புதுடெல்லி, ஜூலை 23–
நாடாளுமன்ற விதி 377ன் கீழ் அவசர முக்கியத்துவம் ஆன பிரச்சினை என்ற அடிப்படையில், டாக்டர்.கலாநிதி வீராசாமி அவர்கள் மேகதாது அணைக்கட்டும் விவகாரம் குறித்து நாடாளுமன்றத்தில் பேசினார்.
அப்போது அவர் பேசியதாவது:-–
கர்நாடகஅரசு காவிரி ஆற்றின் குறுக்கே மேகதாது என்னும் அணை கட்ட வேண்டும் என்று கோரி வருகிறது. இதனால், காவிரி நீரைக் கொண்டு, விவசாயத்தில் ஈடுபட்டுள்ள. தமிழகத்தின் காவிரி டெல்டா பகுதியில்வசிக்கும் விவாசியிகளிடையே பெரும் பதட்டம் நிலவுகிறது. ஏனெனில் இந்த அணைக் கட்டப்படுமானால், காவிரி ஆற்றுப் படுகையில் கீழ் மட்டத்தில் உள்ள தமிழகத்துக்கு நீர் வரத்து குறையும். தமிழக விவசாயிகளின் தேவைக்கு ஏற்ப சரியான காலத்தில்,
தண்ணீர் அணையிலிருந்து திறந்து விடப்பட்டால்தான் டெல்டா விவசாயிகளுக்கு விவசாயத்துக்குத் தேவையான நீர் கிடைக்கும்.
காவிரி நடுவர் மன்ற தீர்ப்புப்படி தமிழகம் உள்ளிட்ட காவிரி நீரைப் பயன்படுத்தும் மாநிலங்களுக்கு நீர் வழங்கப்பட வேண்டும் என்று உச்ச நீதிமன்றம் ஆணையிட்டுள்ளது. மேலும் காவிரி ஆற்றுப் படுகையில், புதிதாக அணைக்கட்டும் திட்டம் ஏதேனும் மேற்கொள்ளப் படுவதாக இருந்தால், காவிரி நீரில் உரிமையுள்ள அனைத்து மாநிலங்களும் ஒப்புதல் கொடுத்தால் மட்டுமே, அத்தகைய திட்டத்தை மேற்கொள்ள
இயலும்.
ஏற்கனவே காவிரி நதி நடுவர் மன்றம் காவிரிப் படுகை, நீர்வரத்து குறைவாக உள்ள ஆற்றுப்படுகை என அறிவித்துள்ளது. இந்நிலையில், காவிரி ஆற்றின் குறுக்கே புதிதாக அணை கட்டப்படுமானால், தமிழகத்துக்கு வரும் நீர் தடுக்கப்பட்டு, டெல்டா விவசாயிகள் பெரும் பாதிப்பைச் சந்திக்கும் நிலை உருவாகும். தமிழ்நாடு அரசும், தமிழக
சட்டமன்றமும் இத்திட்டத்திற்குக் கடும் எதிர்ப்பைத் தெரிவித்துள்ளதுடன், ஒன்றிய அரசு, அணை கட்ட முயலும் கர்நாடக அரசின் முயற்சி களைத் தடுக்கும்படி கோரியுள்ளன.
எனவே, தமிழக விவசாயிகளின் நலனைக் பாதுகாக்கும் வகையில், ஒன்றிய அரசு,கர்நாடக அரசின் அணைக்கட்டும் முயற்சியினைத் தடுத்து, காவிரி நடுவர் மன்றம் அளித்துள்ள தீர்ப்பின்படி தமிழகத்துக்கு உரிய அளவு காவிரி நீரைப் பகிர்ந்து அளிப்பதை உறுதிப்படுத்த வேண்டும்.
இவ்வாறு டாக்டர்.கலாநிதி வீராசாமி பேசினார்.