புதுடெல்லி, ஜூலை 22-–
அரக்கோணம் நாடாளுமன்ற கழக உறுப்பினர், எஸ்.ஜெகத்ரட்சகன் மக்களவையில், தேசிய கல்விக் கொள்கை–2020–ன் நோக்கங்களுக்கு ஏற்ப நாட்டில் உயர்கல்வி சூழல் விரிவாக்கம், குறிப்பாக தமிழ்நாட்டில் உயர்கல்வி மாணவர் சேர்க்கை, கல்வி அணுகல், உயர்கல்வி வாய்ப்புகள், பல்கலைக்கழகங்கள் மற்றும் கல்லூரிகளின் பரவல், கல்வி வசதி குறைவாக உள்ள பகுதிகளில் உயர்கல்வி உள்கட்டமைப்பு மேம்பாடு மற்றும் நாட்டின் அனைத்துப் பகுதிகளிலும் சமமான உயர்கல்வி வாய்ப்புகளை உறுதி செய்வதற்காக மேற்கொள்ளப்பட்டுள்ள நடவடிக்கைகள் குறித்து ஒன்றிய அரசின் கல்வித் துறையின் இணை அமைச்சர் டாக்டர் சுகாந்த மஜும்தார் அவர்களிடம் விரிவான கேள்வி எழுப்பினார்.
இக்கேள்விக்கு ஒன்றிய அரசின் கல்வித் துறையின் இணை அமைச்சர்டாக்டர் சுகாந்த மஜும்தார் அளித்த பதில் வருமாறு:–
கல்வி அரசியலமைப்பின் பொதுப்பட்டியலில் இடம்பெற்றுள்ளதால், உயர்கல்வி நிறுவனங்களின் பெரும்பாலானவை மாநிலங்களின் நிர்வாக வரம்பிற்குள் செயல்பட்டு வருவதாகவும், மத்திய மற்றும் மாநில அரசுகள் இணைந்து கல்வி வசதி குறைவாக உள்ள பகுதிகள் மற்றும் சமூக ரீதியாக பின்தங்கிய மக்களுக்கு உயர்கல்வி வாய்ப்புகளை விரிவுபடுத்தி வருவதாகவும் அமைச்சர் தெரிவித்தார்.
அகில இந்திய உயர்கல்வி ஆய்வின் தரவுகளின்படி, நாட்டில் உயர்கல்வி மாணவர் சேர்க்கை 2014–15 ஆம் ஆண்டில் 3.42 கோடியாக இருந்தது 2023–24 ஆம் ஆண்டில் 4.50 கோடியாக உயர்ந்துள்ளதாகவும், இது 31.5 சதவீத உயர்வாகும் என்றும், 2014–15 ஆம் ஆண்டில் 23.7ஆக இருந்த மொத்த மாணவர் சேர்க்கை விகிதம் 2023–24 ஆம் ஆண்டில் 30 ஆக உயர்ந்துள்ளதாகவும் தெரிவித்தார்.
தமிழ்நாட்டில், உயர்கல்வி மாணவர் சேர்க்கை 2014–15ஆம் ஆண்டில் 33.53 லட்சமாக இருந்தது 2023–24 ஆம் ஆண்டில் 35.77 லட்சமாக உயர்ந்துள்ளதாகவும், 2014–15 ஆம் ஆண்டில் 44.6 ஆக இருந்த மொத்த மாணவர் சேர்க்கை விகிதம் 2023–24 ஆம் ஆண்டில் 52.3 ஆக உயர்ந்துள்ளதாகவும் அமைச்சர் தெரிவித்தார்.
மேலும், கல்வி வசதி குறைவாக உள்ள பகுதிகளில் உயர்கல்வி அணுகலை மேம்படுத்தும் நோக்கில் செயல்படுத்தப்பட்டு வந்த ராஷ்ட்ரிய உச்சதர் சிக்ஷா அபியான் திட்டத்தின் மூன்றாம் கட்டம், 2023 ஜூன் மாதத்தில் பிரதம மந்திரி உச்சதர் சிக்ஷா அபியான் திட்டமாக தொடங்கப்பட்டதாகவும், 2023–24 முதல் 2025–26 வரையிலான காலத்திற்கு ரூ.12,926.10 கோடி ஒதுக்கீடு செய்யப்பட்டுள்ளதாகவும், இதன் கீழ் 613 திட்டங்களுக்கு ரூ.8,168.51 கோடி ஒப்புதல் வழங்கப்பட்டுள்ளதாகவும் அமைச்சர் தெரிவித்தார்.
மேலும், புதிய இந்திய தொழில்நுட்பக் கழகங்களின் கல்வி மற்றும் உள்கட்டமைப்பு விரிவாக்கம், ஐந்து பல்கலைக்கழக நகரியங்கள் அமைத்தல் மற்றும் ஒவ்வொரு மாவட்டத்திலும் அறிவியல், தொழில்நுட்பம், பொறியியல் மற்றும் கணிதப் படிப்புகளில் மாணவியர் சேர்க்கையை ஊக்குவிக்கும் வகையில் மாணவியருக்கான விடுதிகள் அமைக்கப்படும் என அறிவிக்கப்பட்டுள்ளதாக ஒன்றிய அரசின்கல்வித் துறையின் இணை அமைச்சர் டாக்டர் சுகாந்த மஜும்தார் மக்களவையில், தி.மு.க. அரக்கோணம் நாடாளுமன்றஉறுப்பினர் டாக்டர் எஸ். ஜெகத்ரட்சகன் அவர்கள் எழுப்பிய கேள்விக்கு விரிவான பதில் அளித்துள்ளார்.