
ஊடகங்களிலும் தலைப்புச் செய்தியானது. இப்படி ஒரு தகவலைச்சொன்னது யார்? அந்த செய்தியின் ‘சோர்ஸ்’ என்ன?
யாருக்கும் தெரியாது. அரசின் சார்பில் எந்த செய்திக் குறிப்பும் கிடையாது. வெறும் ‘தகவல்’. அதாவது இவர்கள்
பரப்பும் வதந்திக்கு வைத்திருக்கும் நாகரீகமான பெயர் ‘தகவல்’. த.வெ.க.வின் வதந்தி தொழிற்சாலையிலிருந்து வதந்திகள் தினமும் வண்டி வண்டியாக இறக்கப்படுகின்றன. இந்த அரசின் தோல்விகளையும் ஊழல்களையும் அராஜகங்களையும் மறைக்க, திசை திருப்ப விஜய் மீதான கதாநாயக போலி பிம்ப வழிபாடும் பொய்த் தகவல்களும் இடையறாது
உற்பத்தி செய்யப்படுகின்றன.
பழனியாண்டவர் கோயில் 100 கோடி ரூபாய் மதிப்புள்ள நிலத்தை 2 கோடி ரூபாய்க்கு விற்க முயன்ற மாபெரும் ஊழல் விவகாரத்தில் வசமாக சிக்கிகொண்ட த.வெ.க. அரசு அதை ஊடக கவனத்திலிருந்து திசை திருப்ப பல்வேறு உருட்டுகளில் ஈடுபட்டிருக்கிறது. கோயில் நிலத்தை யாரும் விற்க முடியாது என பத்திரப் பதிவுத்துறையின் கடை நிலை ஊழியர்களுக்குக்கூட நன்கு தெரியும். மாபெரும் மோசடியின் இந்தக் கூட்டு சதியின் பழியை சார்பதிவாளர் மேல் போட்டுவிட்டு தப்பி ஓட முயல்கிறார்கள்.
சார் பதிவாளர் நீதி மன்றத்தில் ‘‘இது தொடர்பான எண்பது சதவிகித பணிகள் ஏற்கனவே முடித்து வைக்கப்பட்டிருந்தன. கையெழுத்துப் போட்டது மட்டும்தான் எனது வேலை’’ என நீதிமன்றத்தில் வாக்குமூலம் கொடுத்திருக்கிறார். தூய சக்தி ஆட்சிக்கு வந்த நாளிலிருந்தே இந்த தீய வேலை தொடங்கிவிட்டது என்பது தெள்ளத்தெளிவாகத் தெரிகிறது.
இதிலிருந்து கவனத்தை திருப்பவே இத்தனைபித்தலாட்டங்கள். விவாதத்தில் தந்தி டிவி நெறியாளர் ஹரிஹரன் ‘‘இதுஅரசின் கையாலாகாததனம் (inefficiency)இல்லையா?’’ எனக் கேட்டால் உடனே அவரை ‘அந்த வார்த்தையை வாபஸ் வாங்குங்கள்’ என மிரட்டுகிறார்
த.வெ.க. பேச்சாளர்.
இன்னொரு புறம் தி.மு.க. மீதான போலி குதிரைபேர குற்றச்சாட்டில் புதிய தலைமுறை நெறியாளர் விஜயன் இணைக்கப்பட்டு காவல்துறையால் உளவியல் துன்புறுத்தலுக்கு ஆளாக்கப் படுகிறார். ஒரு பொய்க்குற்றசாட்டை நிரூபிக்க முடியாமல் யார் மேலேயோ நடவடிக்கை எடுப்பது போல காவல்துறை ’பாவ்லா’ காட்டி இந்தச் செய்தியை
உயிரோடு வைத்திருக்க முயற்சிக்கிறது. மேலும் இவர்கள் செயல்பாடுகளை விமர்சன ரீதியாக அணுகும் அல்லது இவர்களை கேள்வி கேட்கும் ஊடகவியலாளர்களை அச்சுறுத்தலுக்கு ஆளாக்க வேண்டும் என்பதுதான் அவர்கள் நோக்கம். இதில் பா.ஜ.க.வையும் இவர்கள் விஞ்சி விட்டார்கள்.
த.வெ,க. அரசின் கையாலாகாத தனங்கள் ஒன்றாஇரண்டா? சட்டம் ஒழுங்கு சீர் குலைவும் சொந்த அமைச்சர்களைகூட கட்டுப்படுத்த முடியாத தலைமை, மாநிலத்திற்கு பெரும் நிதிச்சுமையை ஏற்படுத்தும் ‘விபி ஜி ராம் ஜி’ திட்டத்திற்கு ஒன்றிய அரசிடம் ஒப்புதல் அளித்தது, வந்தே மாதரம் விவகாரத்தில் ஆளுநருக்கு அடிபணிந்ததுடன் ஆளுநர் போட்டி அரசாங்கம் நடத்த அனுமதிப்பது, விவசாயிகள் கடன் தள்ளுபடியில் செய்த ஏமாற்று வேலை, தேர்தல் அறிக்கையில் கொடுத்த எந்த வாக்குறுதியையும்
இன்னும் நிறைவேற்ற முயற்சிக்காதது, காவிரி நீர் பங்கீடு, மேகதாட்டு அணை விவகாரங்களில் எந்த அழுத்தத்தையும் தராதது, இஸ்லாமியர்களுக்கான உள் இட ஒதுக்கீடு குறித்து முதலமைச்சரின் மெளனம் என கையாலாகாத தனத்திற்கு உதாரணங்கள் ஒன்றா இரண்டா?
