புதுடெல்லி, ஜூலை 23–
2030ஆம் ஆண்டிற்குள் தமிழ்நாட்டு ஜவுளித்துறை 2100 கோடி அமெரிக்க டாலர் ஏற்றுமதி இலக்கை அடைய ஒன்றிய அரசு மேற்கொண்ட நடவடிக்கை என்ன? என்றும் ஜவுளித்துறை இயந்திரங்களை நவீனப்படுத்தவும் சிறு,குறு, நடுத்தர தொழில் நிறுவனங்களை பாதுகாக்கவும் ஒன்றிய அரசு எடுத்துள்ள நடவடிக்கைகள் என்ன? என்றும் நாடாளுமன்றத்தில் ஒன்றிய ஜவுளித் துறை அமைச்சர் கிரிராஜ் சிங் அவர்களிடம் கழக நாடாளுமன்றக் குழுத் துணைத் தலைவரும் மத்திய சென்னை நாடாளுமன்ற உறுப்பினருமான தயாநிதி மாறன் பல கேள்விகளை எழுப்பியுள்ளார்.
அதன் விவரங்கள் பின்வருமாறு :–
2030–ஆம் ஆண்டுக்குள் தமிழ்நாடு, 2100 கோடி அமெரிக்க டாலர் மதிப்பிலான ஜவுளி ஏற்றுமதியை எட்டுவதற்கும் குறிப்பாக திருப்பூருக்கு நிர்ணயிக்கப்பட்டுள்ள 1150 கோடி அமெரிக்க டாலர் ஏற்றுமதி இலக்கை அடையவும் ஒன்றிய அரசு வகுத்துள்ள செயல் திட்டம் என்ன? இதற்காக எடுக்கப்பட்டுள்ள நிதி மற்றும் கொள்கை நடவடிக்கைகள் என்ன?
விருதுநகரில் அமைக்கப்படும் பி.எம்.மித்ரா (PM–MITRA), மெகா ஜவுளிப் பூங்கா தற்போது எந்த நிலையில் உள்ளது? நிலம் கையகப்படுத்துதல், உள்கட்டமைப்பு வசதிகள், ஒதுக்கீடு செய்யப்பட்ட நிதி விவரம், ஜவுளி பூங்கா செயல்பட தொடங்கும் கால வரையறை ஆகியன குறித்து ஒன்றிய அரசு விளக்கம் அளிக்குமா?
ஜவுளித்துறை இயந்திரங்களை நவீனமயமாக்க எடுக்கப்பட்டுள்ள நடவடிக்கைகள் என்ன? திருப்பூர், கோயம்புத்தூர், ஈரோடு, கரூர் போன்ற ஜவுளித் தொழிலை மையமாகக் கொண்ட நகரங்களில் உள்ள சிறு, குறு, நடுத்தர தொழில்களுக்கு (MSMEs) வழங்கப்படும் நிதி உதவியின் விவரங்கள் என்ன?
தமிழ்நாட்டில் பெண் ஜவுளித் தொழிலாளர்களுக்கான தங்கும் விடுதிகள் மற்றும் புதிய ஜவுளித் தொழில் மையங்கள் அமைக்க ஒன்றிய அரசு திட்டமிட்டு ள்ளதா? அப்படியானால் அதன் விவரங்கள் என்ன?
செயற்கை இழை (Man–Made Fibre) மற்றும் சுற்றுச் சூழலுக்கு உகந்த ஜவுளி உற்பத்திக்கு மாறும் நிலையில், தமிழ்நாட்டில் பருத்தி சார்ந்த சிறு,குறு, நடுத்தர தொழில் நிறுவனங் களை பாதுகாக்கவும், அவற்றில் பணிபுரியும் தொழிலாளர்களின் வேலைவாய்ப்பு பாதிக்கப்படாமல்இருக்கவும் ஒன்றிய அரசு எடுத்துள்ள நடவடிக்கைகள் என்ன?
இவ்வாறு தயாநிதி மாறன் கேள்வி எழுப்பினார்.