#Title

மேகதாது பிரச்சினை : நாடாளுமன்ற இரு அவைகளும் அடுத்தடுத்து ஒத்திவைப்பு! கழக எம்.பி.க்கள் பச்சை துண்டுடன் பங்கேற்று முழக்கம்!

புதுடெல்லி, ஜூலை 22–

மேகதாது பிரச்சனை குறித்து விவாதிக்கக் கோரி தி.மு.க. உள்ளிட்ட எதிர்க்கட்சிகள் தொடர்ந்து வலியுறுத்தியதால், மழைக்காலக் கூட்டத்தொடரின் முதல் நாளிலேயே நாடாளுமன்ற இருஅவைகளும் முடங்கின.

நாடாளுமன்ற மழைக்கால கூட்டத்தொடர் நேற்று முன்தினம்தொடங்கியது. தி.மு.க. உறுப்பினர்கள், பச்சை துண்டுடன் நாடாளுமன்ற கூட்டத்தில் பங்கேற்றுள்ளனர். மக்களவை இன்று தொடங்கி யதும், தமிழக விவசாயிகளின் வாழ்வாதாரத்தைப் பாதிக்கும் மேகதாது விவகாரம் குறித்து, அவை நடவடிக்கைகளை ஒத்திவைத்துவிட்டு, விவாதம் நடத்த வேண்டும் என மக்களவை தி.மு.க. குழு தலைவர் டி.ஆர். பாலு வலியுறுத்தினார்.

நீட் முறைகேடு, அயோத்தி ராமர் கோயில் நன்கொடை முறைகேடு உள்ளிட்டவை குறித்து விவாதம் நடத்த சமாஜ்வாதி உள்ளிட்ட கட்சிகளும்வலியுறுத்தின. ஆனால், சபாநாயகர் ஓம்பிர்லா இக்கோரிக்கைகளை ஏற்க மறுத்துவிட்டார்.

இதனைத் தொடர்ந்து, மேகதாது விவகாரத்தில்தமிழ்நாட்டு விவசாயிகளின் உரிமைகளை நிலைநாட்டிடநடுவர் மன்றம் அமைத்திட வேண்டும், தமிழ்நாட்டிற்குரிய காவிரி நீரை எவ்வித தாமதமும் இன்றி கர்நாடக அரசு திறந்து விடுவதை ஒன்றிய அரசு உறுதி செய்திட வேண்டும் என தி.மு.க. எம்.பி.க்கள் முழக்கங்களை எழுப்பினர். இதனைத் தொடர்ந்து மக்களவையை நண்பல் 12 மணிவரை ஒத்திவைப்பதாக சபாநாயகர் அறிவித்தார். 12 மணிக்கு அவை கூடியதும் குழப்பம் நீடித்ததால், நண்பல் 12.30 வரை மக்களவை மீண்டும் ஒத்திவைக்கப்பட்டது. மக்களவை 12.30 மணிக்கு தொடங்கிய போது திமுக உள்ளிட்ட கட்சிகள் மீண்டும் அவையின் மையப்பகுதிக்கு சென்று மேகதாது உள்ளிட்ட பிரச்சனைகளை விவாதிக்க வலியுறுத்தி முழக்கமிட்டனர். இதனால் மக்களவை 1 மணி வரையும், பின்னர் 2 மணி வரையும் அடுத்தடுத்து ஒத்திவைக்கப்பட்டது.

மாநிலங்களவை

மாநிலங்களவையிலும் மேகதாது பிரச்சனை குறித்து விவாதிக்கக் கோரி தி.மு.க. குழு தலைவர் திருச்சி சிவா வலியுறுத்தினார். நீட் தேர்வு முறைகேடுகள் மற்றும் குளறுபடிகள் குறித்தும், அயோத்தி ராமர் கோயில் நன்கொடை முறைகேடு புகார்தொடர்பாகவும் விவாதம் நடத்த வேண்டும் என சமாஜ்வாதி, இந்திய கம்யூனிஸ்ட் உள்ளிட்ட எதிர்க்கட்சி எம்.பி.க்கள் வலியுறுத்தினர். ஆனால், இதனை ஏற்க அவைத் தலைவர் மறுத்துவிட்டார். இதனால், அவையில் தொடர்ந்து அமைதியற்ற சூழல் நிலவியது. இதனைத் தொடர்ந்து மாநிலங்களவை நண்பல் 12 மணி வரை ஒத்திவைக்கப்பட்டது. பின்னர் அவை கூடியதும் பிற்பகல் 2 மணிவரை அடுத்தடுத்து 3 முறை ஒத்திவைக்கப்பட்டது.