தி.மு.க.விற்கு ஆலோசனை கூறும்
திடீர் ஆலோசகர்கள்!
விஜய்க்கு நாளெல்லாம் வெண்சாமரம் வீசுவது ஒரு புறம் என்றால்
தி.மு.க.விற்கு எதிரான பொய்களைப் பரப்புவதில் த.வெ.க. கூட்டணி கட்சி களும் ஊடகங்களும் மும்முரமாக ஈடுபட்டிருக்கின்றன. ஒரு தேர்தல் தோல்வி வந்ததும் பதவிக்கும் பரிசுக்கும் ஆசைப்பட்டு ஓடிபோன ஓடுகாலிகள் எந்தக்
கூச்சமும் இல்லாமல் தி.மு.க இந்தியா கூட்டணியில் நீடிக்க வேண்டும் என்றும் முக்கிய பிரச்சினையில் என்ன நிலைப்பாடு எடுக்கவேண்டும் என்றும் ஆலோசனை கூறி வருகின்றனர். இவர்களிடம் ஆலோசனை கேட்கவேண்டிய இடத்தில் தி.மு.கவும் இல்லை, தி.மு.க.விற்கு ஆலோசனை வழங்கும் தகுதி இவர்களுக்கும் இல்லை.
மாநில உரிமைசார்ந்து எந்தப் பிரச்சினைகளுக்காக தி.மு.க. இடையறாது போராடி வந்திருக்கிறதோ அவற்றை ஒருபோதும் விட்டுக் கொடுக்காது என்பதை தி.மு.க தலைவர் அழுத்தம் திருத்தமாக கூறியிருக்கிறார்.காங்கிரஸின் சந்தர்ப்பவாத துரோக நிலைப்பாடுகளை எதிர்த்தே தி.மு.க. இந்தியா கூட்டணியிலிருந்து வெளியேறியது. ஆனால் இந்தியா கூட்டணிக் கட்சிகள் வாக்காளர் சிறப்பு தீவிர திருத்தம் குறித்து உச்சநீதிமன்ற நீதிபதிக்கு எழுதிய கடிதத்தில் கையெழுத்திட தி.மு.க. தயங்கவில்லை. பாராளுமன்ற கூட்டத் தொடர் தொடர்பான அலுவல் கூட்டத்தில் திரிணாமுல் காங்கிரஸி லிருந்து வெளியேறிய அதிருப்தி
எம்.பி.க்களை பங்கேற்க அனுமதித்ததை எதிர்த்து பிற இந்தியா கூட்டணி கட்சிகளோடு இணைந்து வெளியேறவும் தி.மு.க. தயங்கவில்லை.
தி.மு.க. எதை ஆதரிக்கவேண்டும் எதை எதிர்க்கவேண்டும் என்பது கொள்கை சார்ந்த பிரச்சினைகளுக்காக எத்தனையோ தியாகங்களைச் செய்த தி.மு.க.விற்கு தெரியும். ஒட்டுண்ணிகள் அதைப்பற்றி கவலைப்படவேண்டியதில்லை.
ஆனால் தி.மு.க, பா.ஜ.க.வோடு கூட்டணி வைக்கப்போகிறது என்ற வதந்தியை ஊடகங்களோடு சேர்ந்து த.வெ.க கூட்டணிக் கட்சிகள் பரப்பி வருகின்றன. இதை யார் சொல்கிறார்கள் என்றால் நேற்றுவரை தி.மு.க. கூட்டணியிலிருந்து விஜய்யை எதிர்த்துவிட்டு பா.ஜ.க.வின் கொள்கைகள் அனைத்தையும் சிரமேற்கொண்டு செயல்படுத்து வரும்
த.வெ.க.வோடு சேர்ந்து ஆட்சியமைத்துக்கொண்டிருக்கும் சந்தர்ப்பவாத
தலைவர்கள்.
தொகுதி மறுவரையறை மசோதாவை பா.ஜ.க. மீண்டும் கொண்டுவருகிறது, தி.மு.க. அது நிறைவேற உதவும் என்ற பொய்யை மீண்டும் மீண்டும் சொல்லி வருகிறார்கள். தி.மு.க. அளித்துள்ள திருத்தங்களைஒன்றிய அரசு ஏற்றால் மட்டுமே அதன் அடிப்படையில் முடிவெடுக்கப்படும் என்று ஏற்கனவே தி.மு.க. தரப்பில் தெளிவாக கூறப்பட்டும் இந்தப் பொய் திரும்பத்திரும்ப சொல்லப்படுகிறது. இத்தனைக்கும் தொகுதி மறுவரையறை மசோதா நடப்பு பாராளு
மன்றக் கூட்டத்தொடரில் பட்டியலிடப்படக்
கூட இல்லை.
அப்படியெனில் இந்த கருத்தியல் உருவாக்கம் எங்கிருந்து வருகிறது? தி.மு.க. மேல் தொடர்ந்து தாக்குதல் நடத்தி
பலவீனப்படுத்தவேண்டும் என்ற தொடர் சதித்திட்டத்தின் ஒரு பகுதிதான் இது.
கட்சியின் நலனுக்காகவும் தமிழ்நாட்டின் நலனுக்காகவும்எந்த முடிவையும் எடுக்கும் அரசியல் பார்வையும் கொள்கைத் தெளிவும் தி.மு.க.வுக்கு உண்டு.ஓடுகாலிகள் புதிய ‘சோஃபா’களில் படுத்து நிம்மதியாக உறங்குங்கள்.